Author: Meena Kootala

1946 – രാജകുമാരി – കെ. പരമുപിള്ള

1946-ൽ പ്രസിദ്ധീകരിച്ച, കെ. പരമുപിള്ള എഴുതിയ രാജകുമാരി എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്

പകൽസമയം സ്വപ്നം കാണുകയും യാഥാർത്ഥ്യവും ഛായകളും തമ്മിൽ തിരിച്ചറിയാൻ കഴിയാതെ വരികയും ചെയ്യുന്ന ഒരു പഴയ ശാപത്തിന് ഇരയായ സുനേത്രൻ എന്ന രാജകുമാരനാണ് ഈ കഥ വിവരിക്കുന്നത്. ബാല്യകാലത്ത് തന്നെ അയൽരാജ്യത്തെ ഇഭാദേവി എന്ന രാജകുമാരിയുമായി പാദുകാരഹിത താംബൂലനിശ്ചയം വഴി അദ്ദേഹത്തിൻ്റെ വിവാഹം നിശ്ചയിക്കപ്പെട്ടിരുന്നു. സുനേത്രനു പ്രായപൂർത്തിയായപ്പോൾ, വിവാഹത്തിനായി കുമാരിയെ കൂട്ടിക്കൊണ്ടുവരാൻ രാജാവ് ദൂതന്മാരെ അയക്കുന്നു. എന്നാൽ സുമതി, വിശുദ്ധ എന്നീ രണ്ടു വിദുഷികളുടെ സ്വാധീനത്താൽ തീവ്രമായ സ്ത്രീ സമത്വവാദ ആശയങ്ങൾ സ്വീകരിച്ച കുമാരി വിവാഹബന്ധം നിരസിക്കുന്നു. പുരുഷാധിപത്യത്തെ എതിർക്കാനും സ്ത്രീകൾക്കു മാത്രമായി വിദ്യ അഭ്യസിപ്പിക്കാനും സ്വതന്ത്രരായി ജീവിക്കാനുമായി അവൾ രാജ്യത്തിൻ്റെ അതിർത്തിയിൽ ഒരു കലാലയം സ്ഥാപിക്കുകയും അവിടെ പുരുഷന്മാർക്കു പൂർണ്ണ പ്രവേശനം വിലക്കുകയും ചെയ്യുന്നു. കുമാരിയുടെ ചിത്രത്തോടുള്ള പ്രണയത്താലും അവളെ നേരിട്ടു കാണാനുള്ള ആഗ്രഹത്താലും രാജകുമാരൻ സുനേത്രനും അദ്ദേഹത്തിൻ്റെ പ്രിയസുഹൃത്തുക്കളായ സരളനും മോഹനനും സ്ത്രീവേഷം കെട്ടി ആരുമറിയാതെ ഈ കലാലയത്തിൽ പ്രവേശിക്കുന്നു. കലാലയത്തിനുള്ളിൽ ചരിത്രം, തത്വശാസ്ത്രം, ഗോളശാസ്ത്രം, കായിക പരിശീലനങ്ങൾ എന്നിവ യുവതികളെ പഠിപ്പിക്കുന്നതു അവർ കാണുന്നു. അവിടെവെച്ച് മോഹനൻ തൻ്റെ പെങ്ങളായ സുമതിയെ തിരിച്ചറിയുന്നു.  തുടർന്നുണ്ടാകുന്ന നാടകീയമായ സംഭവങ്ങളും, യുദ്ധരംഗവും, ഒടുവിൽ രാജകുമാരിയുടെ മനസ്സ് മാറി രാജകുമാരനുമായി ഒന്നിക്കുന്നതുമാണ് കഥയുടെ ചുരുക്കം.

വിദ്യാഭ്യാസ വിചക്ഷണനും നായർ സമുദായ പരിഷ്കർത്താക്കളിൽ പ്രമുഖനുമായിരുന്നു ഗ്രന്ഥകർത്താവായ കെ. പരമുപിള്ള. തിരുവിതാംകൂറിൽ ആദ്യമായി എം.എ. ബിരുദം നേടിയ ഇദ്ദേഹം എം.എ പരമുപിള്ള എന്നും അറിയപ്പെട്ടു. മാക്സ് മുള്ളർ രചിച്ച രാമകൃഷ്ണൻ്റെ ജീവിതവും വചനങ്ങളും എന്ന ഗ്രന്ഥത്തിൽ നിന്ന് പ്രചോദിതനായി ഭഗവാൻ ശ്രീരാമകൃഷ്ണൻ ജീവചരിത്രവും സദ് വാക്യങ്ങളും, വിഭ്രമ വിലാസം, മനോമോഹനകഥകൾ, മാസ്മരവിദ്യ, ഹിപ്നോട്ടിസം തുടങ്ങിയ കൃതികൾ രചിച്ചു

തിരുവനന്തപുരം ജില്ലയിലെ മലയിൻകീഴ്  ശ്രീകൃഷ്ണ വിലാസം ലൈബ്രറിയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്

മെറ്റാഡാറ്റയും ഡിജിറ്റൽ പതിപ്പിലേക്കുള്ള കണ്ണിയും

പുസ്തകത്തിൻ്റെ മെറ്റാഡാറ്റയും ഡിജിറ്റൈസ് ചെയ്ത രേഖയിലേക്കുള്ള കണ്ണിയും താഴെ കൊടുത്തിരിക്കുന്നു.

    • പേര്: രാജകുമാരി
    • രചന: കെ. പരമുപിള്ള
    • താളുകളുടെ എണ്ണം: 100
    • സ്കാൻ ലഭ്യമായ ഇടം: കണ്ണി

1952 – താരഹാരം

1952-ൽ പ്രസിദ്ധീകരിച്ച, ഉള്ളൂർ എസ്. പരമേശ്വരയ്യർ രചിച്ച താരഹാരം എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്

?

മലയാള ഭാഷയിലെ പ്രമുഖകവിയും പണ്ഡിതനുമായിരുന്ന ഉള്ളൂർ എസ്. പരമേശ്വരയ്യരുടെ പ്രസിദ്ധ കവിതാസമാഹാരങ്ങളിലൊന്നാണ് താരഹാരം. 1925-ൽ പ്രസിദ്ധീകരിച്ച സമാഹാരത്തിൻ്റെ 1952-ലെ നാലാം പതിപ്പാണിത്. പെരിയാറിനോട്, ഒരു മഴത്തുള്ളി തുടങ്ങിയ പ്രസിദ്ധമായ കവിതകൾ ഉൾപ്പെടെയുള്ള 11 കവിതകളാണ് ഈ പുസ്തകത്തിലുള്ളത്. കേരള കാളിദാസൻ എന്നറിയപ്പെട്ടിരുന്ന കേരളവർമ്മ വലിയകോയിത്തമ്പുരാൻ്റെ ചരമത്തിൽ അനുശോചിച്ചുകൊണ്ടെഴുതിയ ‘വിലാപ പഞ്ചവിംശതി’യാണ് പുസ്തകത്തിലെ ആദ്യത്തെ കവിത

താരഹാരം എന്ന വാക്കിന് മുത്തുമാലയെന്നും നക്ഷത്രഹാരമെന്നും അർത്ഥമുണ്ട്. മുത്തുകൾ പോലെ മൂല്യവത്തായതും നക്ഷത്രങ്ങൾ പോലെ തിളങ്ങുന്നതുമായ കവിതകൾ കൊണ്ട് കൈരളീദേവതയ്ക്കു തീർത്ത മാല്യം എന്ന അർത്ഥമാണ് ശീർഷകത്തിനുള്ളത്. ഉള്ളൂരിൻ്റെ ഗംഭീരമായ കാവ്യശൈലിയും ദാർശനികചിന്തകളും സാഹിത്യമേന്മയും വ്യക്തമാക്കുന്ന മികച്ചൊരു കവിതാസമാഹാരമാണ് ‘താരഹാരം’

തിരുവനന്തപുരം ജഗതിയിലുള്ള മഹാകവി ഉള്ളൂർ സ്മാരക ഗവേഷണകേന്ദ്രത്തിൽ നിന്നുള്ള സ്കാൻ ആണിത്

മെറ്റാഡാറ്റയും ഡിജിറ്റൽ പതിപ്പിലേക്കുള്ള കണ്ണിയും

പുസ്തകത്തിൻ്റെ മെറ്റാഡാറ്റയും ഡിജിറ്റൈസ് ചെയ്ത രേഖയിലേക്കുള്ള കണ്ണിയും താഴെ കൊടുത്തിരിക്കുന്നു.

  • പേര്: താരഹാരം
  • രചന: ഉള്ളൂർ എസ്. പരമേശ്വരയ്യർ
  • പ്രസിദ്ധീകരണ വർഷം: 1952
  • അച്ചടി: ശ്രീധര പ്രസ്സ്, തിരുവനന്തപുരം
  • താളുകളുടെ എണ്ണം: 140
  • സ്കാൻ ലഭ്യമായ ഇടം: കണ്ണി

മഹച്ചരിതമഞ്ജരി – 3 – അലക്സാണ്ടർ

കെ. പത്മനാഭ അയ്യർ എഴുതിയ മഹച്ചരിതമഞ്ജരി എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്. പരമ്പരയിലെ മൂന്നാമത്തെതായി പ്രസിദ്ധീകരിച്ച ഈ പുസ്തകത്തിൽ അലക്സാണ്ടർ ചക്രവർത്തിയുടെ ജീവിതത്തെക്കുറിച്ചും കാലഘട്ടത്തെയും കുറിച്ചാണ് രേഖപ്പെടുത്തിയിട്ടുള്ളത്

ചെറുപ്പകാലത്തുതന്നെ അലക്സാണ്ടർ പ്രശസ്തിയും കീർത്തിയും ആഗ്രഹിച്ചിരുന്നു. തൻ്റെ പിതാവ് അനേകം രാജ്യങ്ങൾ പിടിച്ചടക്കുന്നതു കണ്ടുകൊണ്ട് താൻ വളർന്നുവരുമ്പോൾ സ്വാധീനപ്പെടുത്താൻ രാജ്യങ്ങളൊന്നും ഉണ്ടാവുകയില്ലെന്ന് അദ്ദേഹം കരുതി. കായികാഭ്യാസങ്ങളോടൊപ്പം നിരന്തരം വ്യായാമം ചെയ്യുന്നതിലൂടെ തൻ്റെ ശരീരത്തിൻ്റെ ഉറപ്പും വഴക്കവും നിലനിർത്താൻ ശ്രദ്ധിച്ചു. സാധാരണ ഗുരുക്കന്മാരുടെ നിയന്ത്രനത്തിന് അധീനമാകുന്ന സ്വഭാവമല്ല പുത്രൻ്റെതെന്നു കണ്ട് ഫിലിപ്പ് രാജാവ് പ്രശസ്ത തത്ത്വചിന്തകനായ അരിസ്റ്റോട്ടിലിൻ്റെ കീഴിലുള്ള ശിക്ഷണവും വിദ്യാഭ്യാസവും അലക്സാണ്ടർക്കു നൽകാൻ നിശ്ചയിച്ചു. ഇരുപതാമത്തെ വയസ്സിൽ തൻ്റെ പിതാവ് വധിക്കപ്പെട്ടതിനു ശേഷം അദ്ദേഹം മാസിഡോണിയയുടെ അധികാരമേറ്റെടുത്തു

ത്രേസ്, ഗ്രീസ്, ഏഷ്യാമൈനർ, സിറിയ, ഈജിപ്ത്, പേർഷ്യ, മദ്ധ്യഏഷ്യ എന്നിവിടങ്ങളിലൂടെ അലക്സാണ്ടർ നടത്തിയ പ്രശസ്തമായ പടയോട്ടങ്ങളെ പുസ്തകത്തിൽ വിവരിക്കുന്നു. ബി.സി 327-മാണ്ടിൽ ലക്ഷത്തിൽല്പരം പടയാളികൾക്കൊപ്പം ഇന്ത്യയിലെത്തിയ അലക്സാണ്ടർ സിന്ധു നദിക്കു ചുറ്റുമുള്ള രാജാക്കന്മാരോട് തനിക്കു കീഴടങ്ങുന്നതാണു നല്ലതെന്ന് അറിയിച്ചു. പഞ്ചാബ് പ്രദേശത്തെ സൈനിക നീക്കങ്ങൾ, അതിനുശേഷമുള്ള സൂസയിലേക്കുള്ള മടക്കയാത്ര, അലക്സാണ്ടറുടെ ജീവിതത്തിലെ ഒടുവിലത്തെ വർഷങ്ങൾ, അലക്സാണ്ടറുടെ സ്വഭാവവിശേഷങ്ങൾ, വ്യക്തിപ്രഭാവം, ചരിത്രത്തിൽ അദ്ദേഹത്തിനുള്ള സ്ഥാനം, അദ്ദേഹത്തിൻ്റെ സാമ്രാജ്യത്വ സംഭാവനകൾ, അദ്ദേഹത്തെക്കുറിച്ച് പ്രചരിച്ചിരുന്ന ഐതിഹ്യങ്ങൾ എന്നിവയാണ് പുസ്തകത്തിൻ്റെ അവസാന ഭാഗത്തുള്ളത്. പുസ്തകം പ്രസിദ്ധീകരിച്ച വർഷം രേഖപ്പെടുത്തിയതായി കാണുന്നില്ല

തിരുവനന്തപുരം ജില്ലയിലെ മലയിൻകീഴ്  ശ്രീകൃഷ്ണ വിലാസം ലൈബ്രറിയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്

മെറ്റാഡാറ്റയും ഡിജിറ്റൽ പതിപ്പിലേക്കുള്ള കണ്ണിയും

പുസ്തകത്തിൻ്റെ മെറ്റാഡാറ്റയും ഡിജിറ്റൈസ് ചെയ്ത രേഖയിലേക്കുള്ള കണ്ണിയും താഴെ കൊടുത്തിരിക്കുന്നു.

    • പേര്: മഹച്ചരിതമഞ്ജരി
    • രചന: K. Padmanabha Iyer
    • അച്ചടി: The Christian Press, Mavelikkara
    • സ്കാൻ ലഭ്യമായ ഇടം: കണ്ണി

1951 – ശ്രീ മഹാഭാരതം കിളിപ്പാട്ട്

1951-ൽ പ്രസിദ്ധീകരിച്ച, ശ്രീ മഹാഭാരതം കിളിപ്പാട്ട് എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്

മലയാള ഭാഷയുടെ പിതാവായി കരുതപ്പെടുന്ന തുഞ്ചത്ത് എഴുത്തച്ഛൻ കിളിപ്പാട്ട് ശൈലിയിൽ എഴുതിയ മഹാഭാരതകഥയാണ് മഹാഭാരതം കിളിപ്പാട്ട്. പൗലോമപർവ്വം മുതൽ സ്വർഗ്ഗാരോഹണപർവ്വം വരെയുള്ള ഇരുപത്തിയൊന്നു പർവ്വങ്ങളാണ് ഇതിലുള്ളത്. താളിയോലകൾ ഒത്തു നോക്കി പിഴ തിരുത്തിയ ഈ പുസ്തകത്തിൻ്റെ പരിശോധകൻ ചേപ്പാട്ട് കെ. അച്യുതവാര്യർ ആണ്. പാട്ടിൻ്റെ വരികൾ മുറിയ്ക്കാതെ നക്ഷത്രചിഹ്നമിട്ടാണ് തിരിച്ചിരിക്കുന്നത്.

തിരുവനന്തപുരം ജില്ലയിലെ മലയിൻകീഴ്  ശ്രീകൃഷ്ണ വിലാസം ലൈബ്രറിയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്

മെറ്റാഡാറ്റയും ഡിജിറ്റൽ പതിപ്പിലേക്കുള്ള കണ്ണിയും

പുസ്തകത്തിൻ്റെ മെറ്റാഡാറ്റയും ഡിജിറ്റൈസ് ചെയ്ത രേഖയിലേക്കുള്ള കണ്ണിയും താഴെ കൊടുത്തിരിക്കുന്നു.

    • പേര്: ശ്രീ മഹാഭാരതം കിളിപ്പാട്ട്
    • പരിശോധകൻ: ചേപ്പാട്ട് കെ. അച്യുതവാര്യർ
    • പ്രസിദ്ധീകരണ വർഷം: 1951
    • അച്ചടി: Sreeramavilasam Press, Kollam
    • സ്കാൻ ലഭ്യമായ ഇടം: കണ്ണി

1931 – മൂളിയിൽ കൃഷ്ണൻ

1931-ൽ പ്രസിദ്ധീകരിച്ച, കെ.എം നായർ എഴുതിയ മൂളിയിൽ കൃഷ്ണൻ എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്

പത്തൊൻപതാം നൂറ്റാണ്ടിലെ പ്രമുഖരിൽ ഒരാളായിരുന്നു മൂളിയിൽ കൃഷ്ണൻ. വടക്കേ മലബാറിലെ ചിറക്കൽ താലൂക്കിലുള്ള താവക്കരയിലെ പ്രശസ്തമായ ‘മൂളിയിൽ’ തറവാട്ടിലാണ് മൂളിയിൽ കൃഷ്ണൻ ജനിച്ചത്. പരമ്പരാഗതമായിത്തന്നെ വിഷവൈദ്യത്തിനു പേരുകേട്ട തറവാടായിരുന്നു അത്. പിതാവായ പത്മനാഭനും (പൊക്കൻ ഗുരുക്കൾ) മീനാക്ഷിക്കും ഉണ്ടായ ഒൻപതു മക്കളിൽ അഞ്ചാമത്തെയാളായിരുന്നു കൃഷ്ണൻ. ബാല്യത്തിൽ പിടിപെട്ട കഠിനമായ വസൂരിരോഗം ഇടതുകണ്ണിൻ്റെ കാഴ്ച ശക്തി നഷ്ടപ്പെടുത്തി എങ്കിലും കുട്ടിക്കാലത്തു തന്നെ സംസ്കൃത ശ്ലോകങ്ങളും അമരകോശവുമൊക്കെ അതിവേഗം മനഃപാഠമാക്കാനുള്ള അപാരമായ ധിഷണാശക്തി അദ്ദേഹം പ്രകടിപ്പിച്ചു

അക്കാലത്തെ ഒരു ജ്യോത്സ്യൻ്റെ അഭിപ്രായപ്രകാരം ഇംഗ്ലീഷ് പഠിപ്പിച്ചിട്ടു കാര്യമില്ല എന്ന് വിലക്കിയിരുന്നെങ്കിലും, കൃഷ്ണൻ വീട്ടുകാർ അറിയാതെ റോമൻ കത്തോലിക്കാ സ്കൂളിൽ പോയി ഇംഗ്ലീഷ് പഠിച്ചു. 1868-ൽ കണ്ണൂരിൽ നിന്ന് ഒന്നാം റാങ്കോടെ മെട്രിക്കുലേഷൻ ജയിച്ചു. അതിനു ശേഷം കുറച്ചുകാലം കോഴിക്കോട് ഗവൺമെൻ്റ് കോളേജിൽ മലയാളം അധ്യാപകനായി ജോലി ചെയ്തിരുന്നു എങ്കിലും വൈകാതെ മദ്രാസ് പ്രസിഡൻസി കോളേജിൽ ചേർന്ന് ബി.എ ബിരുദം നേടി. 1894-ൽ ബി.എൽ നിയമ ബിരുദവും കരസ്ഥമാക്കി. മദ്രാസ് പ്രസിഡൻസി കോളേജിൽ ദീർഘകാലം മലയാളം മുൻഷിയായും 1893-ൽ മദ്രാസ് ഗവൺമെൻ്റിൻ്റെ ഔദ്യോഗിക മലയാളം ട്രാൻസ്ലേറ്ററായും സേവനമനുഷ്ഠിച്ചു. മദ്രാസ് സർവ്വകലാശാലയുടെ ഫെലോ, ഹോണററി ഫെലോ, ബോർഡ് ഓഫ് സ്റ്റഡീസ് അധ്യക്ഷൻ, ടെക്സ്റ്റ് ബുക്ക് കമ്മിറ്റി അധ്യക്ഷൻ തുടങ്ങി നിരവധി ഉന്നത സ്ഥാനങ്ങൾ വഹിച്ചു. 1913-ൽ ഗവൺമെൻ്റ് അദ്ദേഹത്തിന് ഹോണററി പ്രസിഡൻസി മജിസ്ട്രേറ്റ് പദവി നൽകി ആദരിച്ചു

പത്തൊൻപതാം നൂറ്റാണ്ടിലെയും ഇരുപതാം നൂറ്റാണ്ടിൻ്റെ തുടക്കത്തിലെയും മലബാറിൻ്റെയും മദ്രാസിൻ്റെയും സാമൂഹിക-വിദ്യാഭ്യാസ ചരിത്രത്തിലേക്ക് വെളിച്ചം വീശുന്ന അമൂല്യമായ ഒരു ജീവചരിത്ര ഗ്രന്ഥമാണ് മൂളിയിൽ കൃഷ്ണൻ. ചില അപൂർവ്വ ചിത്രങ്ങളും ഫോട്ടൊകളും പുസ്തകത്തിൽ ഉൾപ്പെടുത്തിയിട്ടുണ്ട്. മൂളിയിൽ കൃഷ്ണൻ മരിക്കുന്നതിന് ഏകദേശം മൂന്ന് മാസം മുമ്പ്, ഗ്രന്ഥകർത്താവായ കേ. എം. നായർ അദ്ദേഹത്തിൽ നിന്ന് നേരിട്ട് വിവരങ്ങൾ ചോദിച്ചറിഞ്ഞാണ് ഈ പുസ്തകം തയ്യാറാക്കിയത്. മൂളിയിൽ കൃഷ്ണൻ്റെ മരണശേഷം മദ്രാസിലെത്തിയ മഹാകവി കുമാരനാശാൻ ഈ ജീവചരിത്രത്തിൻ്റെ കൈയെഴുത്തുപ്രതി വായിക്കുകയും, അതിനൊരു മുഖവുര നൽകാം എന്ന വാഗ്ദാനത്തോടെ പ്രിൻ്റ് ചെയ്യാനായി നാട്ടിലേക്ക് കൊണ്ടുപോകുകയും ചെയ്തു. എന്നാൽ നിർഭാഗ്യവശാൽ, ആ യാത്രയിലാണ് പല്ലനയാറ്റിൽ വെച്ച് വഞ്ചിമുങ്ങി കുമാരനാശാൻ അന്തരിക്കുന്നത്. ആശാനോടൊപ്പം ഈ പുസ്തകത്തിൻ്റെ ആദ്യ കൈയെഴുത്തുപ്രതിയും നഷ്ടപ്പെട്ടു. പന്നീട്, സൂക്ഷിച്ചുവെച്ചിരുന്ന പഴയ കുറിപ്പുകൾ യാദൃച്ഛികമായി കണ്ടെടുത്ത ശേഷമാണ് കേ. എം. നായർ ഈ പുസ്തകം പുനഃസൃഷ്ടിച്ച് 1931-ൽ പ്രസിദ്ധീകരിച്ചത്.

കോഴിക്കോട് ജില്ലയിലെ പറയഞ്ചേരി സെൻഗുപ്ത പബ്ലിക് ലൈബ്രറിയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്.

മെറ്റാഡാറ്റയും ഡിജിറ്റൽ പതിപ്പിലേക്കുള്ള കണ്ണിയും

പുസ്തകത്തിൻ്റെ മെറ്റാഡാറ്റയും ഡിജിറ്റൈസ് ചെയ്ത രേഖയിലേക്കുള്ള കണ്ണിയും താഴെ കൊടുത്തിരിക്കുന്നു.

  • പേര്: മൂളിയിൽ കൃഷ്ണൻ
  • രചന: K.M. Nair
  • പ്രസിദ്ധീകരണ വർഷം: 1931
  • അച്ചടി: Norman Printing Bureau, Calicut
  • താളുകളുടെ എണ്ണം: 130
  • സ്കാൻ ലഭ്യമായ ഇടം: കണ്ണി

1947 – ജീവിതസ്മൃതികൾ

1947-ൽ പ്രസിദ്ധീകരിച്ച, ജീവിതസ്മൃതികൾ എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്

മഹാകവി രവീന്ദ്രനാഥ ടാഗോർ ബംഗാളി ഭാഷയിലെഴുതിയ ‘ജീവനസ്മൃതി’ എന്ന ആത്മകഥാഗ്രന്ഥത്തിൻ്റെ മലയാള വിവർത്തനമാണ് ജീവിതസ്മൃതികൾ. ടാഗോറിനോടൊപ്പം ശാന്തിനികേതനിൽ താമസിച്ചിരുന്ന കാലത്താണ് പരിഭാഷകനായ കെ.സി പിള്ള ഈ ഗ്രന്ഥത്തിൻ്റെ അധികഭാഗവും തയ്യാറാക്കിയത്. വിശ്വഭാരതി സർവകലാശാലയിലെ ലൈബ്രേറിയനായ പ്രഫസ്സർ പ്രഭാത് കുമാർ മുഖർജി രചിച്ച ‘രവീന്ദ്രജീവനി’ എന്ന പുസ്തകവും ഇതിൻ്റെ രചനക്ക് ഉപയോഗപ്പെടുത്തിയിട്ടുണ്ട് എന്നും ഗ്രന്ഥകാരൻ പുസ്തകത്തിൻ്റെ തുടക്കത്തിലെ പ്രസ്താവനയിൽ എഴുതിയിരിക്കുന്നു

ഈ ആത്മകഥാ കുറിപ്പുകളിൽ ടാഗോറിൻ്റെ ബാല്യകാല അനുഭവങ്ങളും ചിന്തകളും വ്യക്തമായി ആവിഷ്കരിച്ചിരിച്ചിട്ടുണ്ട്. ഓർമ്മകൾ കേവലം ഒരു ചരിത്രകാരനെ പോലെയല്ല, മറിച്ച് ഒരു ചിത്രകാരനെപ്പോലെയാണ് പ്രവർത്തിക്കുന്നത്. നടന്ന സംഭവങ്ങളെ അതേപടി രേഖപ്പെടുത്താതെ, സ്വന്തം അഭിരുചിക്കനുസരിച്ച് മാറ്റിമറിച്ചാണ് മനസ്സിൽ വരച്ചിടുന്നത്. കുട്ടിക്കാലത്ത് വീട്ടിലെ ജോലിക്കാരുടെ കർശനമായ നിയന്ത്രണത്തിലായിരുന്നു മഹാകവിയുടെ വളർച്ച. വേലക്കാരനായ ശ്യാമൻ വരച്ചിട്ട ലക്ഷ്മണ രേഖയിലിരുന്നു കൊണ്ട് ജാലകത്തിലൂടെ പുറത്തെ കാഴ്ചകളും ആൽവൃക്ഷവും കുളക്കടവും നോക്കിക്കണ്ട ബാല്യകാല അനുഭവങ്ങൾ കാവ്യാത്മകമായി വിവരിക്കുന്നു. പ്രകൃതിയുമായി ഇണങ്ങിനിന്നുള്ള പഠനത്തോടായിരുന്നു ടാഗോറിന് താല്പര്യം. ഇതാണ് പിൽക്കാലത്ത് ശാന്തിനികേതൻ എന്ന ആശ്രമവിദ്യാലയം സ്ഥാപിക്കാൻ അദ്ദേഹത്തിന് പ്രചോദനമായത്.

ടാഗോർ തൻ്റെ അൻപതാമത്തെ വയസ്സിലാണ് ഈ ആത്മകഥ ബംഗാളിയിൽ എഴുതി പ്രസിദ്ധീകരിക്കുന്നത്. അദ്ദേഹത്തിൻ്റെ ജീവിതത്തിൻ്റെ ആദ്യ 27 വർഷത്തെ അനുഭവങ്ങളും കാവ്യചിന്തകളുടെ വളർച്ചയുമാണ് ഇതിൽ പ്രധാനമായുമുള്ളത്. വ്യക്തിപരമായ ഓർമ്മകളിലൂടെ ടാഗോർ എന്ന കവിയുടെയും ദാർശനികൻ്റെയും വികാസം എങ്ങനെ സംഭവിച്ചു എന്ന് മനസ്സിലാക്കാൻ ഈ ആത്മകഥ സഹായിക്കുന്നു.

തിരുവനന്തപുരം ജില്ലയിലെ സി.വി. സ്മാരക ഗ്രന്ഥശാലയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്

മെറ്റാഡാറ്റയും ഡിജിറ്റൽ പതിപ്പിലേക്കുള്ള കണ്ണിയും

പുസ്തകത്തിൻ്റെ മെറ്റാഡാറ്റയും ഡിജിറ്റൈസ് ചെയ്ത രേഖയിലേക്കുള്ള കണ്ണിയും താഴെ കൊടുത്തിരിക്കുന്നു.

    • പേര്: ജീവിതസ്മൃതികൾ
    • പ്രസിദ്ധീകരണ വർഷം: 1947
    • താളുകളുടെ എണ്ണം: 296
    • സ്കാൻ ലഭ്യമായ ഇടം: കണ്ണി

1937 – ഭൂലോകവിവരണം

1937-ൽ പ്രസിദ്ധീകരിച്ച, സി.എസ്. ബാലകൃഷ്ണ വാരിയർ എഴുതിയ ഭൂലോകവിവരണം എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്

തിരുവിതാംകൂറിലെ ഏഴാം ക്ലാസ്സ് പാഠ്യപദ്ധതിക്കായി തയ്യാറാക്കിയ പ്രാരംഭ ഭൂമിശാസ്ത്ര പാഠപുസ്തകമാണ് ഭൂലോകവിവരണം. ശാസ്ത്രീയ സിദ്ധാന്തങ്ങൾ മാത്രം അടങ്ങിയ ഭൂമിശാസ്ത്രത്തേക്കാൾ വിദ്യാർത്ഥികളുടെ അപക്വമായ ബാലമനസ്സിന് അനുയോജ്യമായ ‘ഭൂവിവരണം’ എന്ന രീതിയാണ് ഗ്രന്ഥകർത്താവ് ഇതിൽ സ്വീകരിച്ചിരിക്കുന്നത്. പരിസരശക്തികളോട് മനുഷ്യൻ നടത്തുന്ന ജീവനപോരാട്ടവും ജീവിതരീതികളിൽ ഉണ്ടാകുന്ന മാറ്റങ്ങളുമാണ് പുസ്തകത്തിലെ പ്രധാന പ്രതിപാദ്യവിഷയം. ചിത്രങ്ങൾ, ഭൂപടങ്ങൾ, പ്രയോഗ പരീക്ഷണങ്ങൾ, ഓരോ അധ്യായത്തിനും ശേഷമുള്ള അഭ്യാസ ചോദ്യങ്ങൾ എന്നിവ വഴി കൃത്യമായ വസ്തുബോധവും പഠനപദ്ധതിയും ഉറപ്പാക്കുന്നു.

ഭൂമിയുടെ ഗോളാകൃതി തെളിയിക്കുന്ന കൊളംബസ്, മഗല്ലൻ എന്നിവർ നടത്തിയ ചരിത്രപരമായ കടൽയാത്രകൾ, കപ്പലിന്റെ വരവ്, ചക്രവാളത്തിന്റെ സവിശേഷതകൾ, ധ്രുവങ്ങൾ എന്നിവയെക്കുറിച്ച് പുസ്തകത്തിൽ വിശദീകരിക്കുന്നു. ഭൂമിയിലെ സ്ഥല-ജല അനുപാതം, അർദ്ധഗോളങ്ങൾ, ആറു പ്രധാന ഭൂഖണ്ഡങ്ങൾ, മഹാസമുദ്രങ്ങൾ, മരുഭൂമികൾ, പ്രധാന പർവ്വത-പീഠഭൂമി പ്രദേശങ്ങളുടെ വിവരണം, ലോകത്തെ പ്രധാന നദികളുടെ ഗതിയും വ്യാവസായിക-കാർഷിക പ്രാധാന്യങ്ങളും, എസ്കിമോകളുടെ ജീവിതം എന്നിവയെക്കുറിച്ചും പുസ്തകത്തിൽ സമഗ്രമായി വിവരിക്കുന്നു

തിരുവനന്തപുരം ജില്ലയിലെ സി.വി. സ്മാരക ഗ്രന്ഥശാലയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്

മെറ്റാഡാറ്റയും ഡിജിറ്റൽ പതിപ്പിലേക്കുള്ള കണ്ണിയും

പുസ്തകത്തിൻ്റെ മെറ്റാഡാറ്റയും ഡിജിറ്റൈസ് ചെയ്ത രേഖയിലേക്കുള്ള കണ്ണിയും താഴെ കൊടുത്തിരിക്കുന്നു.

    • പേര്: ഭൂലോകവിവരണം
    • പ്രസിദ്ധീകരണ വർഷം: 1937
    • താളുകളുടെ എണ്ണം: 124
    • സ്കാൻ ലഭ്യമായ ഇടം: കണ്ണി

1932 – കുചേലമന്ദിരത്തിലെ ശ്രീദേവി

1932-ൽ പ്രസിദ്ധീകരിച്ച, ജ്യോത്സ്യൻ കെ.ജി. ദാസ്സ് എഴുതിയ കുചേലമന്ദിരത്തിലെ ശ്രീദേവി എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്

ആറന്മുള നീർവിളാകം സ്വദേശിയായ ജ്യോത്സ്യൻ കെ. ജി. ദാസ്സ് രചിച്ച ഖണ്ഡകാവ്യമാണ് ‘കുചേലമന്ദിരത്തിലേ ശ്രീദേവി’. ആകെ 5 സർഗ്ഗങ്ങളിലായാണ് ഈ കാവ്യം രചിക്കപ്പെട്ടിട്ടുള്ളത്. ശ്രീമദ്ഭാഗവതത്തിലെ ‘കുചേലവൃത്തം’ തന്നെയാണ് ഈ കാവ്യത്തിൻ്റെ പശ്ചാത്തലമെങ്കിലും, ഇതിന്റെ പ്രതിപാദനത്തിൽ കവി വേറിട്ടൊരു വഴി സ്വീകരിച്ചിരിക്കുന്നു. കൃഷ്ണനെ കാണാൻ പോകുന്ന കുചേലനു പിന്നാലെ പോകാതെ, കുചേലൻ്റെ ദരിദ്രമായ ഭവനത്തിൽ കഴിച്ചുകൂട്ടുന്ന പത്നിയുടെയും വിശന്നു കരയുന്ന മക്കളുടെയും അവസ്ഥയിലാണ് കാവ്യം ശ്രദ്ധ കേന്ദ്രീകരിക്കുന്നത്. വിശപ്പുകൊണ്ട് വലയുന്ന കുട്ടികളെ ആശ്വസിപ്പിക്കാൻ മാതാവ് സന്മാർഗ്ഗതത്ത്വങ്ങളും ഈശ്വരഭക്തിയും ഈശ്വരനിയമങ്ങളും ലളിതമായി ഉപദേശിച്ചു കൊടുക്കുന്നു

കുചേലപത്നിയുടെ ശുചിത്വത്തിലും ഭക്തിയിലും പ്രസന്നയായി ലക്ഷ്മിദേവി (ശ്രീദേവി) ആവിർഭവിക്കുകയും കുചേലമന്ദിരത്തെ സർവ്വ ഐശ്വര്യങ്ങളും കൊട്ടാരസദൃശമായ സമ്പന്നതയും നൽകി അനുഗ്രഹിക്കുകയും ചെയ്യുന്നു. തുടർന്ന് തിരികെയെത്തുന്ന കുചേലൻ കുടുംബസമേതം സന്തുഷ്ടനായി വാഴുന്നതോടെ കാവ്യം അവസാനിക്കുന്നു. മഹാകവി ഉള്ളൂർ എസ്. പരമേശ്വരയ്യർ, വിദ്വാൻ കെ.ഒ ഗോപാലഗണകൻ എന്നിവരുടെ അനുമോദന അഭിപ്രായങ്ങളും വിദ്വാൻ സി. ഐ. ഗോപാലപിള്ളയുടെ അവതാരികയും ഈ കൃതിയിലുണ്ട്.

തിരുവനന്തപുരം ജില്ലയിലെ മലയിൻകീഴ്  ശ്രീകൃഷ്ണ വിലാസം ലൈബ്രറിയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്

മെറ്റാഡാറ്റയും ഡിജിറ്റൽ പതിപ്പിലേക്കുള്ള കണ്ണിയും

പുസ്തകത്തിൻ്റെ മെറ്റാഡാറ്റയും ഡിജിറ്റൈസ് ചെയ്ത രേഖയിലേക്കുള്ള കണ്ണിയും താഴെ കൊടുത്തിരിക്കുന്നു.

    • പേര്: കുചേലമന്ദിരത്തിലെ ശ്രീദേവി
    • രചന: K.G. Das
    • പ്രസിദ്ധീകരണ വർഷം: 1932
    • അച്ചടി: Subhodayam Press, Thiruvananthapuram
    • സ്കാൻ ലഭ്യമായ ഇടം: കണ്ണി

1947 – ജൈത്രയാത്ര

1947-ൽ പ്രസിദ്ധീകരിച്ച, തിരുനയിനാർകുറിച്ചി കെ. മാധവൻ നായർ എഴുതിയ ജൈത്രയാത്ര എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്

1946 ആഗസ്റ്റ് 16-ലെ ‘പ്രത്യക്ഷ സമര ദിന’ പ്രഖ്യാപനത്തെത്തുടർന്ന് കിഴക്കൻ ബംഗാളിലെ നൗഖാലിയിലും തിപ്പരയിലും മറ്റും പൊട്ടിപ്പുറപ്പെട്ട ദാരുണമായ വർഗ്ഗീയ ലഹളകളുടെയും, അതിനെ തുടർന്നുണ്ടായ കൂട്ടക്കൊലകളുടെയും പശ്ചാത്തലത്തിലാണ് ഈ പുസ്തകം രചിക്കപ്പെട്ടിട്ടുള്ളത്. ബംഗാളിലെ ലഹളബാധിത പ്രദേശങ്ങളിലേക്ക് നഗ്നപാദനായി ഗാന്ധിജി നടത്തിയ കാൽനടയാത്രയെക്കുറിച്ചും അവിടെ നടന്ന പ്രധാന സംഭവങ്ങളെക്കുറിച്ചും പുസ്തകത്തിൽ വിവരിക്കുന്നു. അന്നത്തെ രാഷ്ട്രപതി ആചാര്യ കൃപലാനി, സുചേത കൃപലാനി, ശരത് ചന്ദ്ര ബോസ്, പുരുഷോത്തം ദാസ് താണ്ഡൻ എന്നിവരുടെ യാത്രാവിവരങ്ങളും അന്നത്തെ ബംഗാൾ പ്രധാനമന്ത്രി സുഹ്യവർദ്ധിയുമായുള്ള സംഭാഷണങ്ങളും അന്നത്തെ രാഷ്ട്രീയ സാഹചര്യങ്ങളും പുസ്തകത്തിൽ ഉൾപ്പെടുത്തിയിട്ടുണ്ട്.

സ്വാതന്ത്ര്യലബ്ധിയുടെ തൊട്ടുമുമ്പ് ഭാരതത്തെ ഉലച്ച വർഗ്ഗീയ വിദ്വേഷങ്ങൾക്കെതിരെ സ്നേഹവും സത്യവും അഹിംസയും ആയുധമാക്കി ഗാന്ധിജി നടത്തിയ ഒടുവിലത്തെ മഹത്തായ പരീക്ഷണത്തിൻ്റെയും തീർത്ഥാടനത്തിൻ്റെയും അപൂർവ്വമായ രേഖപ്പെടുത്തലാണ് ഈ പുസ്തകം.

തിരുവനന്തപുരം ജില്ലയിലെ കിടാരക്കുഴി ജവഹർ സ്മാരക ഗ്രന്ഥശാലയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്

മെറ്റാഡാറ്റയും ഡിജിറ്റൽ പതിപ്പിലേക്കുള്ള കണ്ണിയും

പുസ്തകത്തിൻ്റെ മെറ്റാഡാറ്റയും ഡിജിറ്റൈസ് ചെയ്ത രേഖയിലേക്കുള്ള കണ്ണിയും താഴെ കൊടുത്തിരിക്കുന്നു.

    • പേര്: ജൈത്രയാത്ര
    • രചന: തിരുനൈനാർക്കുറിച്ചി മാധവൻ നായർ
    • പ്രസിദ്ധീകരണ വർഷം: 1947
    • താളുകളുടെ എണ്ണം: 100
    • സ്കാൻ ലഭ്യമായ ഇടം: കണ്ണി

1947 – ഈശ്വരഭക്തി

1947-ൽ പ്രസിദ്ധീകരിച്ച, കെ. മാധവക്കുരുക്കൾ രചിച്ച, ഈശ്വരഭക്തി എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്കഥകളിപ്രദീപിക, കുചേലഗോപാലം തുള്ളൽ, വിജ്ഞാനകൗസ്തുഭം തുടങ്ങിയ പുസ്തകങ്ങളുടെ രചയിതാവായ സാഹിത്യഭൂഷണൻ കരൂർ കെ. മാധവക്കുരുക്കൾ 1932-ൽ എഴുതിയ ലേഖനമാണ് ഈശ്വരഭക്തി എന്ന ചെറിയ പുസ്തകത്തിലുള്ളത്. ഭഗവാനോടുള്ള ഭക്തിയുടെ പ്രാധാന്യത്തെക്കുറിച്ചും അതിലൂടെ മോക്ഷം നേടുന്നതിനുള്ള വഴികളെയും കുറിച്ച് ഇതിൽ വിശദീകരിക്കുന്നു

കേവലം ഭൗതിക സുഖങ്ങൾക്കപ്പുറം ഈശ്വരഭക്തിയിലൂടെ ചിത്തശുദ്ധിയും ശാശ്വത സുഖവും നേടുകയാണ് മനുഷ്യജന്മത്തിന്റെ പരമമായ കർത്തവ്യം. മോക്ഷപ്രാപ്തിക്ക് ജ്ഞാനമാർഗ്ഗവും ഭക്തിമാർഗ്ഗവും ഉണ്ടെങ്കിലും സാധാരണക്കാർക്ക് ഏറ്റവും സുഗമമായി പിന്തുടരാവുന്നത് ഭക്തിമാർഗ്ഗമാണ്. ഭക്തിയെ ‘വൈധി’, ‘രാഗാദിജാ’ എന്നിങ്ങനെ തിരിക്കുന്നു. വർണ്ണാശ്രമത്തെ അനുഷ്ഠിച്ചുകൊണ്ട് ഈശ്വരനെ ഭജിക്കുന്നവരുടെ ഭക്തിക്കാണ് വൈധി എന്നു പറയുന്നത്. ഫലാകാംക്ഷയോടു കൂടി ഭജിക്കുന്നത് രാഗാധിജാ. അതായത് ഭക്തിയെ കാമ്യം എന്നും അകാമ്യം എന്നും തരംതിരിച്ചിരിക്കുന്നു. ഭക്തിക്ക് ജാതി, മതം, വർണ്ണം, ലിംഗം തുടങ്ങിയ യാതൊരു വേർതിരിവുകളുമില്ല; ഏതു മനുഷ്യനും ഏകാഗ്രമായ ഭക്തിയിലൂടെ ഈശ്വരാനുഗ്രഹം പ്രാപിക്കാം. കലിയുഗത്തിൽ ചിത്തശുദ്ധിക്കും ഏകാഗ്രതയ്ക്കും ക്ഷേത്രദർശനവും വിഗ്രഹാരാധനയും സ്തോത്രപാരായണവും അത്യന്തം ശ്രേഷ്ഠവും ഉപകാരപ്രദവുമാണ് എന്നും ഗ്രന്ഥകാരൻ അഭിപ്രായപ്പെടുന്നു. പുസ്തകത്തിൻ്റെ തുടക്കത്തിലും ഒടുക്കവും ഭഗവാനെ സ്തുതിച്ചു കൊണ്ടുള്ള ശ്ലോകങ്ങൾ ഉൾപ്പെടുത്തിയിട്ടുണ്ട്

തിരുവനന്തപുരം ജില്ലയിലെ സി.വി. സ്മാരക ഗ്രന്ഥശാലയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്

മെറ്റാഡാറ്റയും ഡിജിറ്റൽ പതിപ്പിലേക്കുള്ള കണ്ണിയും

പുസ്തകത്തിൻ്റെ മെറ്റാഡാറ്റയും ഡിജിറ്റൈസ് ചെയ്ത രേഖയിലേക്കുള്ള കണ്ണിയും താഴെ കൊടുത്തിരിക്കുന്നു.

    • പേര്: ഈശ്വരഭക്തി 
    • പ്രസിദ്ധീകരണ വർഷം: 1947
    • താളുകളുടെ എണ്ണം: 28
    • സ്കാൻ ലഭ്യമായ ഇടം: കണ്ണി