1941-ൽ പ്രസിദ്ധീകരിച്ച, എസ്സ്. കുഞ്ഞിക്കൃഷ്ണപിള്ള എഴുതിയ ശങ്കര കവികൾ എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്
എസ്സ്. കുഞ്ഞിക്കൃഷ്ണപിള്ള എഴുതിയ ജീവചരിത്രഗ്രന്ഥമാണ് ശങ്കര കവികൾ. രചയിതാവിൻ്റെ അച്ഛനും മുത്തച്ഛനുമാണ് ഇതിൽ പരയുന്ന ശങ്കര കവികൾ. സ്വാതിതിരുനാൾ രാജാവിൻ്റെ സദീർ കോർട്ടിലെ ഒന്നാം ജഡ്ജിയായിരുന്ന പണ്ഡിറ്റ് ശങ്കർ നാഥാണ് ലേഖകൻ്റെ മുത്തച്ഛൻ. അദ്ദേഹം പഞ്ചാബിലെ രൺജിത്ത് സിംഗ് രാജാവിൻ്റെ സദസ്യനുമായിരുന്നു. ശങ്കരനാഥ ജ്യോത്സ്യൻ എന്ന പേരിലായിരുന്നു തിരുവിതാംകൂറിൽ അദ്ദേഹത്തിനു പ്രശസ്തി. അദ്ദേഹത്തിൻ്റെ മകനായ ആറ്റുകാൽ ശങ്കരപ്പിള്ള ഹജൂർ കച്ചേരിയിൽ ക്ലർക്കായി ജീവിതം ആരംഭിച്ച് സാദർ ഹോർട്ടിലെ പ്രധാന വിവർത്തകനും ജില്ലാ മുൻസിഫും ആയി ഉയർന്നയാളാണ്. അക്കാലത്തെ പ്രസിദ്ധനായ കവിയും ആയിരുന്നു. ആറ്റിങ്ങൽ മൂത്തറാണിയുടെ വിവാഹവുമായി (പള്ളിക്കെട്ട്) ബന്ധപ്പെട്ട് രചിച്ച കല്യാണശതകം, ദേവിഭാഗവതം, നവരാത്രി മാഹാത്മ്യം, ശ്രീമദ് വിസാഖവിജയം, ശങ്കരകൃതി, പ്രഹ്ലാദ ചരിതം, വിന്ധ്യമർദ്ദനവും മനുവൃത്തവും എന്നിവയാണ് അദ്ദേഹത്തിൻ്റെ പ്രധാന രചനകൾ. ശങ്കരനാഥ ജ്യോത്സ്യൻ അറുപത്തി ഒമ്പതാം വയസ്സിലും മകനായ ആറ്റുകാൽ ശങ്കരപ്പിള്ള അൻപത്തി നാലാമത്തെ വയസ്സിലും അന്തരിച്ചു. ദിവാനായ കെ. ശങ്കര സുബ്ബയ്യരാണ് ഇംഗ്ലീഷിൽ ഈ കൃതിക്ക് അവതാരിക എഴുതിയിരിക്കുന്നത്. കെ. നീലകണ്ഠപ്പിള്ള എഴുതിയ ആറ്റുകാൽ ശങ്കരപ്പിള്ളയുടെ കാവ്യകൃതികളുടെ നിരൂപണവും ഈ പുസ്തകത്തിൽ ഉൾക്കൊള്ളിച്ചിട്ടുണ്ട്
തിരുവനന്തപുരം ജില്ലയിലെ മലയിൻകീഴ് ശ്രീകൃഷ്ണ വിലാസം ലൈബ്രറിയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്
മെറ്റാഡാറ്റയും ഡിജിറ്റൽ പതിപ്പിലേക്കുള്ള കണ്ണിയും
പുസ്തകത്തിൻ്റെ മെറ്റാഡാറ്റയും ഡിജിറ്റൈസ് ചെയ്ത രേഖയിലേക്കുള്ള കണ്ണിയും താഴെ കൊടുത്തിരിക്കുന്നു.
- പേര്: ശങ്കര കവികൾ
- രചയിതാവ്: എസ്സ്. കുഞ്ഞിക്കൃഷ്ണപിള്ള
- അച്ചടി: The Reddiar Press, Trivandrum
- താളുകളുടെ എണ്ണം: 72
- സ്കാൻ ലഭ്യമായ ഇടം: കണ്ണി