1904-ൽ പ്രസിദ്ധീകരിച്ച, ശ്രീകണ്ഠേശ്വരം ജി. പത്മനാഭപിള്ള എഴുതിയ സുന്ദൊപസുന്ദ യുദ്ധം എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂൂടെ പങ്കു വെക്കുന്നത്
ശബ്ദതാരാവലിയെന്ന ബൃഹദ്നിഘണ്ടുവിന്റെ രചനയിലൂടെ പ്രശസ്തനായ എഴുത്തുകാരനാണ് ശ്രീകണ്ഠേശ്വരം ജി. പത്മനാഭപിള്ള. അറുപതോളം കൃതികളുടെ കർത്താവായ ശ്രീകണ്ഠേശ്വരം രചിച്ച ആട്ടക്കഥയാണ് സുന്ദൊപസുന്ദ യുദ്ധം. നികുംഭൻ്റെ മക്കളായ സുന്ദനും ഉപസുന്ദനും ബ്രഹ്മാവിനെ തപസ്സു ചെയ്ത് അമരത്വം അപേക്ഷിച്ചെങ്കിലും അദ്ദേഹം അതു നൽകിയില്ല. എന്നാൽ മറ്റാരുടെയും കൈകൊണ്ട് കൊല്ലപ്പെടരുതെന്നും മരിക്കുകയാണെങ്കിൽ പരസ്പരയുദ്ധത്തിലൂടെ ആയിരിക്കണമെന്നും അവർ വരം നേടി. അതിനുശേഷം അഹങ്കാരികളായി ഭൂമിയിലെ സാത്വികരായ മനുഷ്യരെ ദ്രോഹിക്കാൻ തുടങ്ങിയെന്നാണ് മഹാഭാരതം ആദിപർവത്തിൽ നൽകിയിട്ടുള്ള കഥ
കഥകളിയുടെ സ്വഭാവമനുസരിച്ച് കഥയിൽ മാറ്റം വരുത്തിയാണ് ശ്രീകണ്ഠേശ്വരം ആട്ടക്കഥ നിർമ്മിച്ചിട്ടുള്ളത്. ഇന്ദ്രനും ദേവസുന്ദരിമാരായ മേനക-രംഭമാരുമായുള്ള ശൃംഗാരം. ഭൂമിയിൽ സുന്ദോപസുന്ദന്മാരുടെ ഉപദ്രവത്തെപ്പറ്റിയുള്ള നാരദൻ്റെ പരാതി. മേനകയുടെ അപഹരണം എന്നിവ ആട്ടക്കഥയിൽ നാടകീയതക്കായി സന്നിവേശിപ്പിച്ചിട്ടുണ്ട്. നാരദൻ്റെ അപേക്ഷപ്രകാരം ബ്രഹ്മാവ് വിശ്വകർമ്മാവിനെ വിളിക്കുകയും ലോകത്തിലെ സുന്ദരവസ്തുക്കളുടെ കണികകൾ ചേർത്ത് അതിസുന്ദരിയായ തിലോത്തമയെ സൃഷ്ടിക്കാനാവശ്യപ്പെടുകയും ചെയ്യുന്നു. തിലോത്തമ സുന്ദോപസുന്ദന്മാരുടെ അടുക്കൽ ചെന്ന് കാമാർത്തരായ സഹോദരന്മാരെ രണ്ടു പേരെയും വിവാഹം ചെയ്യാൻ കഴിയില്ലെന്നും ബലവാനായ ഒരാളെ താൻ വിവാഹം ചെയ്യാമെന്ന് അഭിപ്രായപ്പെടുകയും ചെയ്തതിൻ്റെ പശ്ചാത്തലത്തിൽ സഹോദരന്മാർ പരസ്പരം മറന്ന് യുദ്ധം ചെയ്യുകയും നശിക്കുകയും ചെയ്യുന്നു. അങ്ങനെ ലോകത്തെ രക്ഷിച്ച തിലോത്തമയെ ബ്രഹ്മാവിൻ്റെ സവിധത്തിൽ ദേവന്മാർ അഭിനന്ദിക്കുന്നതൊടെയാണ് കൃതി അവസാനിക്കുന്നത്. ഐകമത്യം കൊണ്ടാർക്കും അഖിലം ജയിക്കാമെന്നാണ് സുന്ദോപസുന്ദന്മാരുടെ വൃത്താന്തം വ്യക്തമാക്കുന്നതെന്നും ആപത്തിനൊരാസ്പദം അബലമാർ തന്നെയെന്നും ഉള്ള ഉപദേശപാഠം അവസാനം രചയിതാവ് നൽകുന്നു. ശ്രീകണ്ഠേശ്വരവാസിയെന്ന ആട്ടക്കഥയിൽ ശിവനെ അനുസ്മരിക്കുകയും ഭജിക്കുകയും ഗ്രന്ഥകർത്താവ് ചെയ്യുന്നുണ്ട്. കൃതി അരങ്ങേറിയതിനു പ്രത്യേകം തെളിവൊന്നും ഇല്ല.
അച്ചുത്ശങ്കർ നായരുടെ ശേഖരത്തിൽ നിന്നാണ് ഈ പുസ്തകം ഡിജിറ്റൈസേഷനു ലഭ്യമായത്.
മെറ്റാഡാറ്റയും ഡിജിറ്റൽ പതിപ്പിലേക്കുള്ള കണ്ണിയും
താഴെ പുസ്തകത്തിന്റെ മെറ്റാഡാറ്റയും ഡിജിറ്റൈസ് ചെയ്ത രേഖയിലേക്കുള്ള കണ്ണിയും കൊടുത്തിരിക്കുന്നു. (സ്കാൻ ഓൺലൈനായി വായിക്കാനുള്ള സൗകര്യം ഒരുക്കിയിട്ടുണ്ട്.)
- പേര്: സുന്ദൊപസുന്ദ യുദ്ധം
- രചയിതാവ്: Sreekanteswaram G. Padmanabha Pillai
- പ്രസിദ്ധീകരണ വർഷം: 1904
- താളുകളുടെ എണ്ണം: 36
- അച്ചടി: Aksharalankaram Press, Kaithamukk, Thiruvananthapuram
- സ്കാൻ ലഭ്യമായ ഇടം: കണ്ണി