ഗ്രന്ഥപ്പുര (Granthappura) blog

1958 – ൽ പ്രസിദ്ധീകരിച്ച, ജോൺ ബനിയൻ രചിച്ച പരദേശി മോക്ഷയാത്ര – ഒന്നും രണ്ടും ഭാഗങ്ങൾ എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

ക്രിസ്തീയ ആത്മീയ സാഹിത്യത്തിലെ പ്രശസ്തമായ ഒരു അന്യാപദേശകഥയാണ് പരദേശി മോക്ഷയാത്ര. ഇംഗ്ലീഷ് എഴുത്തുകാരനായ ജോൺ ബനിയൻ എഴുതിയ ‘പിൽഗ്രിംസ് പ്രോഗ്രസ്’ എന്ന കൃതിയുടെ മലയാള രൂപാന്തരമായിട്ടാണ് ഇത് അറിയപ്പെടുന്നത്. മലയാളത്തിൽ ‘തീർത്ഥാടകൻ്റെ പ്രയാണം’ എന്നും ഇത് അറിയപ്പെടുന്നു. ബൈബിളിന് ശേഷം ലോകത്തിൽ ഏറ്റവും അധികം കോപ്പികൾ വിറ്റഴിക്കപ്പെട്ടതും, അനേകം ഭാഷകളിലേക്ക് വിവർത്തനം ചെയ്യപ്പെട്ടതുമായ പുസ്തകങ്ങളിൽ ഒന്നാണിത്. ക്രൈസ്തവ ജീവിതത്തിലെ ആത്മീയ യാത്രയാണ് ഈ പുസ്തകത്തിലെ പ്രധാന വിഷയം. പ്രധാന കഥാപാത്രമായ ക്രിസ്ത്യൻ എന്ന പരദേശി  നാശത്തിൻ്റെ നഗരത്തിൽ നിന്നും സ്വർഗ്ഗീയ നഗരത്തിലേക്ക് നടത്തുന്ന യാത്രയിൽ ഉണ്ടാകുന്ന സംഭവ വികാസങ്ങൾ ഇതിൽ വിവരിക്കുന്നു. പാപഭാരത്താൽ അസ്വസ്ഥനായ ക്രിസ്ത്യൻ എന്ന വ്യക്തി തൻ്റെ നഗരം നശിച്ചുപോകുമെന്ന് മനസ്സിലാക്കി, ഒരു പുസ്തകം നൽകുന്ന വെളിച്ചത്തിൽ മോക്ഷം തേടി യാത്ര തിരിക്കുന്നു. അത് ബൈബിൾ ആയിരുന്നു. യാത്രയിലുടനീളം അവൻ ‘നിരാശയുടെ കുഴി’, ‘പാപഭാരത്തിൻ്റെ മല’, ‘ദുരിതങ്ങളുടെ താഴ്‌വര’ തുടങ്ങിയ നിരവധി സ്ഥലങ്ങളിലൂടെ കടന്നുപോകുന്നു. സുവിശേഷകർ അവന് വഴി കാട്ടുന്നു. അവിശ്വാസം, ഭയം, ലൗകിക മോഹങ്ങൾ  തുടങ്ങിയ ശത്രുക്കളെ അവൻ വിശ്വാസത്താൽ അതിജീവിക്കുന്നു.  എല്ലാ പരീക്ഷണങ്ങളും അതിജീവിച്ച്, മരണം എന്ന നദി കടന്ന് ക്രിസ്ത്യൻ സ്വർഗ്ഗീയ നഗരത്തിൽ എത്തിച്ചേരുന്നു. ഒരു വിശ്വാസിയുടെ ജീവിതത്തിലെ വെല്ലുവിളികൾ, പ്രലോഭനങ്ങൾ, വിജയങ്ങൾ എന്നിവ ഇതിൽ പ്രതീകാത്മകമായി ചിത്രീകരിച്ചിരിക്കുന്നു. ഏതു കാലഘട്ടത്തിലും ആത്മീയ യാത്ര നടത്തുന്നവർക്ക് പ്രചോദനം നൽകുന്ന കൃതിയാണിത്. 

മെറ്റാഡാറ്റയും ഡിജിറ്റൽ പതിപ്പിലേക്കുള്ള കണ്ണിയും

പുസ്തകത്തിൻ്റെ മെറ്റാഡാറ്റയും ഡിജിറ്റൈസ് ചെയ്ത രേഖയിലേക്കുള്ള കണ്ണിയും താഴെ കൊടുത്തിരിക്കുന്നു.

• പേര്: പരദേശി മോക്ഷയാത്ര – ഒന്നും രണ്ടും ഭാഗങ്ങൾ
• രചന: ജോൺ ബനിയൻ
• പ്രസിദ്ധീകരണ വർഷം: 1958
• അച്ചടി: സി.എം.എസ്. പ്രസ്സ്, കോട്ടയം
• താളുകളുടെ എണ്ണം: 458
• സ്കാൻ ലഭ്യമായ ഇടം: കണ്ണി

1958 – ൽ പ്രസിദ്ധീകരിച്ച, മൂർക്കോത്ത് കുമാരൻ രചിച്ച കാകൻ എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

കാക്കകളുടെ ജീവിതത്തെക്കുറിച്ച് മൂർക്കോത്ത് കുമാരൻ എഴുതിയ ഗ്രന്ഥമാണിത്. ആഹാര സമ്പാദനവും ജീവിതചര്യകളും ഉൾപ്പെടെ കാക ജീവിതത്തിൻ്റെ സൂക്ഷ്മമായ അപഗ്രഥനം ആണ് ഈ പുസ്തകം. ലളിതമായ ഭാഷയിൽ വിശദീകരിച്ചിരിക്കുന്ന ഈ പുസ്തകത്തിൽ കാക്കകളെ കുറിച്ചുള്ള വിശ്വാസങ്ങളും പഠനവിധേയമാക്കിയിരിക്കുന്നു.

മെറ്റാഡാറ്റയും ഡിജിറ്റൽ പതിപ്പിലേക്കുള്ള കണ്ണിയും

പുസ്തകത്തിൻ്റെ മെറ്റാഡാറ്റയും ഡിജിറ്റൈസ് ചെയ്ത രേഖയിലേക്കുള്ള കണ്ണിയും താഴെ കൊടുത്തിരിക്കുന്നു.

• പേര്: കാകൻ
• രചന: മൂർക്കോത്ത് കുമാരൻ
• പ്രസിദ്ധീകരണ വർഷം: 1958
• അച്ചടി: വിദ്യാവിലാസം പ്രസ്സ്, തലശ്ശേരി
• താളുകളുടെ എണ്ണം: 72
• സ്കാൻ ലഭ്യമായ ഇടം: കണ്ണി

1965 – ൽ പ്രസിദ്ധീകരിച്ച, ശ്രീനാരായണ ഗുരു രചിച്ച ശ്രീനാരായണധർമ്മം അഥവാ ശ്രീനാരായണ സ്‌മൃതി എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

വർക്കല ശിവഗിരി മഠത്തിൽ വച്ച് ശ്രീനാരായണ ഗുരു അരുളി ചെയ്ത ഉപദേശങ്ങളാണ് ശ്രീനാരായണ ധർമ്മം എന്ന പുസ്തകത്തിൽ ഉൾപ്പെടുത്തിയിട്ടുള്ളത്. അദ്ദേഹത്തിൻ്റെ ധർമ്മോപദേശങ്ങൾ പദ്യരൂപത്തിലാണ് എഴുതിയിരിക്കുന്നത്. ആത്മാനന്ദ സ്വാമികളാണ് ഗുരുദേവൻ്റെ നിർദ്ദേശപ്രകാരം ഉപദേശങ്ങൾ പകർത്തി എഴുതിയത്. മനുഷ്യരാശിയുടെ ഭാവി ജീവിതത്തെ കൂടി മുൻകൂട്ടി കണ്ട നിർദ്ദേശങ്ങൾ ആണ് ഇതിൽ അടങ്ങിയിരിക്കുന്നത്. കാലാന്തരത്തിൽ ഉണ്ടാകേണ്ട വ്യത്യാസങ്ങൾക്കിടയിലും മനുഷ്യരിൽ ഒരു ഐക്യം ഉണ്ടാകേണ്ടതിൻ്റെ ആവശ്യകത ഗുരുദേവൻ ഇവിടെ വിശദമാക്കുന്നു. ധനം ദുർവ്യയം ചെയ്യുന്ന ആചാരങ്ങളും നടപടികളും തടയേണ്ടതിൻ്റെ ആവശ്യകതയും ഈ പുസ്തകത്തിൽ സൂചിപ്പിക്കുന്നുണ്ട്.

മെറ്റാഡാറ്റയും ഡിജിറ്റൽ പതിപ്പിലേക്കുള്ള കണ്ണിയും

പുസ്തകത്തിൻ്റെ മെറ്റാഡാറ്റയും ഡിജിറ്റൈസ് ചെയ്ത രേഖയിലേക്കുള്ള കണ്ണിയും താഴെ കൊടുത്തിരിക്കുന്നു.

• പേര്: ശ്രീനാരായണധർമ്മം അഥവാ ശ്രീനാരായണ സ്‌മൃതി
• രചന: ശ്രീനാരായണ ഗുരു
• പ്രസിദ്ധീകരണ വർഷം: 1965
• അച്ചടി: ശ്രീരാമവിലാസം പ്രസ്സ്, കൊല്ലം
• താളുകളുടെ എണ്ണം: 190
• സ്കാൻ ലഭ്യമായ ഇടം: കണ്ണി

1957 – ൽ പ്രസിദ്ധീകരിച്ച, ഇല്ലം നറ എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

കേരളത്തിലെ ഹൈന്ദവ ഭവനങ്ങളിൽ കർക്കിടകമാസത്തിൽ നടത്തുന്ന ഒരു ആചാരമാണ് ഇല്ലം നിറ അഥവാ ഇല്ലം നറ. സമൃദ്ധമായ വിളവും ഐശ്വര്യവും ഗൃഹത്തിനും നാടിനും ലഭിക്കാൻ വേണ്ടിയാണ് ഇത് ആചരിക്കുന്നത്. കറുത്തവാവ് കഴിഞ്ഞുള്ള ആദ്യത്തെ ഞായറാഴ്ച ദിവസം കർഷകർ മുങ്ങിക്കുളിച്ച് ഈറനണിഞ്ഞ് പാടത്തുനിന്നും ഒരുപിടി നെൽക്കതിർ അറുത്തെടുത്ത് ഒരു കറ്റ ക്ഷേത്രത്തിലേയ്ക്ക് വഴിപാടായി കൊടുക്കും. ദേശപരദേവതയുടെ അനുഗ്രഹം കൊണ്ട് നല്ല വിളവുണ്ടാകുമെന്നും കൃഷിയിലേർപ്പെട്ടവർക്കെല്ലാം അതിൻ്റെ നല്ല പങ്കുലഭിക്കുമെന്നുമാണ് ഇതിനു പിന്നിലുള്ള വിശ്വാസം. ജന്മിക്കും പാട്ടക്കാരനും പണിയാളനും കച്ചവടക്കാരനുമെല്ലാം കാർഷികപ്രവർത്തനത്തിനിടയിൽ ഒരേ പ്രാർഥനയാണുള്ളത്. വിളവ് നിറയാനും പൊലിയ്ക്കാനും ഉള്ള പ്രാർത്ഥനയാണ് പ്രധാന ചടങ്ങ്. ‘ഇല്ലം നിറ’ (വീടുനിറയട്ടെ), ‘വല്ലം നിറ’ (കുട്ട നിറയട്ടെ). ‘കൊല്ലം നിറ’ (വർഷം മുഴുവൻ നിറയട്ടെ), ‘പത്തായം നിറ’, ‘നാടുപൊലി’, ‘പൊലിയോപൊലി’ എന്നിങ്ങനെ പോകുന്നു ആ പ്രാർത്ഥന. ക്ഷേത്രത്തിൽ സമർപ്പിച്ച കറ്റകളിൽ നിന്ന് കതിർക്കുലകൾ സ്വീകരിച്ച് വീടിൻ്റെ മച്ചിലും ഉമ്മറത്തും പ്രത്യേക ആകൃതിയിൽ നെയ്ത് തൂക്കും. ഇത് അടുത്ത വർഷത്തെ ചടങ്ങ് നടക്കുന്നത് വരെ സ്വസ്ഥാനത്ത് നിർത്തിയിരിക്കും. പ്രത്യേകമായി ശുദ്ധികരിച്ച സ്ഥലങ്ങളിലും ക്ഷേത്രങ്ങളിലുമാണ് ഈ ചടങ്ങ് നടത്താറുള്ളത്. ഇതിനോട് ചേർന്ന് നടക്കുന്ന ചടങ്ങാണ് പുത്തരി, തൃപ്പുത്തരി എന്നിവ. ഈ ചടങ്ങുകളുടെ പൂർണ്ണമായ വിവരണമാണ് ഈ ഗ്രന്ഥത്തിൽ ഉൾപ്പെടുത്തിയിരിക്കുന്നത്.

മെറ്റാഡാറ്റയും ഡിജിറ്റൽ പതിപ്പിലേക്കുള്ള കണ്ണിയും

പുസ്തകത്തിൻ്റെ മെറ്റാഡാറ്റയും ഡിജിറ്റൈസ് ചെയ്ത രേഖയിലേക്കുള്ള കണ്ണിയും താഴെ കൊടുത്തിരിക്കുന്നു.

• പേര്: ഇല്ലം നറ
• പ്രസിദ്ധീകരണ വർഷം: 1957
• അച്ചടി: പഞ്ചാംഗം പ്രസ്സ്, കുന്നംകുളം
• താളുകളുടെ എണ്ണം: 34
• സ്കാൻ ലഭ്യമായ ഇടം: കണ്ണി

1952 – ൽ പ്രസിദ്ധീകരിച്ച, ആഗമാനന്ദ സ്വാമികൾ രചിച്ച ഹൈന്ദവധർമ്മം എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

ലോകത്തിലെ ഏറ്റവും പുരാതനവും സകല മതങ്ങളുടെ മാതാവുമാണ് ഹൈന്ദവധർമ്മമെന്ന ദർശനമാണ് ഈ ഗ്രന്ഥം മുന്നോട്ടുവെക്കുന്നത്. ചരിത്രത്തിന് നോട്ടമെത്താത്ത കാലം മുതൽക്കേ നിലനിൽക്കുന്ന സനാതന ധർമ്മം, മറ്റ് പല ആഗോള മതങ്ങളുടെയും അടിസ്ഥാനമാണെന്ന് സ്വാമികൾ ചരിത്രപരമായ തെളിവുകളോടെ സമർത്ഥിക്കുന്നു. കേവലം ആചാരങ്ങൾക്കപ്പുറം, മാനവികതയിലും ആത്മീയ സത്യങ്ങളിലും അധിഷ്ഠിതമായ ഒരു വിശ്വമതമായാണ് അദ്ദേഹം ഇതിനെ അവതരിപ്പിക്കുന്നത്. മതത്തിന്റെ പേരിനെക്കുറിച്ചുള്ള തെറ്റിദ്ധാരണകളെ തിരുത്തുന്നതിനൊപ്പം, ഭാരതീയ ചിന്താധാരകളുടെ ഔന്നത്യം ലോകത്തിന് മുൻപിൽ അഭിമാനത്തോടെ അടയാളപ്പെടുത്തുകയാണ് ഈ കൃതിയിലൂടെ അദ്ദേഹം ചെയ്യുന്നത്.

മെറ്റാഡാറ്റയും ഡിജിറ്റൽ പതിപ്പിലേക്കുള്ള കണ്ണിയും

പുസ്തകത്തിൻ്റെ മെറ്റാഡാറ്റയും ഡിജിറ്റൈസ് ചെയ്ത രേഖയിലേക്കുള്ള കണ്ണിയും താഴെ കൊടുത്തിരിക്കുന്നു.

• പേര്: ഹൈന്ദവധർമ്മം
• രചന: ആഗമാനന്ദ സ്വാമികൾ
• പ്രസിദ്ധീകരണ വർഷം: 1952
• അച്ചടി: B.B. Press, N. Parur
• താളുകളുടെ എണ്ണം: 36
• സ്കാൻ ലഭ്യമായ ഇടം: കണ്ണി

1941 – ൽ പ്രസിദ്ധീകരിച്ച, പി. ശേഷാദ്രി അയ്യർ രചിച്ച സമുദായശാസ്ത്രം എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

സമുദായശാസ്ത്രം അഥവാ സാമൂഹ്യ ശാസ്ത്രത്തെ കുറിച്ചുള്ള വിശദമായ പഠനമാണ് ഈ ഗ്രന്ഥം. സമുദായ ശാസ്ത്രത്തിൻ്റെ വ്യാപ്തി വളരെ വിശാലമാണ്. ഒന്നിലധികം വ്യക്തികളുടെ സമ്മേളനങ്ങൾ ഏതും സമുദായം എന്ന് പറയാം. വ്യക്തികൾ തമ്മിലുള്ള ഏതു ബന്ധവും ഇതിൻ്റെ പരിധിയിൽ പെടും. വ്യക്തി ബന്ധങ്ങൾ കുടുംബപരമോ സൗഹാർദ്ദപരമോ സാമ്പത്തികമോ മതപരമോ രാഷ്ട്രീയപരമോ ആയാലും എല്ലാം സമുദായ ശാസ്ത്രത്തിലെ വിശകലനങ്ങൾക്ക് വിധേയമാകും. ഈ ഗ്രന്ഥത്തിൽ രണ്ട് ഭാഗങ്ങൾ അടങ്ങിയിരിക്കുന്നു. ഒന്നാം ഭാഗത്തിൽ സമുദായ തത്വങ്ങളെ സംക്ഷിപ്തമായി വിവരിക്കുന്നു.  രണ്ടാം ഭാഗത്തിൽ പ്രാചീനകാലം മുതൽ സമുദായ ശാസ്ത്രത്തിൽ ചർച്ച നടത്തിയിട്ടുള്ള പ്രധാന ചിന്തകന്മാരുടെയും ഗവേഷകന്മാരുടെയും അഭിപ്രായങ്ങൾ ക്രോഡീകരിച്ച് ഉൾപ്പെടുത്തിയിരിക്കുന്നു. മനുഷ്യസമൂഹത്തിന് സംസ്കാരപരമായ പുരോഗമനം ഏതെല്ലാം മാർഗങ്ങളിൽ നിന്നാണ് സാധിച്ചിട്ടുള്ളതെന്നും ഏത് ലക്ഷ്യത്തെ അഭിമുഖീകരിച്ചാണ് പ്രയാണം ചെയ്യേണ്ടതെന്നും ഉള്ള വസ്തുതകൾ ഗ്രഹിക്കുന്നതിന് ഈ പുസ്തകം ഉപകാരപ്രദമായിരിക്കും.

മെറ്റാഡാറ്റയും ഡിജിറ്റൽ പതിപ്പിലേക്കുള്ള കണ്ണിയും

പുസ്തകത്തിൻ്റെ മെറ്റാഡാറ്റയും ഡിജിറ്റൈസ് ചെയ്ത രേഖയിലേക്കുള്ള കണ്ണിയും താഴെ കൊടുത്തിരിക്കുന്നു.

• പേര്: സമുദായശാസ്ത്രം
• രചന: പി. ശേഷാദ്രി അയ്യർ
• പ്രസിദ്ധീകരണ വർഷം: 1941
• അച്ചടി: സിറ്റി പ്രസ്സ്, തിരുവനന്തപുരം
• താളുകളുടെ എണ്ണം: 190
• സ്കാൻ ലഭ്യമായ ഇടം: കണ്ണി

1960-ൽ പ്രസിദ്ധീകരിച്ച, എം.ഈ. ചാക്കോ എഴുതിയ അണുപ്രവർത്തകശക്തി എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്

അണുശക്തിയെക്കുറിച്ചും അതിൻ്റെ സമാധാനപരമായ വിനിയോഗത്തെക്കുറിച്ചും സാധാരണക്കാർക്കു കൂടി മനസ്സിലാവുന്ന വിധത്തിലാണ് ഈ പുസ്തകം രചിച്ചിട്ടുള്ളത്. അണുസിദ്ധാന്തം (Atomic Theory), അണുബോംബ്, അണുശക്തിയും സമാധാനവും, കൃഷിയിലും വ്യവസായത്തിലും അണുശക്തിക്കുള്ള പങ്ക് എന്നിങ്ങനെ 14 അധ്യായങ്ങളിലായി വിഷയം ലളിതമായി അവതരിപ്പിച്ചിരിക്കുന്നു. ശാസ്ത്രീയമായ സാങ്കേതിക പദങ്ങൾക്ക് തുല്യമായ മലയാളം പദങ്ങൾ ഗ്രന്ഥകർത്താവ് ഇതിൽ ഉപയോഗിച്ചിട്ടുണ്ട്. വായനക്കാരുടെ സൗകര്യത്തിനായി ഇത്തരം പദങ്ങളുടെ ഇംഗ്ലീഷ് രൂപം ബ്രായ്ക്കറ്റുകളിൽ നൽകിയിട്ടുമുണ്ട്.

ആധുനിക വിഷയങ്ങളെക്കുറിച്ച് ഇന്ത്യൻ ഭാഷകളിൽ മികച്ച ഗ്രന്ഥങ്ങൾ രചിക്കുന്നതിനെ പ്രോത്സാഹിപ്പിക്കുന്നതിനായി ഏർപ്പെടുത്തിയ മദ്രാസ് സർവ്വകലാശാലയുടെ പുരസ്കാരം ഈ കൃതിക്ക് ലഭിച്ചിട്ടുണ്ട്. ന്യൂക്ലിയർ ഫിസിക്സിൽ അഗാധമായ അറിവില്ലാത്തവർക്കും ശാസ്ത്രവിഷയങ്ങൾ ലളിതമായി മനസ്സിലാക്കാൻ സഹായിക്കുന്ന ഒരു മികച്ച കൃതിയാണിതെന്ന് മദ്രാസ് സർവ്വകലാശാല ഈ പുസ്തകത്തെ വിലയിരുത്തുന്നു

മെറ്റാഡാറ്റയും ഡിജിറ്റൽ പതിപ്പിലേക്കുള്ള കണ്ണിയും

പുസ്തകത്തിൻ്റെ മെറ്റാഡാറ്റയും ഡിജിറ്റൈസ് ചെയ്ത രേഖയിലേക്കുള്ള കണ്ണിയും താഴെ കൊടുത്തിരിക്കുന്നു.

• പേര്: അണുപ്രവർത്തകശക്തി
• പ്രസിദ്ധീകരണ വർഷം: 1960
• അച്ചടി:India Press, Kottayam
• താളുകളുടെ എണ്ണം: 230
• സ്കാൻ ലഭ്യമായ ഇടം: കണ്ണി