Release notes

2,924 release notes

1931-ൽ പ്രസിദ്ധീകരിച്ച, ശേഷുശാസ്ത്രി എഴുതിയ ശ്രീ പുരുഷസൂക്താദി മന്ത്രരത്നാർത്ഥപ്രകാശികാ എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്

സന്ധ്യാവന്ദനം, സമിദാധാനം, ഔപാസനം ഇങ്ങനെ ബ്രാഹ്മണർ പ്രയോഗിക്കുന്ന നിത്യകർമ്മങ്ങളെക്കുറിച്ചും അവയെ സംബന്ധിച്ച മന്ത്രങ്ങളെക്കുറിച്ചും പ്രതിപാദിക്കുന്ന പുസ്തകമാണ് ഇത്. കർമ്മങ്ങൾ അനുഷ്ഠിക്കേണ്ടുന്ന ക്രമവും മന്ത്രങ്ങളുടെ അർത്ഥവും സംസ്കൃതത്തിലും അതിൻ്റെ അർത്ഥം മലയാളത്തിലുമായി പുസ്തകത്തിൽ കൊടുത്തിരിക്കുന്നു. മന്ത്രം, ഉപനിഷത്ത് എന്നിവയിൽ ഉപനിഷത്തിനാണ് പ്രാധാന്യമെന്നും അതിൽത്തന്നെ ഉപനിഷത്തിൽ പുരുഷസൂക്തത്തിനാണ് പ്രാധാന്യമെന്നും കൂർമ്മപുരാണത്തിൽ പറഞ്ഞിരിക്കുന്നു. ദിവസേന മൂന്നു പ്രാവശ്യം പുരുഷസൂക്തം ജപം ചെയ്യുന്ന ബ്രാഹ്മണന് എല്ലാ ദൈവങ്ങളെയും പൂജിച്ചതായ ഫലം ലഭിക്കുന്നു എന്നുമുണ്ട്

ശേഷുശാസ്ത്രികളെക്കുറിച്ചുള്ള കൂടുതൽ വിവരങ്ങൾ ഒന്നും തന്നെ പൊതുവിടത്തിൽ ലഭ്യമല്ല. പാലക്കാട് ശേഖരിപുരമാണ് അദ്ദേഹത്തിൻ്റെ സ്ഥലം എന്ന് സൂചിപ്പിക്കുന്ന ടി.ആർ രാമചന്ദ്രയ്യരുടെ ഒരു കുറിപ്പ് പുസ്തകത്തിൻ്റെ തുടക്കത്തിൽ കൊടുത്തിട്ടുണ്ട്

മദ്രാസ് യൂണിവേഴ്സിറ്റി മലയാളവിഭാഗത്തിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്.

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

1948-ൽ പ്രസിദ്ധീകരിച്ച, Madanaketucarita എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്

പതിനെട്ടാം നൂറ്റാണ്ടിൽ കേരളത്തിൽ ജീവിച്ചിരുന്ന പ്രശസ്ത കവിയായ രാമപാണിവാദൻ രചിച്ച സംസ്കൃത പ്രഹസനമാണ് 'മദനകേതുചരിതം'. രണ്ട് രംഗങ്ങളിലായി അവതരിപ്പിച്ചിരിക്കുന്ന ഈ കൃതി ഹാസ്യത്തിനും പരിഹാസത്തിനും പ്രാധാന്യം നൽകുന്നു. കുഞ്ചൻ നമ്പ്യാരും രാമപാണിവാദനും ഒരാൾ തന്നെയാണെന്ന് അഭിപ്രായമുണ്ട്. നാടകകൃത്ത് ഇതിനെ സ്വന്തം വിനോദത്തിനായി രചിച്ച ഒന്നായി വിശേഷിപ്പിക്കുന്നു. സിംഹളരാജാവായ മദനകേതുവാണ് ഈ നാടകത്തിലെ നായകൻ. എങ്കിലും കഥ പ്രധാനമായും വിഷ്ണുമിത്രൻ എന്ന ഒരു ഭിക്ഷുവിൻ്റെയും ശിവദാസൻ എന്ന കാപാലികൻ്റെയും ചുറ്റുമാണ് വികസിക്കുന്നത്. സംസ്കൃത പ്രഹസനമായ ഭഗവദ് ജുകവുമായി കുറെയേറെ സാമ്യങ്ങൾ ഈ കൃതിക്കുണ്ട്

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

1955 – ൽ പ്രസിദ്ധീകരിച്ച, പുറയന്നൂർ പരമേശ്വരൻ നമ്പൂതിരിപ്പാടു് രചിച്ച ശ്രീമഹാഭാഗവതം - ദശമം എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

ശ്രീമഹാഭാഗവതം പുരാണത്തിൻ്റെ ദശമസ്കന്ധത്തിൽ ശ്രീകൃഷ്ണഭഗവാൻ്റെ ലീലകൾ വര്‍ണ്ണിക്കുന്നു. വ്യാസൻ രചിച്ച സംസ്കൃത ഭാഗവതത്തിലെ ശ്രീകൃഷ്ണകഥകൾ  മലയാളത്തില്‍ പദ്യരൂപേണ രചിച്ചതാണ് ഈ ഗ്രന്ഥം. വളരെ വിശിഷ്ടമായ ഒരു പൗരാണിക സ്തോത്ര കൃതിയാണിത്.

കോട്ടയം പബ്ലിക്ക് ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

1950-ൽ പ്രസിദ്ധീകരിച്ച, കെ. ഗോദവർമ്മ എഴുതിയ കൈരളീദർപ്പണം എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്

ഭാഷാശാസ്ത്രജ്ഞനും സംസ്കൃതപണ്ഡിതനും അദ്ധ്യാപകനുമായ ഡോ.കെ ഗോദവർമ്മ രചിച്ച ആറ് ഗൗരവമേറിയ പ്രബന്ധങ്ങളാണ് ഈ പുസ്തകത്തിൽ ഉൾപ്പെടുത്തിയിരിക്കുന്നത്. കേരളത്തിലെ സ്ഥലനാമങ്ങൾ, ലീലാതിലകം ഒരു നിരീക്ഷണം, കഥകളിയിലെ പ്രാകൃതഭാഗങ്ങൾ, പൊരുളിൻ്റെ വിളയാട്ടം, ഒരു താമ്രശാസനം, സി.വി യുടെ പ്രതിഭാവിലാസം എന്നിവയാണ് പ്രബന്ധങ്ങൾ

കേരളത്തിലെ സ്ഥലനാമങ്ങൾക്കൊപ്പം വിദേശനാടുകളിലെയും ഇന്ത്യയിലെയും ദേശനാമങ്ങൾക്കു പിന്നിലെ കൗതുകകരമായ കാര്യങ്ങളാണ് ആദ്യ ലേഖനത്തിൽ അദ്ദേഹം അന്വേഷിക്കുന്നത്. അവയിലെ ഭാഷാപരമായ കാര്യങ്ങൾ ഇഴപിരിച്ചെടുക്കുകയും ചെയ്യുന്നു. മണിപ്രവാളമെന്ന പ്രസ്ഥാനത്തെക്കുറിച്ച് സംസ്കൃതത്തിലെഴുതിയ ആദ്യത്തെ ലക്ഷണശാസ്ത്രഗ്രന്ഥമായ ലീലാതിലകത്തിൻ്റെ വിശദമായ അവലോകനമാണ് രണ്ടാമത്തേത്. സംസ്കൃതസാഹിത്യത്തിൽ സ്ത്രീകളുടെയും കീഴാളകഥാപാത്രങ്ങളുടെയും സംഭാഷണമായി ചേർക്കുന്ന പ്രാകൃതം കഥകളി സാഹിത്യത്തിൽ എവിടെയെല്ലാമുണ്ടെന്ന് അന്വേഷിക്കുകയാണ് കഥകളിയിലെ പ്രാകൃതഭാഗങ്ങൾ എന്ന ലേഖനത്തിൽ. ഇതിലൂടെ പ്രാകൃതത്തിനും സാഹിത്യത്തിൽ ഒരു സ്ഥാനമുണ്ടെന്ന് ഉറപ്പിക്കുകയാണ് ഗ്രന്ഥകാരൻ. പൊരുളിൻ്റെ വിളയാട്ടം വാക്കുകളുടെ അർത്ഥോത്പത്തിയെക്കുറിച്ചുള്ള ചർച്ചയാണ്. മറ്റു ഭാഷകളിലെ സമാനപദങ്ങളെപ്പറ്റിയും അദ്ദേഹമവിടെ ആലോചിക്കുന്നുണ്ട്. കേരളത്തിൻ്റെ പുരാതന ചരിത്രത്തിലെ വിലപിടിച്ച രേഖയായ ''ശ്രീവീരരാഘവപ്പട്ടയ''ത്തെക്കുറിച്ചുള്ള ലേഖനമാണ് ഒരു താമ്രശാസനം. സി.വി രാമൻ പിള്ളയുടെ ശ്രേഷ്ഠതക്കു കാരണം അദ്ദേഹത്തിൻ്റെ അസാമാന്യമായ പ്രതിഭാവിശേഷമായിരുന്നു എന്നു വ്യക്തമാക്കുന്ന ലേഖനമാണ് സി.വി യുടെ പ്രതിഭാവിലാസം

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

1911 – ൽ പ്രസിദ്ധീകരിച്ച, കലക്കത്ത് കുഞ്ചൻ നമ്പ്യാർ രചിച്ച തുള്ളൽകഥകൾ രണ്ടാം ഭാഗം എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

ഭാഷാകവികളിൽ പ്രഥമസ്ഥാനത്തെ അർഹിക്കുന്ന കലക്കത്ത് കുഞ്ചൻ നമ്പ്യാരുടെ ഇരുപത്തിയാറ് തുള്ളൽകഥകൾ കഥകൾ ആണ് ഈ പുസ്തകത്തിൽ ഉൾപ്പെടുത്തിയിട്ടുള്ളത്. തുള്ളൽ പ്രസ്ഥാനത്തിൻ്റെ ഉപജ്ഞാതാവായ നമ്പ്യാരുടെ രചനകൾ ആദ്യകാലത്ത് അച്ചടി രൂപത്തിൽ ക്രോഡീകരിക്കപ്പെട്ടിരുന്നു. പത്തൊൻപതാം നൂറ്റാണ്ടിൻ്റെ അവസാനത്തിലും ഇരുപതാം നൂറ്റാണ്ടിൻ്റെ തുടക്കത്തിലും മലയാളത്തിലെ പുരാതന കാവ്യങ്ങൾ വീണ്ടെടുക്കാനും സംരക്ഷിക്കാനുമുള്ള ശ്രമങ്ങൾ നടന്നിരുന്നു. 1911 കാലഘട്ടത്തിൽ ഇറങ്ങിയ ഇത്തരം പതിപ്പുകൾ ഓലമേയപ്പെട്ട കൈയെഴുത്തുപ്രതികളിൽ നിന്ന് അച്ചടി മാധ്യമത്തിലേക്കുള്ള തുള്ളൽ കലയുടെ പരിവർത്തനത്തെ അടയാളപ്പെടുത്തുന്നു.​ കുഞ്ചൻനമ്പ്യാരുടെ  അറുപതിലധികം വരുന്ന തുള്ളൽ കൃതികളെ വിവിധ ഭാഗങ്ങളായി തിരിച്ചാണ് അക്കാലത്ത് പ്രസിദ്ധീകരിച്ചിരുന്നത്. മഹാഭാരതത്തിലെ പാണ്ഡവരുടെ സഭാപ്രവേശനവും അനുബന്ധ സംഭവങ്ങളുമാണ്​ സഭാപ്രവേശം തുള്ളൽ കഥയിലൂടെ പറയുന്നത്.​കിരാതം കഥയിലാകട്ടെ അർജുനൻ പാശുപതാസ്ത്രത്തിനായി തപസ്സുചെയ്യുന്നതും ശിവൻ കിരാത വേഷത്തിൽ വരുന്നതും ആവിഷ്ക്കരിചിരിക്കുന്നു.​ രുഗ്മിണീസ്വയംവരത്തിലൂടെ ഭാഗവതത്തിലെ ശ്രീകൃഷ്ണ-രുഗ്മിണി വിവാഹ കഥയും, ​പ്രദ്യുമ്നവിജയം കഥയിൽ കാമദേവൻ്റെ പുനർജന്മവും ശംബരാസുര വധവും പരിചയപ്പെടുത്തുന്നു. ദേവന്മാരെയും പുരാണ കഥാപാത്രങ്ങളെയും സാധാരണ മനുഷ്യരായി ചിത്രീകരിച്ച് പരിഹസിക്കുന്നു. കേരളീയ ദുരാചാരങ്ങളെയും വരേണ്യവർഗത്തെയും നർമ്മത്തിലൂടെ വിമർശിക്കുകയും ചൈയ്യുന്നു. ആട്ടക്കഥകൾക്കൊപ്പം ശീതങ്കൻ തുള്ളൽ,പറയൻ തുള്ളൽ എന്നീ വിഭാഗത്തിൽപ്പെടുന്ന തുള്ളലുകളും ഈ പുസ്തകത്തിൽ കാണുവാൻ സാധിക്കുന്നു.

കൊല്ലത്തു നിന്നുള്ള കണ്ണൻ ഷണ്മുഖം മാഷ് ആണ് ഈ പുസ്തകം ഡിജിറ്റൈസേഷനു വേണ്ടി നൽകിയത്.

1918– ൽ പ്രസിദ്ധീകരിച്ച, 'കടാങ്കോട്ട് മാക്കം' എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

'കടാങ്കോട്ട് മാക്കം കിളിപ്പാട്ട്' എന്നത് വടക്കൻ മലബാറിലെ പ്രശസ്തമായ 'മാക്കം തെയ്യത്തിൻ്റെ' ഐതിഹ്യത്തെ അടിസ്ഥാനമാക്കി കിളിപ്പാട്ട് വൃത്തത്തിൽ രചിക്കപ്പെട്ട ഒരു കൃതിയാണ്. തെയ്യം തോറ്റം പാട്ടുകളിലെ ഭാഷാപരമായ പ്രയാസങ്ങൾ ഒഴിവാക്കി വായനക്കാർക്ക് എളുപ്പത്തിൽ മനസ്സിലാക്കാവുന്ന രീതിയിലാണ് പുനരാവിഷ്ക്കരിച്ചിരിക്കുന്നത്. പന്ത്രണ്ട് സഹോദരന്മാരുടെ പ്രിയപ്പെട്ട സഹോദരിയായ മാക്കത്തിൻ്റെ മരുമക്കത്തായ കാലത്തെ സംഘർഷങ്ങളും, അസൂയ മൂത്ത നാത്തൂന്മാരുടെ ചതിയിൽപ്പെട്ട് നിരപരാതിയായ മാക്കം തെയ്യമായി മാറുന്നതുമാണ് കഥ.

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

1914 – ൽ പ്രസിദ്ധീകരിച്ച, തേലപ്പുറത്തു നാരായണനമ്പി രചിച്ച യയാതിചരിതം എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

ഭാരതീയ പുരാണങ്ങളിലെ പ്രധാന കഥാപാത്രങ്ങളെ തികച്ചും നാടകീയമായി ആവിഷ്കരിക്കുകയാണ് ഈ കൃതിയിൽ നാരായണനമ്പി ചെയ്തിരിക്കുന്നത്. സുഖഭോഗങ്ങളോടുള്ള മനുഷ്യൻ്റെ അടങ്ങാത്ത തൃഷ്ണയെ പ്രതിനിധീകരിക്കുന്ന യയാതി മഹാരാജാവാണ് നാടകത്തിലെ കേന്ദ്രകഥാപാത്രം. തൻ്റെ വാർദ്ധക്യം മാറ്റി യൗവനം തിരികെ നേടാൻ മകനോട് ആവശ്യപ്പെടുന്നതിലൂടെ മനുഷ്യസഹജമായ മോഹങ്ങളെ ഇദ്ദേഹം വെളിപ്പെടുത്തുന്നു. അസുരഗുരുവായ ശുക്രാചാര്യരുടെ പുത്രി ദേവയാനിയും, അസുരരാജപുത്രിയായ ശർമ്മിഷ്ഠയുമാണ് നാടകത്തിലെ പ്രധാന സ്ത്രീരൂപങ്ങൾ. ഇവരുടെ പ്രണയവും കലഹവുമാണ് കഥയിലെ പ്രധാന സംഘർഷങ്ങൾ സൃഷ്ടിക്കുന്നത്. എന്നാൽ, പിതാവിൻ്റെ സന്തോഷത്തിനായി സ്വന്തം യൗവനം ബലിയർപ്പിക്കുന്ന പുരു എന്ന മകൻ ത്യാഗത്തിൻ്റെയും പിതൃഭക്തിയുടെയും ഉദാത്ത മാതൃകയായി മാറുന്നു. ഇവരെക്കൂടാതെ നാടകത്തിൻ്റെ ആരംഭത്തിൽ പ്രേക്ഷകരെ കഥാലോകത്തേക്ക് ആനയിക്കുന്ന സൂത്രധാരനും നടിയും ഹാസ്യരസത്തിലൂടെയും സംഭാഷണങ്ങളിലൂടെയും നാടകത്തിന് സവിശേഷമായൊരു മിഴിവ് നൽകുന്നു. ഭൗതിക സുഖങ്ങൾ ശാശ്വതമല്ലെന്ന സന്ദേശമാണ് ഈ കഥാപാത്രങ്ങളിലൂടെ നാടകകൃത്ത് പകർന്നു നൽകുന്നത്.

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

1917 – ൽ പ്രസിദ്ധീകരിച്ച, കടിയാകുളത്ത് ശുപ്പുമേനോൻ രചിച്ച കാവേരിമാഹാത്മ്യം എന്ന പുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

കാവേരിമാഹാത്മ്യം ഭാരതീയ പുരാണ സംസ്കാരത്തെയും കാവേരി നദിയുടെ പവിത്രതയെയും മലയാളിക്ക് പരിചയപ്പെടുത്തുന്ന ഒരു ഉത്തമ ഭക്തികാവ്യമാണ്. തുലാമാസത്തിൽ കാവേരി നദിയിൽ സ്നാനം ചെയ്യുന്നത് ഗംഗാസ്നാനത്തിന് തുല്യമോ അതിൽ കൂടുതലോ ഫലം നൽകുമെന്ന് ഗ്രന്ഥം സമർത്ഥിക്കുന്നു. ഹൈന്ദവ വിശ്വാസമനുസരിച്ച് പുണ്യനദികളിൽ സ്നാനം ചെയ്യുന്നത് മനുഷ്യരുടെ പാപങ്ങൾ കഴുകിക്കളയാനാണ്. എന്നാൽ, കോടിക്കണക്കിന് മനുഷ്യർ തങ്ങളുടെ പാപങ്ങൾ ഗംഗ, യമുന തുടങ്ങിയ നദികളിൽ കഴുകുമ്പോൾ ആ നദികൾക്കും അശുദ്ധി സംഭവിക്കുന്നു എന്ന് പറയപ്പെടുന്നു. ഈ പാപങ്ങളിൽ നിന്ന് മുക്തി നേടാനായി എല്ലാ തീർത്ഥങ്ങളും തുലാമാസത്തിൽ കാവേരി നദിയിലേക്ക് എത്തുന്നു. ലളിതമായ ശൈലിയിൽ രചിക്കപ്പെട്ട ഈ ഗ്രന്ഥം, ഭക്തിയോടെ കാവേരിയെ ആശ്രയിക്കുന്നവർക്ക് ഐശ്വര്യവും ദീർഘായുസ്സും മോക്ഷവും ലഭിക്കുമെന്ന് ഉറപ്പുനൽകുന്നു. സത്യവ്രതനായ ഹരിശ്ചന്ദ്ര രാജാവ് തന്റെ പാപങ്ങൾ തീർക്കാനും ആത്മശുദ്ധി വരുത്താനും വഴിതേടുമ്പോൾ, കുരുക്ഷേത്രത്തിൽ വെച്ച് നാരദൻ, അഗസ്ത്യൻ തുടങ്ങിയ മഹർഷിമാർ അദ്ദേഹത്തിന് കാവേരി സ്നാനത്തിൻ്റെ പ്രാധാന്യം ഉപദേശിച്ചുകൊടുക്കുന്നതാണ് ഇതിലെ പ്രധാന ഇതിവൃത്തം.

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

1962 ൽ പ്രസിദ്ധീകരിച്ച സാമൂഹ്യ പാഠങ്ങൾ – സ്റ്റാൻഡേർഡ് VIII എന്ന പാഠപുസ്തകത്തിൻ്റെ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

1962-ലെ എട്ടാം ക്ലാസ് സാമൂഹ്യപാഠം പാഠപുസ്തകം ലോകചരിത്രത്തിലെ വിപ്ലവാത്മകമായ മാറ്റങ്ങളെയും ഇന്ത്യൻ സ്വാതന്ത്ര്യസമരത്തിന്റെ നാഴികക്കല്ലുകളെയും ഭൂമിയുടെ ഭൗതിക ഘടനയെയും സംയോജിപ്പിച്ചു അവതരിപ്പിച്ച ഒരു സമഗ്ര പഠനസഹായിയായിരുന്നു. നവോത്ഥാനം, വ്യാവസായിക വിപ്ലവം തുടങ്ങിയ ചരിത്ര സംഭവങ്ങൾക്കൊപ്പം ഭൂഖണ്ഡങ്ങളുടെ സവിശേഷതകളും കാർഷിക-വ്യവസായ മേഖലകളുടെ വളർച്ചയും ലളിതമായ ഭാഷയിൽ ഈ പുസ്തകം പ്രതിപാദിച്ചു. ചരിത്രപരമായ അവബോധവും ഭൂമിശാസ്ത്രപരമായ അറിവും ഒരുപോലെ പകർന്നുനൽകിക്കൊണ്ട് വിദ്യാർത്ഥികളിൽ വിപുലമായ ഒരു സാമൂഹ്യബോധം വളർത്താൻ ഈ പാഠ്യപദ്ധതി ലക്ഷ്യമിട്ടിരുന്നു.

നമ്മുടെ പഴയപാഠപുസ്തകങ്ങൾ ഡിജിറ്റൈസ് ചെയ്യുന്ന പദ്ധതിയുടെ ഭാഗമായാണ് ഈ പുസ്തകം ഡിജിറ്റൈസ് ചെയ്ത് റിലീസ് ചെയ്യുന്നത്. ആ പദ്ധതിയെ പറ്റിയുള്ള പ്രാഥമികവിവരത്തിന് ഈ പോസ്റ്റ് കാണുക.

ഡൊമനിക്ക് നെടും‌പറമ്പിൽ ആണ് ഈ പുസ്തകം ഡിജിറ്റൈസേഷനായി ലഭ്യമാക്കിയത്.

1947-ൽ പ്രസിദ്ധീകരിച്ച, കെ. അപ്പുണ്ണി കൈമൾ രചിച്ച ഹൈസ്കൂൾ ഭൂമിശാസ്ത്രം - രണ്ടാം ഭാഗം - ഫോം V എന്ന പാഠപുസ്തകത്തിൻ്റെ ഡിജിറ്റൽ സ്കാനാണ് ഈ പോസ്റ്റിലൂടെ റിലീസ് ചെയ്യുന്നത്.

1947-ൽ പ്രസിദ്ധീകരിച്ച ഈ ഭൂമിശാസ്ത്ര പാഠപുസ്തകം, അറ്റ്‌ലാൻ്റിക് സമുദ്രത്തിലെ കാറ്റുകളെയും പ്രവാഹങ്ങളെയും കുറിച്ചുള്ള പഠനത്തിലൂടെ ആരംഭിച്ച് വടക്കേ അമേരിക്ക, തെക്കേ അമേരിക്ക എന്നീ ഭൂഖണ്ഡങ്ങളുടെ ഭൂപ്രകൃതിയും സാമ്പത്തിക വ്യവസ്ഥയും സമഗ്രമായി വിശകലനം ചെയ്യുന്നു. തെക്കേ അമേരിക്കയിലെ ബ്രസീൽ, അർജൻ്റീന തുടങ്ങിയ രാജ്യങ്ങളിലെ സസ്യവിതാനവും ജനജീവിതവും വിവരിക്കുന്നതോടൊപ്പം, വടക്കേ അമേരിക്കയിലെ ഐക്യനാടുകളിലെ വ്യവസായ വാണിജ്യ കേന്ദ്രങ്ങൾ, കൃഷിത്തോട്ടങ്ങൾ, റോക്കി പർവ്വതനിരകൾ എന്നിവയ്ക്ക് ഇതിൽ പ്രത്യേക ഊന്നൽ നൽകിയിട്ടുണ്ട്. കാനഡയിലെ പ്രെയറി പുൽമേടുകളെയും സെൻ്റ് ലോറൻസ് നദീതടത്തെയും കുറിച്ചും, മെക്സിക്കോ, മധ്യ അമേരിക്ക തുടങ്ങിയ പ്രദേശങ്ങളെക്കുറിച്ചും പ്രതിപാദിക്കുന്ന ഈ പുസ്തകം, ലോകത്തെ തമ്മിൽ ബന്ധിപ്പിക്കുന്ന വിവിധ ഗതാഗത മാർഗ്ഗങ്ങളെക്കുറിച്ചുള്ള വിവരണത്തോടെയാണ് അവസാനിക്കുന്നത്.

ഡൊമനിക്ക് നെടും‌പറമ്പിൽ ആണ് ഈ പുസ്തകം ഡിജിറ്റൈസേഷനായി ലഭ്യമാക്കിയത്.

1924-ൽ പ്രസിദ്ധീകരിച്ച, 'വിദ്യാപോഷിണി ഗ്രന്ഥാവലി - രണ്ടാം പുസ്തകം' എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

പുന്നശ്ശേരി ശ്രീ നീലകണ്ഠാചാര്യൻ്റെ ഷഷ്ടിപൂർത്തി സ്മാരകമായി പ്രതിവർഷം പ്രസിദ്ധപ്പെടുത്തുന്ന ഒരു ഗ്രന്ഥാവലിയാണ് വിദ്യാപോഷിണി ഗ്രന്ഥാവലി.

ഉള്ളൂർ, വള്ളത്തോൾ, കുണ്ടൂർ മുതലായ കവിവരന്മാരുടേയും എം. ആർ. മാധവവാരിയർ, ചേലന്നാട്ട് അച്യുതമേനോൻ, കണ്ണമ്പ്ര കുഞ്ഞുണ്ണി നായർ, പുത്തേഴത്തു രാമൻ മേനോൻ മുതലായ സാഹിത്യരസികന്മാരുടേയും സഹകരണം മൂലമാണ് 'വിദ്യാപോഷിണി'ക്ക് ക്രമോന്മുഖമായ പുരോഗതി ഉണ്ടായിട്ടുള്ളത്. ഗദ്യവും പദ്യവും ഇടവിട്ടുള്ള രീതിയാണ് ഇതിൽ അവലംബിച്ചിട്ടുള്ളത്.

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

1923-ൽ പ്രസിദ്ധീകരിച്ച, ‘ടാഗോർ കഥകൾ - രണ്ടാം ഭാഗം’ എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

മഹാകവി രവീന്ദ്രനാഥ ടാഗോർ എഴുതിയ ചെറുകഥകളാണ്  'ടാഗോർ കഥകൾ - രണ്ടാം ഭാഗം' എന്ന ഈ പുസ്തകത്തിൽ ഉൾപ്പെടുത്തിയിരിക്കുന്നത്.

പരിഭാഷകനായ പുത്തേഴത്ത് രാമൻ മേനോൻ അദ്ദേഹത്തിൻ്റെ പതിനെട്ടു ചെറുകഥകളെ അപ്പോഴപ്പോഴായി തർജ്ജിമ ചെയ്തിട്ടുണ്ട്. അതിൽ ആദ്യത്തെ ഒമ്പതു കഥകൾ മൂന്നു കൊല്ലങ്ങൾ മുമ്പ് പൊതുജനസമക്ഷത്തിൽ അവതരിപ്പിച്ചിട്ടുണ്ട്. ബാക്കിയുള്ള ഒമ്പതു കഥകളെ കൂട്ടിച്ചേർത്ത് പുസ്തകമാക്കിയിരിക്കുന്നതാണ് 'ടാഗോർ കഥകൾ - രണ്ടാം ഭാഗം' എന്ന ഈ പുസ്തകം.

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.