1901 -ൽ പ്രസിദ്ധീകരിച്ച, കുര്യാളച്ചേരി തൊമ്മാ കത്തനാർ എഴുതിയ റൊമ്മാ യാത്ര എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.
റൊമ്മാ യാത്ര എന്ന ഗ്രന്ഥം കുര്യാളച്ചേരി തൊമ്മാ കത്തനാർ എഴുതിയതും മാന്നാനം വി. യൗസെപ്പു പിതാവിൻ്റെ ആശ്രമ അച്ചുകൂടത്തിൽ അച്ചടിച്ചതുമായ ഒരു യാത്രാവിവരണമാണ്. ചങ്ങനാശേരി മിഷൻ്റെ വികാരി അപ്പസ്തോലിക്കയായിരുന്ന മാർ മത്തായി മാക്കിൽ മെത്രാന് സമർപ്പിച്ചിരിക്കുന്ന ഈ പുസ്തകത്തിൻ്റെ പ്രധാന ലക്ഷ്യം റോമിലെ വിശേഷങ്ങളും കത്തോലിക്കാ തിരുസഭയെക്കുറിച്ചുള്ള വിവരങ്ങളും മലയാളി ക്രിസ്ത്യാനികൾക്ക് പരിചയപ്പെടുത്തുക എന്നതാണ്. മാന്നാനത്ത് മാർ അഫ്രേം സ്കൂളിൽ പഠിച്ചുകൊണ്ടിരുന്ന കാലത്ത് ഉപരിപഠനത്തിനായി റോമിലേക്ക് തിരിച ഗ്രന്ഥകർത്താവ് കോട്ടയം, തൃശൂർ വഴി ബോംബെയിലെത്തുകയും അവിടെ നിന്ന് കപ്പൽ മാർഗ്ഗം ഇറ്റലിയിലെ നേപ്പിൾസിൽ ഇറങ്ങി തുടർന്ന് തീവണ്ടി മാർഗ്ഗം റോമിൽ എത്തുകയും ചെയ്തു. റോമിലെ പ്രൊപ്പഗാണ്ഡ കോളേജിൽ പ്രവേശിച്ച് പഠനം നടത്തി പത്തു വർഷത്തോളം അവിടെ താമസിച്ച അദ്ദേഹം, തൻ്റെ താമസത്തിനിടയിൽ പതിമൂന്നാം ലിയോ മാർപാപ്പയെ നേരിട്ട് കാണാനും ആശീർവാദം വാങ്ങാനും അവസരം ലഭിച്ച വിവരങ്ങൾ ഇതിൽ പ്രതിപാദിക്കുന്നു.
കോട്ടയത്തു നിന്നുള്ള പോൾ മണലിൽ മാഷ് ആണ് ഈ പുസ്തകം ഡിജിറ്റൈസേഷനു വേണ്ടി നൽകിയത്.
മെറ്റാഡാറ്റയും ഡിജിറ്റൽ പതിപ്പിലേക്കുള്ള കണ്ണിയും
പുസ്തകത്തിൻ്റെ മെറ്റാഡാറ്റയും ഡിജിറ്റൈസ് ചെയ്ത രേഖയിലേക്കുള്ള കണ്ണിയും താഴെ കൊടുത്തിരിക്കുന്നു.
- പേര്: റൊമ്മാ യാത്ര – കുര്യാളച്ചേരി തൊമ്മാ കത്തനാർ
- പ്രസിദ്ധീകരണ വർഷം: 1901
- അച്ചടി: ആശ്രമം അച്ചുകൂടം, മാന്നാനം
- താളുകളുടെ എണ്ണം: 200
- സ്കാൻ ലഭ്യമായ ഇടം: കണ്ണി