1941-ൽ പ്രസിദ്ധീകരിച്ച, അർപ്പുതസ്സാമി എഴുതിയ പത്രമീമാംസ എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്
സൂചനയൊന്നും നൽകിയിട്ടില്ലെങ്കിലും ആദ്ധ്യാത്മിക ഗ്രന്ഥങ്ങളുടെ മാതൃകയിൽ പത്രത്തിലെ വിഭവങ്ങളെയും പംക്തികളെയും വാർത്തകളുടെ സ്വഭാവത്തെയും പരിഹസിക്കാൻ ഉദ്ദേശിച്ചു രചിട്ടുള്ളതാണ് ഈ പുസ്തകം എന്ന് ഉള്ളടക്കത്തിലൂടെ കടന്നുപോവുമ്പോൾ മനസ്സിലാക്കാം. ”യഥാർത്ഥത്തിൽ പത്രമീമാംസ ഒരു മികച്ച വേദാന്തഗ്രന്ഥമാണ്” എന്ന് ആമുഖത്തിൽ പ്രസ്താവിച്ചിരിക്കുന്നു. ഹൈന്ദവധർമ്മശാസ്ത്രങ്ങളിൽ എട്ടിനുള്ള പ്രാധാന്യം മനസ്സിലാക്കി എട്ടു വിഭാഗങ്ങളിലായാണ് അർപ്പുതസാമി എന്ന ആചാര്യൻ ഈ രചന നടത്തിയിരിക്കുന്നതെന്ന് ആമുഖമെഴുതിയ നിത്യാനന്ദൻ പറയുന്നു. പത്രങ്ങളുടെ ആധിക്യവും വർദ്ധിച്ചു വരുന്ന ജനപ്രീതിയും അവയുടെ ഉള്ളടക്കങ്ങളുടെ ഗൗരവത്തെ ചോർത്തിക്കളയുന്നുവെന്ന ചിന്തയാവാം ഇത്തരമൊരു രചനക്ക് ഗ്രന്ഥകാരനെ പ്രേരിപ്പിച്ചിരിക്കുക. പുസ്തകരചയിതാവായ അർപ്പുതസ്സാമിയും ആമുഖമെഴുതിയ നിത്യാനന്ദനും യഥാർത്ഥ പേരുകാരാണോ എന്നും സംശയമുണ്ട്
ഓരോ ശ്ലോകം തുടക്കത്തിൽ കൊടുത്ത് അവയ്ക്ക് വ്യാഖ്യാനവും ഉദാഹരണവും നൽകുന്ന രീതിയിലാണ് പുസ്തകത്തിൻ്റെ സംവിധാനം. ‘ടിപ്പണ്യാ ച സഹ’ (ടിപ്പണി സഹിതം) എന്ന ഉപശീർഷകത്തെ അന്വർത്ഥമാക്കുന്ന വിധത്തിലാണ് ഇത്. തമാശരൂപത്തിലാണെങ്കിലും ഉദാഹരണങ്ങളും തിരഞ്ഞെടുത്ത വിഷയങ്ങളുടെ വൈവിധ്യവും അക്കാലത്തെ പത്രങ്ങളുടെ സ്വഭാവം മനസ്സിലാക്കാനും ഒരു പരിധിവരെ പത്രപ്രവർത്തനപരിശീലനത്തിനു സഹായകമാവുന്ന വിധത്തിലുമാണ് രചന. അതുകൊണ്ട് ഹാസരൂപത്തിലുള്ള പരിശീലനഗ്രന്ഥമായും വ്യത്യസ്തമായ നിലയിലുള്ള വിമർശനഗ്രന്ഥമായും ഈ പുസ്തകത്തെ പരിഗണിക്കാവുന്നതാണ്. വിഷയസമ്പാദനം എന്ന അധ്യായത്തിൽ അങ്ങാടി വാർത്തക്ക് കൊടുത്തിട്ടുള്ള ഒരു ഉദാഹരണം ഇങ്ങനെ,
“സ്ഥലത്തെ ഉപരിവിദ്യാലയത്തിലെ പ്രാധാനധ്യാപകൻ ഇന്നലെ വൈകുന്നേരം ……… കടയിൽ നിന്ന് ഒരു കോട്ടിനുള്ള തുണി വാങ്ങിച്ചിരിക്കുന്നതായി അറിയുന്നു”
പത്രാധിപർക്കുണ്ടാവേണ്ട യോഗ്യതകളെക്കുറിച്ചുള്ള ഒരു ശ്ലോകത്തിൻ്റെ സാമ്പിൾ,
”വായിച്ചറിവു കഷ്ടിച്ചും
വായാടിത്തരമേറെയും
ആരാനുമേതുമില്ലായ്കിൽ
പോരും, പത്രാനുരൂപനാം”
കോട്ടയം പബ്ലിക്ക് ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.
മെറ്റാഡാറ്റയും ഡിജിറ്റൽ പതിപ്പിലേക്കുള്ള കണ്ണിയും
പുസ്തകത്തിൻ്റെ മെറ്റാഡാറ്റയും ഡിജിറ്റൈസ് ചെയ്ത രേഖയിലേക്കുള്ള കണ്ണിയും താഴെ കൊടുത്തിരിക്കുന്നു.
- പേര്: പത്രമീമാംസ
- പ്രസിദ്ധീകരണ വർഷം: 1941
- അച്ചടി:The Mangalodayam Press, Thrissur
- താളുകളുടെ എണ്ണം: 107
- സ്കാൻ ലഭ്യമായ ഇടം: കണ്ണി