Release notes

2,924 release notes

1928-ൽ പ്രസിദ്ധീകരിച്ച, എ.കെ. ശാസ്ത്രി വിവർത്തനം ചെയ്ത കാളിദാസനും ഭവഭൂതിയും എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്

ദ്വിജേന്ദ്രലാൽ റായി എന്ന ബംഗാളി നിരൂപകൻ ബംഗാളി ഭാഷയിൽ എഴുതിയ നിരൂപണത്തെ ഹിന്ദി ഭാഷയിലേക്ക് പരിഭാഷപ്പെടുത്തിയതിൻ്റെ മലയാളവിവർത്തനമാണ് ഈ പുസ്തകം. നാടകകൃത്തും സംഗീതജ്ഞനും സാമൂഹികപരിഷ്കർത്താവും കൂടി ആയിരുന്നു ദ്വിജേന്ദ്രലാൽ റായി(1863-1913). റായി ബംഗാളിലെ കർഷകസമരത്തിൽ കർഷകർക്കൊപ്പം നിൽക്കുകയും സ്ത്രീവിദ്യാഭ്യാസത്തെ പ്രോത്സാഹിപ്പിക്കുകയും മതത്തിലെ വരേണ്യവിഭാഗത്തിൻ്റെ മേൽക്കോയ്മയെ രൂക്ഷമായി വിമർശിക്കുകയും ചെയ്ത വ്യക്തിയാണ്.

കാളിദാസൻ എഴുതിയ അഭിജ്ഞാനശാകുന്തളം, ഭവഭൂതി എഴുതിയ ഉത്തരരാമചരിതം എന്നീ നാടകങ്ങളുടെ താരതമ്യ നിരൂപണമാണ് ഈ പുസ്തകത്തിലെ വിഷയം. രണ്ടു കൃതികളുടെയും ഗുണങ്ങൾ മാത്രമല്ല, കാവ്യപരമായ അനൗചിത്യങ്ങളും നിരൂപകൻ ചൂണ്ടിക്കാട്ടിയിട്ടുണ്ട്. ഏഴ് പരിച്ഛേദങ്ങളും(അധ്യായങ്ങൾ) അനുബന്ധവും ശുദ്ധിപത്രവും ആണ് പുസ്തകത്തിലുള്ളത്

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

1952-ൽ പ്രസിദ്ധീകരിച്ച, പി.കെ. നാരായണപിള്ള എഴുതിയ നീതിശതകം എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

ഈ കൃതി ഇന്ത്യൻ നൈതിക സാഹിത്യപരമ്പരയുമായി ബന്ധപ്പെട്ടു നിൽക്കുന്നു. സംസ്കൃത കവിയായ ഭർത്തൃഹരി രചിച്ച നീതിശതകം എന്ന കൃതിയുടെ വ്യാഖ്യാനസഹിതമായ കൃതിയാണിത്. “ശതകം” എന്നത് സാധാരണയായി നൂറ് പദ്യങ്ങളടങ്ങിയ കാവ്യം എന്നർത്ഥത്തിലാണ് ഉപയോഗിക്കുന്നത്. “നീതിശതകം” എന്ന പേര് തന്നെ ഈ കൃതിയുടെ ലക്ഷ്യം വ്യക്തമാക്കുന്നു — മനുഷ്യജീവിതത്തിൽ പാലിക്കേണ്ട നീതി, ധാർമ്മികത, സദാചാരം എന്നിവയെ കുറിച്ചുള്ള ഉപദേശങ്ങൾ പദ്യങ്ങളിലൂടെ അവതരിപ്പിക്കുകയാണ് ഇതിന്റെ ഉദ്ദേശ്യം. ഈ കൃതിയിലെ പദ്യങ്ങൾ സത്യവും സദാചാരവും, ദാനവും കരുണയും പോലുള്ള നല്ല ഗുണങ്ങൾ, ദുഷ്പ്രവൃത്തികളുടെ ദോഷഫലങ്ങൾ, നല്ല സുഹൃത്തുക്കളുടെ പ്രാധാന്യം, വിനയം, ക്ഷമ, ആത്മനിയന്ത്രണം തുടങ്ങി മനുഷ്യജീവിതത്തിന് മാർഗ്ഗദർശകങ്ങളായ ചില പ്രധാന മൂല്യങ്ങളെ ചർച്ച ചെയ്യുന്നു.

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

1972 ൽ  പുറത്തിറക്കിയ Kalabhavan Souvenir സ്മരണികയുടെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

കേരളത്തിലെ പ്രമുഖ കലാസംഘടനയായ കലാഭവൻ 1969-ൽ കൊച്ചിയിൽ സ്ഥാപിതമായി. കലാപ്രതിഭകൾക്ക് പരിശീലനവും വേദിയും നൽകുക എന്ന ലക്ഷ്യത്തോടെ Abel Edathuruthy (ഫാ. ആബേൽ) ആണ് കലാഭവൻ സ്ഥാപിച്ചത്. കലാഭവൻ്റെ സ്റ്റേജ് പ്രോഗ്രാമുകൾക്കും സംഗീതപരിപാടികൾക്കും 1960–70 കാലഘട്ടത്തിൽ കേരളത്തിൽ വലിയ സ്വീകാര്യത ലഭിച്ചു. സംഗീതം, നാടകം, നൃത്തം എന്നിവയിൽ നിരവധി കലാകാരന്മാരെ വളർത്തി. പിന്നീട് “കലാഭവൻ” എന്ന പേര് തന്നെ നിരവധി കലാകാരന്മാരുടെ പേരിനൊപ്പം ചേർന്ന് പ്രശസ്തമായി.

എഡിറ്റോറിയൽ, സെക്രട്ടറിയുടെ റിപ്പോർട്ട്, ബോർഡ് അംഗങ്ങളുടേ വിവരങ്ങൾ, കല, സാഹിത്യം, സംഗീതം എന്നിവ സംബന്ധിച്ച പ്രമുഖരുടേ ലേഖനങ്ങൾ, കലാഭവൻ നടത്തിയ പരിപാടികളുടെ ചിത്രങ്ങൾ, പരസ്യങ്ങൾ എന്നിവയാണ് സ്മരണികയുടെ ഉള്ളടക്കം.

ബാംഗ്ലൂർ ധർമ്മാരാം കോളേജ് ലൈബ്രറിയിലെ ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

Through this post, we are releasing the digital scan of Kerala : Schools At A Glance (1965-66), published in the year 1966.

To understand the extent of educational facilities and the needs of the future, the State Education Department prepared maps explaining the distribution of schools in Kerala. Based on the statistics of the 1965–66 academic year, this book presents a survey of primary schools in Kerala. The book includes maps of educational sub-districts, in which Lower Primary (LP) and Upper Primary (UP) schools are marked separately. This book was prepared by the Kerala Education Department as part of the Third Five-Year Plan.

These documents are digitized as part of the Kottayam Public Library Digitization Project. 

1968 – ൽ പ്രസിദ്ധീകരിച്ച, എസ്.എൻ. അഗർവാൾ രചിച്ച ജനസംഖ്യ എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

ഇന്ത്യയിലെ ജനസംഖ്യയെ കുറിച്ചുള്ള വിശദമായ പഠനമാണ് ഈ പുസ്തകത്തിൽ ഉള്ളത്. ജനസംഖ്യാ വ്യതിയാനത്തിൻ്റെ കാരണങ്ങളും ഫലങ്ങളും ഇതിൽ വിവരിക്കുന്നു. ജനസംഖ്യാ സിദ്ധാന്തങ്ങളിൽ ആരംഭിക്കുന്ന ഗ്രന്ഥം ജനസംഖ്യയുമായി ബന്ധപ്പെടുന്ന വിവിധ വിഷയങ്ങളിലേക്ക് കടന്നു ചെല്ലുന്നു. ജനസംഖ്യാ വ്യതിയാനം ഭാവിയിൽ സൃഷ്ടിച്ചേക്കാവുന്ന സാഹചര്യങ്ങളെക്കുറിച്ചും ഇതിൽ പ്രതിപാദിക്കുന്നു.

കോട്ടയം പബ്ലിക്ക് ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

1950-ൽ പ്രസിദ്ധീകരിച്ച മലയാളത്തിലെ ശ്രദ്ധേയനായ ഗദ്യകാരനും ആദ്യകാല ഫോക് ലോർ പണ്ഡിതനുമായ ഡോ. ചേലനാട്ട് അച്യുതമേനോൻ എഴുതിയ പ്രദക്ഷിണം എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

പ്രധാനമായും മലയാളസാഹിത്യത്തിലെ വിവിധ പ്രവണതകളെയും കൃതികളെയും വിശകലനം ചെയ്യുന്ന ഉപന്യാസങ്ങളുടെ സമാഹാരമാണിത്. 1950-കളിൽ മലയാളസാഹിത്യം എങ്ങനെ വളർന്നു എന്ന് മനസ്സിലാക്കാൻ ഈ പുസ്തകം സഹായിക്കുന്നു. സാഹിത്യ വിമർശന രംഗത്ത് പുതിയൊരു ശൈലി ഈ കൃതി മുന്നോട്ട് വെക്കുന്നു.

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

1930 – ൽ പ്രസിദ്ധീകരിച്ച രാമായണം പ്രബന്ധം - ലഖുവ്യാഖ്യാനസഹിതം എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു  വെക്കുന്നത്.

ഈ പുസ്തകം രാമായണ കഥയെ ആസ്പദമാക്കി തയ്യാറാക്കിയ ഒരു പ്രബന്ധമാണ്. വായനക്കാർക്ക് എളുപ്പത്തിൽ മനസ്സിലാക്കാൻ സാധിക്കുന്ന വിധത്തിൽ ലഘുവായ വ്യാഖ്യാനത്തോടു കൂടിയാണ് ഈ പ്രബന്ധം എഴുതിയിരിക്കുന്നത്.

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

1930 – ൽ പ്രസിദ്ധീകരിച്ച, പി.കെ. നാരായണപിള്ള രചിച്ച പ്രസംഗതരംഗിണി തൃതീയഭാഗം എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

മൂന്നു ഭാഷാകവികൾ, ഉണ്ണുനീലി സന്ദേശം, സാഹിത്യസ്ഫുരിതമായ വിജയനഗരചരിതം, ശ്രീമാൻ കുമാരനാശാനവർകൾ, ഉണ്ണായി വാര്യർ, ശ്രീനീലകണ്ഠതീർത്ഥപാദസ്വാമിയുടെ ജീവചരിത്രം എന്നീ അധ്യായങ്ങളിലായി എഴുതിയിട്ടുള്ള സാഹിത്യ നിരൂപണങ്ങളാണ് പുസ്തകത്തിൻ്റെ ഉള്ളടക്കം.

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

1930 – ൽ പ്രസിദ്ധീകരിച്ച, ദേവീദാസൻ എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

ചേലന്നാട്ട് അച്യുതമേനോൻ്റെ അടുത്ത സുഹൃത്ത് എഴുതിയ സ്വന്തം ജീവിതകഥയാണ് ഈ പുസ്തകത്തിന് ആധാരമായിട്ടുള്ളത്. സുഹൃത്തിൻ്റെ സ്വകാര്യത സംരക്ഷിക്കുന്നതിനായി അദ്ദേഹത്തിൻ്റെ പേര് വെളിപ്പെടുത്താതെ 'ദേവീദാസൻ' എന്ന കൃത്രിമ നാമധേയമാണ് നായകനും പുസ്തകത്തിനും നൽകിയിരിക്കുന്നത്.

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

1927– ൽ പ്രസിദ്ധീകരിച്ച, കോങ്ങോട്ട് കൃഷ്ണൻ നായർ രചിച്ച ശ്രീദേവീഹരണം എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

കേരളത്തിലെ പ്രബല രാജവംശങ്ങളായ കോലസ്വരൂപവും (കോലത്തിരി) നെടിയിരുപ്പ് സ്വരൂപവും (സാമൂതിരി) തമ്മിലുള്ള ബന്ധത്തെയും, അതിലൂടെ നീലേശ്വരം രാജവംശം രൂപംകൊണ്ടതിനേയും അടിസ്ഥാനമാക്കിയാണ് ഈ നാടകം രചിച്ചിരിക്കുന്നത്. കോലത്തിരി രാജവംശത്തിലെ ഒരു തമ്പുരാട്ടിയും സാമൂതിരി രാജവംശത്തിലെ ഒരു തമ്പുരാനും തമ്മിലുണ്ടായ പ്രണയവും തുടർന്നുണ്ടായ സംഭവവികാസങ്ങളുമാണ് ഇതിലെ കേന്ദ്രബിന്ദു. വെറുമൊരു പ്രണയകഥ എന്നതിലുപരി, മലബാറിലെ രണ്ട് വലിയ സ്വരൂപങ്ങൾ തമ്മിലുള്ള രാഷ്ട്രീയവും കുടുംബപരവുമായ ഇഴയടുപ്പങ്ങളെയും പിണക്കങ്ങളെയും തന്മയത്വത്തോടെ ചിത്രീകരിക്കുന്ന ഒരു ചരിത്ര കൃതിയാണിത്. നാടകത്തിൽ കോലത്തിരി, സാമൂതിരി, ചെറുശ്ശേരി നമ്പൂതിരി തുടങ്ങിയ ചരിത്രപ്രസിദ്ധമായ വ്യക്തിത്വങ്ങളെ കഥാപാത്രങ്ങളായി അവതരിപ്പിച്ചിരിക്കുന്നു.

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

1929 – ൽ പ്രസിദ്ധീകരിച്ച, ഉള്ളൂർ എസ്. പരമേശ്വരയ്യർ രചിച്ച പിങ്ഗള എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

മലയാള സാഹിത്യത്തിൽ ദാർശനികതയും ജീവിതബോധവും ചേർന്ന ചില കവിതകൾക്ക് പ്രത്യേക സ്ഥാനമുണ്ട്. അത്തരത്തിലുള്ള ഒരു ശ്രദ്ധേയ കവിതയാണ് “പിങ്ഗള” (1929). മനുഷ്യജീവിതത്തിലെ ആശ, നിരാശ, ആത്മബോധം എന്നീ ഘട്ടങ്ങളെ വളരെ മനോഹരമായി അവതരിപ്പിക്കുന്ന കവിതയാണ് ഇത്.

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

1953-ൽ പ്രസിദ്ധീകരിച്ച അനന്തപുരവർണ്ണനം എന്ന മണിപ്രവാളകൃതിയുടെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്

പതിനാലാം നൂറ്റാണ്ടിൻ്റെ ആരംഭത്തിലാണ് ഈ കൃതി രചിക്കപ്പെട്ടതെന്നു കരുതുന്നു. എഴുതിയത് ആരാണെന്ന് വ്യക്തമല്ല. പേരിൽ നിന്നു മനസ്സിലാക്കാവുന്നതുപോലെ തിരുവനന്തപുരം നഗരത്തെക്കുറിച്ചുള്ള വർണ്ണനമാണ് ഇതിൻ്റെ വിഷയം. മലയാളത്തിലെ ആദ്യത്തെ റിയലിസ്റ്റിക് കാവ്യം (യഥാർത്ഥ്യബോധമുള്ള കൃതി) എന്ന് വിശേഷിപ്പിക്കപ്പെടുന്ന ഈ കൃതിയിൽ, അന്നത്തെ തിരുവനന്തപുരം നഗരം, ശ്രീ പത്മനാഭസ്വാമി ക്ഷേത്രം, തീർത്ഥങ്ങൾ, അങ്ങാടികൾ, അവിടത്തെ സാമൂഹിക ജീവിതം, ആചാരങ്ങൾ എന്നിവ വർണ്ണിക്കുന്നു. 186 പദ്യങ്ങൾ ആണ് പുസ്തകത്തിൽ ഉള്ളത്. കവിതയുടെ തുടക്കത്തിൽ കവി, വിഷ്ണുവിൻ്റെ ദശാവതാരത്തെ സ്തുതിക്കുകയും പതിയെ പത്മനാഭസ്വാമി ക്ഷേത്ര പരിസരത്തെ തീർത്ഥങ്ങൾ, നടക്കാവ് എന്നിങ്ങനെ വർണ്ണിച്ചുപോവുകയും ചെയ്യുന്നു. വാണിജ്യവസ്തുക്കൾ വിൽക്കുന്ന അങ്ങാടി എന്നത് ഇപ്പോഴത്തെ ചാല മാർക്കറ്റ് ആയിരിക്കാം. തിരുവനന്തപുരം അന്ന് രാജധാനിയായിട്ടില്ല. ശ്രീപദ്‌മനാഭസ്വാമിക്ഷേത്രം, വലിയശാലക്ഷേത്രം, ശ്രീകണ്ഠേശ്വരംക്ഷേത്രം തുടങ്ങിയ ദേവാലയങ്ങളും കാന്തളൂർശാല എന്ന വിദ്യാപീഠവും കൊണ്ടുള്ള പ്രസിദ്ധിയാണ് അതിനുണ്ടായിരുന്നത്.

സ്ഥലവർണന എന്ന നിലയ്ക്കു മാത്രമല്ല, ഈ കൃതി അക്കാലത്തെ ഭാഷയുടെയും സാഹിത്യത്തിന്റെയും സ്വഭാവം അറിയാൻ സഹായിക്കുന്ന ഒരു മാതൃക എന്ന നിലയ്ക്കും ശ്രദ്ധാർഹമാണ്. ഇന്ന് പ്രചാരത്തിലില്ലാത്ത പല വാക്കുകളും കവിതയിൽ കാണാം. ഈ കൃതിയുടെ രചയിതാവിനെക്കുറിച്ച് അറിവൊന്നുമില്ലെങ്കിലും മയാശ്രുതം എന്നുംമറ്റും പറയുന്നതിൽനിന്ന് കവി തിരുവനന്തപുരത്തുകാരനല്ലെന്നും ദുസ്സ്, മുസ്രോളിപ്പ്(മൂത്രമൊഴിപ്പ്) മുതലായ വാക്കുകൾ പ്രയോഗിച്ചിരിക്കുന്നതിൽനിന്ന് ഒരു നമ്പൂതിരിയാണെന്നും മനസ്സിലാക്കാം എന്നാണ് കേരള സാഹിത്യചരിത്രത്തിൽ ഉള്ളൂർ അഭിപ്രായപ്പെട്ടിട്ടുള്ളത്.

തിരുവനന്തപുരം മാനുസ്ക്രിപ്റ്റ് ലൈബ്രറി ഭാഷാത്രൈമാസികം പരമ്പരയിൽ പ്രസിദ്ധീകരിച്ചതാണ് ഈ പുസ്തകം

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.