1968 – ൽ പ്രസിദ്ധീകരിച്ച, തത്വവും നയവുംഎന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.
1968 – തത്വവും നയവും
ഭാരതീയ ജനസംഘത്തിൻ്റെ തത്വവും നയവും ക്രോഡീകരിച്ചിട്ടുള്ള ലഘു പുസ്തകത്തിൻ്റെ മൂന്നാം പതിപ്പാണിത്. ഭാരതീയ തത്വചിന്തയുടെ അടിസ്ഥാനത്തിൽ സ്വർഗ്ഗീയ ദീനദയാൽ ഉപാദ്ധ്യായ കണ്ടെത്തിയ ഏകാത്മ മാനവതാ സിദ്ധാന്തമാണ് ജനസംഘത്തിൻ്റെ തത്വ നയങ്ങളുടെ ആധാരം. ഈ പുസ്തകത്തിലെ സിദ്ധാന്തപരമായ ഭാഗങ്ങൾ കുറച്ചു ഗഹനമാണ്. ഉചിതമായ രീതിയിൽ ചിന്തിച്ചു മനസ്സിലാക്കേണ്ടവയാണ്.
1948 – ൽ പ്രസിദ്ധീകരിച്ച, കെ. ദാമോദരൻ രചിച്ച ഇന്ത്യയുടെ സാമ്പത്തികപ്രശ്നം എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.
1948 – ഇന്ത്യയുടെ സാമ്പത്തികപ്രശ്നം – കെ. ദാമോദരൻ
സ്വാതന്ത്ര്യത്തിനുശേഷം ഇന്ത്യയിൽ രൂപപ്പെട്ട സാമ്പത്തിക പ്രതിസന്ധിയെക്കുറിച്ച് വിശദമായ പഠനം നടത്തുന്ന ഗ്രന്ഥമാണിത്. സ്വാതന്ത്ര്യത്തിനു ശേഷവും ബ്രിട്ടീഷ് ഭരണത്തിൻ്റെ സ്വാധീനം നമ്മുടെ സാമ്പത്തിക മേഖലയിൽ പ്രകടമായിരുന്നു. അതിനെ അതിജീവിക്കാനുള്ള പരിശ്രമങ്ങളാണ് കാലാകാലങ്ങളായി നടന്നുകൊണ്ടിരിക്കുന്നത്. വൻകിട കുത്തക കമ്പനികളുടെ കടന്നുവരവ് രാജ്യത്തെ സാമ്പത്തിക വിതരണത്തെ കാര്യമായി ബാധിച്ചു. കൃഷിയിൽ അധിഷ്ഠിതമായ രാജ്യമായതുകൊണ്ട് തന്നെ കാർഷിക മേഖലയിലുള്ള പ്രതിസന്ധികൾ എല്ലാകാലത്തും രാജ്യത്തെ ഉലച്ചു കൊണ്ടിരിക്കുന്നു. രാജ്യം പിന്തുടർന്ന് പോരുന്ന സാമ്പത്തിക നയവും കുറ്റമറ്റത് അല്ലാത്ത അവസ്ഥയിൽ പലവിധത്തിൽ സാമ്പത്തിക പ്രതിസന്ധി രാജ്യത്തെ പ്രതികൂലമായി ബാധിക്കുന്നു. ഇതിനുള്ള പരിഹാരങ്ങൾ തേടിയുള്ള ചർച്ചയും ഈ പുസ്തകത്തിൻ്റെ ഭാഗമാണ്.
1966 – ൽ പ്രസിദ്ധീകരിച്ച, ഗോപാലകൃഷ്ണൻ രചിച്ച അയ്യപ്പസന്നിധിയിലേയ്ക്ക് എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.
1966 – അയ്യപ്പസന്നിധിയിലേയ്ക്ക് – ഗോപാലകൃഷ്ണൻ
ഗോപാലകൃഷ്ണൻ രചിച്ച അയ്യപ്പ സന്നിധിയിലേയ്ക്ക് എന്ന ഗ്രന്ഥത്തിൽ ശബരിമല ദർശനത്തിൻ്റെ വ്രതാനുഷ്ഠാനങ്ങൾ വിശദമായി അവതരിപ്പിച്ചിരിക്കുന്നു. ശബരിമല ക്ഷേത്രത്തിന് പിന്നിലുള്ള ഐതിഹ്യവും നിലനിൽക്കുന്ന വിശ്വാസക്രമങ്ങളും ഒരു ഭക്തൻ പാലിക്കേണ്ട കാര്യങ്ങളും ക്ഷേത്രദർശനത്തിൻ്റെ ഭാഗമായുള്ള ഓരോ ചടങ്ങുകളും ഈ ഗ്രന്ഥത്തിൽ വിശദമാക്കിയിരിക്കുന്നു.
1949 – ൽ പ്രസിദ്ധീകരിച്ച, ഫ്രെഡറിക് എംഗൽസ് രചിച്ച സോഷ്യലിസം – സാങ്കല്പികവും ശാസ്ത്രീയവും എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.
1949 – സോഷ്യലിസം – സാങ്കല്പികവും ശാസ്ത്രീയവും – ഫ്രെഡറിക് എംഗൽസ്
മാർക്സിയൻ സോഷ്യലിസ്റ്റ് സിദ്ധാന്തവും ചരിത്രപരമായ പിന്നാംപുറവും അതിൻ്റെ തത്വശാസ്ത്രപരവും ധനശാസ്ത്രപരവും രാഷീയവുമായ അടിസ്ഥാനവും ഏറ്റവുമധികം സംക്ഷിപ്തമായി ഒരേ ചരടിൽ കൂട്ടിയിണക്കി പ്രതിപാദിക്കുന്ന ഏക ഗ്രന്ഥമാണിത്. സോഷ്യലിസത്തിൻ്റെ സാരം പരിശോധിക്കുമ്പോൾ സമ്പത്തുള്ളവരും സമ്പത്ത് ഇല്ലാത്തവരും തമ്മിലുള്ള, അല്ലെങ്കിൽ മുതലാളിയും തൊഴിലാളിയും തമ്മിലുള്ള സംഘർഷത്തിൻ്റെ വ്യാഖ്യാനമാണ് പരിഗണിക്കപ്പെടുന്നത്. വർഗ്ഗ വൈരങ്ങളും ഉൽപാദനത്തിൻ്റെ അവ്യവസ്ഥയുമാണ് ഒരു പരിധിവരെ അതിന് കാരണമാകുന്നത്. എന്നാൽ സോഷ്യലിസത്തിൻ്റെ സിദ്ധാന്തപരമായ രൂപം മറ്റൊന്നാണ്. പതിനെട്ടാം നൂറ്റാണ്ടിൽ ഏറെ ചർച്ച ചെയ്യപ്പെട്ട ആ സിദ്ധാന്തങ്ങളുടെ വിപുലീകരണമാണ് ഈ പുസ്തകത്തിൽ ചർച്ച ചെയ്യപ്പെടുന്നത്.
1953 – ൽ പ്രസിദ്ധീകരിച്ച, ജനകീയ ചീനാ റിപ്പബ്ലിക്കിൻ്റെ കാർഷികപരിഷ്കാരനിയമംഎന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.
1953 – ജനകീയ ചീനാ റിപ്പബ്ലിക്കിൻ്റെ കാർഷികപരിഷ്കാരനിയമം
കാർഷിക മേഖലയെ ചൂഷണങ്ങളിൽ നിന്നും മോചിപ്പിക്കുന്നതിനു വേണ്ടി ചൈനീസ് ജനകീയ റിപ്പബ്ലിക്ക് നടപ്പിൽ വരുത്തിയ കാർഷിക പരിഷ്കാര നിയമങ്ങളുടെ വിവരണമാണ് ഈ പുസ്തകം. കാർഷിക ഉത്പാദനം വർദ്ധിപ്പിക്കുക എന്നതായിരുന്നു ഈ നിയമത്തിൻ്റെ പ്രധാന ലക്ഷ്യം. അതോടൊപ്പം ജന്മി വർഗ്ഗത്തിന്റെ ചൂഷണ സ്വഭാവം ഇല്ലാതാക്കാനും ഈ നിയമങ്ങൾ കൊണ്ട് സാധിച്ചു. ഭൂമിയുടെ വിതരണം ഏറ്റവും ഉചിതമാക്കാനും ഈ നിയമം ശ്രമിക്കുന്നു. ഭൂമിയില്ലാത്ത ദരിദ്രരുടെ പ്രശ്നങ്ങളും ഇതിൽ പരിഗണിക്കുന്നു.
1950 – ൽ പ്രസിദ്ധീകരിച്ച, മനുഷ്യാലയമഹാചന്ദ്രികഎന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.
1950 – മനുഷ്യാലയമഹാചന്ദ്രിക
കേരളീയ വാസ്തുവിദ്യയെയും വീട് നിർമ്മാണത്തെയും കുറിച്ച് പ്രതിപാദിക്കുന്ന ഏറ്റവും പ്രധാനപ്പെട്ട സംസ്കൃത ഗ്രന്ഥമാണ് മനുഷ്യാലയമഹാചന്ദ്രിക. പതിനാറാം നൂറ്റാണ്ടിൽ തിരുമംഗലത്ത് നീലകണ്ഠൻ നമ്പീശൻ രചിച്ചതെന്ന് കരുതപ്പെടുന്ന ഈ കൃതി, സ്ഥലപരിശോധന, നിർമ്മാണ രീതികൾ, അളവുകൾ, വാസ്തുവിദ്യാ ഘടകങ്ങൾ എന്നിവ ഉൾക്കൊള്ളുന്ന ഏഴ് അധ്യായങ്ങളായി തിരിച്ചിരിക്കുന്നു. കേരളത്തിലെ പരമ്പരാഗത കെട്ടിട നിർമ്മാണ രീതികളിൽ, പ്രത്യേകിച്ച് വീടുകൾക്ക് ഇന്നും ഏറ്റവും കൂടുതൽ ഉപയോഗിക്കപ്പെടുന്ന ഒരു റഫറൻസ് ഗ്രന്ഥമാണിത്.
1952 – ൽ പ്രസിദ്ധീകരിച്ച, എം. ഇലിൻ രചിച്ച മണ്ണും മനുഷ്യനും എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.
1952 – മണ്ണും മനുഷ്യനും – എം. ഇലിൻ
മണ്ണും മനുഷ്യനും തമ്മിലുള്ള സവിശേഷ ബന്ധം വിശദമാക്കുന്ന പുസ്തകമാണിത്. പ്രകൃതിയും മനുഷ്യനും പരസ്പരം ആശ്രയിച്ചാണ് കഴിയുന്നത്. എങ്കിലും മനുഷ്യൻ പ്രകൃതിയെ അവന് അനുകൂലമായ രീതിയിൽ പാകപ്പെടുത്താൻ ശ്രമിക്കുന്നു. അത് പലപ്പോഴും ദോഷവശങ്ങൾക്ക് കാരണമായിത്തീരുന്നു. ജനസംഖ്യ പോലെയുള്ള വൻ ഭീഷണിയെ കുറിച്ചും ഈ പുസ്തകത്തിൽ പരാമർശിക്കുന്നു. അതുപോലെതന്നെ മുതലാളിത്ത വ്യവസ്ഥിതിയുടെ ദോഷവശങ്ങളും ഈ പുസ്തകത്തിൽ വിവരിക്കുന്നു.
1954 – ൽ പ്രസിദ്ധീകരിച്ച, ജെ.സി. കുമരപ്പ രചിച്ച തൊഴിലിൻ്റെ തത്വശാസ്ത്രം എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.
1954 – തൊഴിലിൻ്റെ തത്വശാസ്ത്രം – ജെ.സി. കുമരപ്പ
സാമ്പത്തിക ശാസ്ത്രജ്ഞനായ ജെ.സി. കുമരപ്പ എഴുതിയ തൊഴിലിൻ്റെ തത്വശാസ്ത്രം മനുഷ്യജീവിതത്തിൽ തൊഴിൽ എത്രത്തോളം ആഴത്തിൽ ബന്ധപ്പെട്ടു കിടക്കുന്നു എന്ന് വിശദീകരിക്കുന്ന ഒരു ഗാന്ധിയൻ ദാർശനിക കൃതിയാണ്. ഈ ഗ്രന്ഥത്തിൽ, ജോലി വെറും ഉപജീവന മാർഗമല്ല, മറിച്ച് മനുഷ്യൻ്റെ വ്യക്തിത്വം, ആത്മവികസനം, സാമൂഹിക ഉത്തരവാദിത്വം എന്നിവയെ രൂപപ്പെടുത്തുന്ന ഒരു സജീവ പ്രക്രിയയാണെന്ന് കുമരപ്പ വ്യക്തമാക്കുന്നു. അദ്ദേഹം ജോലിയെ സൃഷ്ടിപരമായ ഭാഗമെന്നും കഠിനാധ്വാന ഭാഗമെന്നും രണ്ടായി വിഭജിക്കുന്നു. ഈ രണ്ടു ഘടകങ്ങളും സമന്വയത്തോടെ ഉണ്ടാകുമ്പോഴാണ് ഒരു മനുഷ്യൻ തൻ്റെ ജോലിയിൽ സന്തോഷവും അർത്ഥവും കണ്ടെത്തുന്നത്. എന്നാൽ ആധുനിക വ്യവസായ വ്യവസ്ഥയിൽ ജോലിയെ ചെറുതായി വിഭജിച്ച് യാന്ത്രികമാക്കിയതിനാൽ തൊഴിലാളി തൻ്റെ സൃഷ്ടിപരമായ പങ്ക് നഷ്ടപ്പെടുത്തി വെറും യന്ത്രത്തിൻ്റെ ഒരു ഭാഗം പോലെ മാറിപ്പോകുന്നു എന്ന് അദ്ദേഹം വിമർശിക്കുന്നു. ഈ സാഹചര്യത്തിൽ ജോലി മനുഷ്യനെ ഉയർത്തുന്ന ഒരു ശക്തിയായി മാറേണ്ടതിനുപകരം അവനെ അടിച്ചമർത്തുന്ന ഒരു ഘടകമായി മാറുന്നു. കുമരപ്പയുടെ ദൃഷ്ടിയിൽ, ശരിയായ തൊഴിൽ വ്യവസ്ഥ മനുഷ്യൻ്റെ ബുദ്ധി, സൃഷ്ടിപരത, ധാർമ്മികത എന്നിവ വളർത്തുകയും സാമൂഹിക സമത്വം ഉറപ്പാക്കുകയും ചെയ്യണം. അതിനാൽ തന്നെ അദ്ദേഹം ഗാന്ധിയൻ ആശയങ്ങളോട് ചേർന്ന് മനുഷ്യകേന്ദ്രിതവും ഗ്രാമകേന്ദ്രിതവുമായ സമ്പദ്വ്യവസ്ഥയെ പ്രോത്സാഹിപ്പിക്കുന്നു, അതിൽ ഓരോ വ്യക്തിക്കും അർത്ഥവത്തായും മാന്യമായും ജോലി ചെയ്യാൻ അവസരം ലഭിക്കണം. ജോലി ഒരു ഭാരമോ ശാപമോ അല്ല, മറിച്ച് ശരിയായ രീതിയിൽ ചെയ്താൽ അത് മനുഷ്യൻ്റെ ആത്മസാക്ഷാത്കാരത്തിനും സാമൂഹിക ക്ഷേമത്തിനും വഴിയൊരുക്കുമെന്ന് തൊഴിലിൻ്റെ തത്വശാസ്ത്രം പ്രസ്താവിക്കുന്നു.
1953 – ൽ പ്രസിദ്ധീകരിച്ച, പി.കെ. രാജരാജവർമ്മ രചിച്ച ശ്രീമതി കുഞ്ചി എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.
1953 – ശ്രീമതി കുഞ്ചി – പി.കെ. രാജരാജവർമ്മ
പി.കെ. രാജരാജവർമ്മ രചിച്ച ലേഖന സമാഹാരമാണ് ശ്രീമതി കുഞ്ചി. സ്ത്രീപക്ഷത്തുനിന്ന് ചിന്തിക്കുന്ന പന്ത്രണ്ട് ലേഖനങ്ങളാണ് ഈ പുസ്തകത്തിൽ ഉള്ളത്. സ്ത്രീകളുടെ കുടുംബജീവിതവും രാഷ്ട്രീയവും വിനോദങ്ങളും അടക്കം പല വിഷയങ്ങളിലേയ്ക്കും ഈ ലേഖനങ്ങൾ കടന്നു ചെല്ലുന്നു. സ്ത്രീകളെ കുറിച്ചുള്ള സമൂഹത്തിൻ്റെ കാഴ്ചപ്പാടുകളെ പുനർ വിചാരണ നടത്താനുള്ള ശ്രമവും ഈ പുസ്തകത്തിൽ കാണാൻ സാധിക്കും.
1956 – ൽ പ്രസിദ്ധീകരിച്ച, കണ്ടിയൂർ മഹാദേവശാസ്ത്രികൾ വിവർത്തനം തയ്യാറാക്കിയ സൗന്ദര്യലഹരി – ഭാഷാഭാഷ്യം എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.
1956 – സൗന്ദര്യലഹരി – ഭാഷാഭാഷ്യം
ശ്രീ ശങ്കരാചാര്യർ രചിച്ച വിഖ്യാത സംസ്കൃത കൃതിയുടെ മലയാള വിവർത്തനമാണ് ഇത്. ഇതൊരു ഭഗവതീ സ്തോത്ര കൃതിയാണ്. ദേവി ഭക്തരുടെ ഇടയിൽ സഹസ്രാബ്ദങ്ങളായി പ്രചാരത്തിൽ ഇരിക്കുന്ന ഈ കൃതിക്ക് സംസ്കൃതത്തിൽ തന്നെ മുപ്പത്തിയാറിലധികം വ്യാഖ്യാനങ്ങൾ ഉണ്ട്. കണ്ടിയൂർ മഹാദേവ ശാസ്ത്രികൾ തയ്യാറാക്കിയ ഈ വിവർത്തനത്തിൽ ഓരോ ശ്ലോകത്തിനും പ്രത്യേക ഉപാസന വിധികളും യന്ത്രങ്ങളും ഭാഷ്യകാരൻ നിർദ്ദേശിച്ചിരിക്കുന്നു. യന്ത്രങ്ങളുടെ ചിത്രങ്ങളും പുസ്തകത്തിൽ ഉൾപ്പെടുത്തിയിട്ടുണ്ട്.
