Release notes

2,924 release notes

1923 – ൽ പ്രസിദ്ധീകരിച്ച, ഒടുവിൽ ശങ്കരൻകുട്ടിമേനോൻ എഴുതിയ രണ്ടു പൌരാണിക കഥകൾ എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

പുരാണങ്ങളിലെ സദാചാര ഉപദേശങ്ങളും നീതിസാരങ്ങളും ലളിതമായി പ്രതിപാദിക്കുന്ന മനോഹരമായ ഒരു പുരാണ ഗ്രന്ഥമാണ് ഒടുവിൽ ശങ്കരൻകുട്ടിമേനോൻ്റെ 'പൌരാണിക കഥകൾ'. സ്കാന്ദമഹാപുരാണം ഉൾപ്പെടെയുള്ള പൌരാണിക സ്രോതസ്സുകളിൽ നിന്ന് തിരഞ്ഞെടുത്ത കഥകളാണ് ഈ പുസ്തകത്തിൻ്റെ പ്രധാന ഉള്ളടക്കം. വേട്ടയ്ക്കിടയിൽ മുനിയെ അപമാനിച്ച പരീക്ഷിത്ത് രാജാവും തന്മൂലമുണ്ടായ ശാപവും തുടർന്നുണ്ടാകുന്ന സംഭവവികാസങ്ങളും വിവരിക്കുന്ന കഥ ഇതിൽ ഉൾക്കൊള്ളിച്ചിരിക്കുന്നു. കൂടാതെ നാരാദ സംവാദത്തിലൂടെ കടന്നുവരുന്ന 'സൽപ്പുത്രൻ', 'ചിരകാരി' തുടങ്ങിയ ഉപാഖ്യാനങ്ങൾ ചിന്തോദ്ദീപകമായ ആശയങ്ങൾ വായനക്കാർക്ക് നൽകുന്നു. അവിവേകവും ക്ഷണികകോപവും വരുത്തുന്ന വിപത്തുകളെയും ക്ഷമയുടെയും വിവേകത്തിൻ്റെയും പ്രാധാന്യത്തെയും ഈ കഥാസമാഹാരം ഓർമ്മിപ്പിക്കുന്നു.

തിരുവനന്തപുരം ജില്ലയിലെ മലയിൻകീഴ്  ശ്രീകൃഷ്ണ വിലാസം ലൈബ്രറിയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്.

1924-ൽ പ്രസിദ്ധീകരിച്ച, കൊടുങ്ങല്ലൂർ കുഞ്ഞിക്കുട്ടൻ തമ്പുരാൻ രചിച്ച നിലവറക്കുണ്ടിലെ ഭൂതത്താൻ എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്

ഒരു സായാഹ്നത്തിൽ, ചേറ്റുപുഴയിലെ കായൽ വക്കത്തിരുന്നു വിശ്രമിക്കുമ്പോൾ ഒരു മണിക്കൂറു കൊണ്ട് കുഞ്ഞിക്കുട്ടൻ തമ്പുരാൻ രചിച്ച കൃതിയാണിതെന്നു മുഖവുരയിൽ കെ. വാസുദേവൻ മൂസ്സത് എഴുതിയിരിക്കുന്നു. തത്സമയം തന്നെ മൂസ്സത് ഇത് കുറിച്ചെടുക്കുകയായിരുന്നു. കുഞ്ചൻ നമ്പ്യാരുടെ 'പുറംകഥകൾ' എന്ന സങ്കൽപ്പത്തെ അടിസ്ഥാനമാക്കിയാണ് ഇത് രചിച്ചിട്ടുള്ളത്. ദുരാചാരങ്ങളെയും വഞ്ചനകളെയും നിഷേധരൂപേണ കാണിച്ച് ഉപദേശിക്കുക എന്ന ഉദ്ദേശ്യമാണ് ഈ കൃതിക്കുള്ളതെന്നും മുഖവുരയിലുണ്ട്. കൃതിയുടെ പേര് വാസുദേവൻ മൂസ്സത് തന്നെ നൽകിയതാണ്

ഖണ്ഡങ്ങളായി തിരിച്ചിട്ടുള്ള കൃതിയിൽ പ്രധാനമായും രണ്ട് കഥാഭാഗങ്ങളാണുള്ളത്. കാളിയും കേളച്ചാരും എന്ന കവിതയിൽ കാളി എന്ന സ്ത്രീ ഭർത്താവായ കേളച്ചാർ അപ്രതീക്ഷിതമായി കടന്നുവരുമ്പോൾ തൻ്റെ കാമുകനായ മാക്കോച്ചാരെ നിലവറയിൽ ഒളിപ്പിക്കുകയും ബുദ്ധിപൂർവ്വം ഭർത്താവിനെക്കൊണ്ട് തലയിണയുടെ ഉറ നോക്കാനെന്ന വ്യാജേന തല മൂടുവിച്ച് കാമുകനെ രക്ഷപ്പെടുത്തുകയും ചെയ്യുന്നു.

കട്ടയും കോരപ്പനും എന്ന കവിതയിൽ ഭർത്താവായ കോരപ്പൻ അറിയാതെ നിരവധി ജാരന്മാരെ സ്വീകരിക്കുന്ന 'കട്ട' എന്ന സ്ത്രീയുടെ കഥയാണുള്ളത്. നിലവറയിൽ കുടുങ്ങിപ്പോകുന്ന കാമുകനെ ഭർത്താവിൻ്റെ മുന്നിൽ "ഗന്ധർവ്വൻ" ആണെന്ന് വിശ്വസിപ്പിച്ച് തന്ത്രപൂർവ്വം രക്ഷിച്ചെടുക്കുകയും, ഭർത്താവിനെക്കൊണ്ടുതന്നെ അയാൾക്ക് പൂജകൾ ചെയ്യിപ്പിക്കുകയും ചെയ്യുന്നു

തിരുവനന്തപുരം ജില്ലയിലെ മലയിൻകീഴ്  ശ്രീകൃഷ്ണ വിലാസം ലൈബ്രറിയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്

1947-ൽ പ്രസിദ്ധീകരിച്ച, മേക്കൊല്ല എൻ. പരമേശ്വരൻ പിള്ള രചിച്ച ശിശുഹൃദയം എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

എൻ. പരമേശ്വരൻ പിള്ള 1947-ൽ രചിച്ച 'ശിശുഹൃദയം' എന്ന ഗ്രന്ഥം, പൗരാണിക ഭാരതീയ ചിന്തകളെയും ആധുനിക പാശ്ചാത്യ മനോവിജ്ഞാനത്തെയും സമന്വയിപ്പിച്ച് കുട്ടികളുടെ സമഗ്രമായ ആത്മീയ-മാനസിക വളർച്ചയെക്കുറിച്ചും വിദ്യാഭ്യാസത്തെക്കുറിച്ചും പ്രതിപാദിക്കുന്ന പ്രമുഖ മലയാള കൃതിയാണ്. മസ്തിഷ്കപ്രവർത്തനം, ബോധ-ഉപബോധ മനസ്സുകൾ, പാരമ്പര്യവും പരിതസ്ഥിതിയും, ജ്ഞാനേന്ദ്രിയ ശിക്ഷണം, വികാരങ്ങൾ, ഓർമ്മശക്തി, ഭാവന, ഭാഷാവികസനം, ശീലനിയന്ത്രണം എന്നിവയെല്ലാം ശാസ്ത്രീയമായി വിശദീകരിക്കുന്ന ഈ പുസ്തകം, റൂസോ, ഫ്രോബൽ, മാരിയ മോണ്ടിസോറി, ഡാർവിൻ തുടങ്ങിയ പണ്ഡിതന്മാരുടെ ദർശനങ്ങളെയും യോഗസൂത്രങ്ങളിലെ തത്ത്വങ്ങളെയും ഒരുപോലെ മുന്നോട്ടുവെക്കുന്നു. കുട്ടികളെ കേവലം മുതിർന്നവരുടെ ചെറുരൂപങ്ങളായി കാണാതെ അവരുടെ സഹജവാസനകളെയും സ്വഭാവരീതികളെയും കൃത്യമായി മനസ്സിലാക്കി ശാസ്ത്രീയമായും സ്നേഹത്തോടെയും വളർത്തിയെടുക്കേണ്ടതിൻ്റെ ആവശ്യകതയാണ് ഈ ഗ്രന്ഥം സമഗ്രമായി വ്യക്തമാക്കുന്നത്.

തിരുവനന്തപുരം ജില്ലയിലെ മലയിൻകീഴ്  ശ്രീകൃഷ്ണ വിലാസം ലൈബ്രറിയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്.

1952-ൽ പ്രസിദ്ധീകരിച്ച, പി.എ. ശങ്കരൻ നമ്പൂതിരി എഴുതിയ കൗടില്ല്യൻ എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

പ്രാചീന ഭാരതീയ രാഷ്ട്രതന്ത്രജ്ഞനും അർത്ഥശാസ്ത്രകാരനുമായ കൗടില്യൻ (ചാണക്യൻ) എന്ന ചരിത്രപുരുഷനെ കേന്ദ്രീകരിച്ചുള്ള ഒരു നാടകമാണ് ഈ കൃതി.

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

1952 - ൽ പ്രസിദ്ധീകരിച്ച,  ചെറുളിയിൽ കുഞ്ഞുണ്ണിനമ്പീശൻ വിവർത്തനം തയ്യാറാക്കിയ ഭാഷാശാകുന്തളം എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

കാളിദാസൻ്റെ പ്രശസ്തമായ 'അഭിജ്ഞാനശാകുന്തളം' എന്ന നാടകത്തിന് ചെറുളിയിൽ കുഞ്ഞുണ്ണിനമ്പീശൻ തയ്യാറാക്കിയ മലയാള പരിഭാഷയാണ് 'ഭാഷാശാകുന്തളം'. കൃതിയുടെ വിവർത്തന മികവിനെ പ്രശംസിച്ചുകൊണ്ട് സാഹിത്യകാരൻ ഗോവിന്ദൻകുട്ടിനായർ എഴുതിയ ആമുഖ പഠനവും, നാടകത്തിൻ്റെ ആദ്യ മൂന്ന് അങ്കങ്ങളുമാണ് പ്രധാനമായും ഈ പുസ്തകത്തിൽ ഉൾപ്പെടുത്തിയിരിക്കുന്നത്. നായാട്ടിനായി കാട്ടിലെത്തുന്ന ദുഷ്യന്ത മഹാരാജാവ് കണ്വമഹർഷിയുടെ ആശ്രമത്തിൽ എത്തുന്നതും, അവിടെവെച്ച് ശകുന്തളയെ കണ്ട് അനുരക്തനാകുന്നതുമാണ് ഇതിലെ പ്രധാന പ്രതിപാദ്യ വിഷയം. രാജാവിൻ്റെ സുഹൃത്തായ മാഢവ്യൻ  നായാട്ടിനെക്കുറിച്ചുള്ള പരിഭവങ്ങൾ പറയുന്ന രംഗവും, ശകുന്തളയ്ക്ക് രാജാവിനോട് തോന്നുന്ന പ്രണയവും അവൾ നേരിടുന്ന കാമതാപവും സഖിമാരായ അനസൂയയോടും പ്രിയംവദയോടും പങ്കുവെക്കുന്ന രംഗങ്ങളും ഈ ഭാഗത്ത് മനോഹരമായി അവതരിപ്പിച്ചിരിക്കുന്നു.

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

1951-ൽ പ്രസിദ്ധീകരിച്ച, മാണിക്കത്ത് ശേഖര മേനോൻ എഴുതിയ ഗോൽക്കൊണ്ട നിരോധം എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

ഹൈദരാബാദ് ഗോൽക്കൊണ്ട കോട്ടയുടെ ഉപരോധത്തെയും ഔറംഗസീബിൻ്റെ പടയോട്ടത്തെയും പശ്ചാത്തലമാക്കി മാണിക്കത്ത് ശേഖരമേനോൻ എഴുതിയ ഈ ചരിത്ര നോവൽ മലയാളത്തിലെ ശ്രദ്ധേയമായ ഒരു അപൂർവ്വ കൃതിയാണ്. 1951-ൽ പ്രസിദ്ധീകരിച്ച ഈ പുസ്തകത്തിൽ മുഗൾ സൈന്യത്തിൻ്റെ അക്രമണവും അബുൽ ഹസൻ ഖുതുബ് ഷായുടെ (താനാ ഷാ) ഭരണകാലത്ത് ഗോൽക്കൊണ്ടയിലുണ്ടായ സംഭവവികാസങ്ങളുമാണ് പ്രധാന ഇതിവൃത്തം. വെറുമൊരു മൺകോട്ടയായിരുന്ന ഗോൽക്കൊണ്ട എങ്ങനെയാണ് ചരിത്രപ്രസിദ്ധമായ ഒരു മഹാദുർഗ്ഗമായും സ്വതന്ത്ര രാജ്യമായും വളർന്നതെന്നും, കുത്തുബ് ഷാഹി രാജവംശത്തിൻ്റെ ഭരണപ്രതാപവും ഒടുവിൽ ചതിയിലൂടെ ആ രാജ്യം ശത്രുക്കൾ പിടിച്ചടക്കി നശിപ്പിച്ചതുമായ ചരിത്രപരമായ സംഭവവികാസങ്ങളാണ് ഈ പുസ്തകത്തിൽ വിവരിക്കുന്നത്.

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്

1950-ൽ പ്രസിദ്ധീകരിച്ച, ഏ.കെ. ബാലകൃഷ്ണപിള്ള എഴുതിയ വിശപ്പ് എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്

ഏ.കെ. ബാലകൃഷ്ണപിള്ള എഴുതിയ 'വിശപ്പ്' എന്ന ചെറുകഥാ സമാഹാരം മനുഷ്യജീവിതത്തിലെ ദാരിദ്ര്യത്തെയും കഷ്ടപ്പാടുകളെയും തുറന്നുകാട്ടുന്ന അഞ്ച് കഥകളുടെ സമാഹാരമാണ്. ആദ്യ കഥയായ 'ഇരുളിലെ പെൺകൊടി' യിൽ, അമ്മായിയുടെ വീട്ടിൽ കഠിനമായ പണിയും സഹിച്ചുകൊണ്ട് വിശപ്പടക്കാൻ പാടുപെടുന്ന രാധ എന്ന പതിന്നാലുകാരിയുടെ ദയനീയമായ അവസ്ഥയാണ് വിവരിക്കുന്നത്. 'മീൻമുള്ള്' എന്ന കഥയിൽ ജോലി നഷ്ടപ്പെട്ട് അല്പം ഭക്ഷണത്തിനും പുതിയൊരു തൊഴിലിനുമായി ഹോട്ടലുകൾ തോറും കയറിയിറങ്ങി നിരാശനാകുന്ന വാസു എന്ന പതിമൂന്നുകാരൻ്റെ കഥ കാണാം. പുസ്തകത്തിൻ്റെ നാമകരണത്തിന് ആസ്പദമായ 'വിശപ്പ്' എന്ന കഥയിലാകട്ടെ, തൊഴിലില്ലായ്മയും പട്ടിണിയും മൂലം അമ്മയുടെ മുന്നിൽ കണ്ണീരണിഞ്ഞു നൽക്കേണ്ടി വരുന്ന ഒരു യുവാവിൻ്റെ ആത്മസംഘർഷങ്ങളാണ് പ്രമേയം. നാലാമത്തെ കഥയായ 'ദൈവത്തിൻ്റെ മക്കൾ' കൊടും വെയിലിൽ വിശന്നുപൊരിഞ്ഞ് അല്പം കഞ്ഞിവെള്ളത്തിനായി ധനികരുടെ വാതിൽക്കൽ ചോദിച്ചെത്തുന്ന വൃദ്ധയുടെയും കുട്ടികളുടെയും കഥ പറയുമ്പോൾ, അഞ്ചാമത്തെ കഥയായ 'മക്കൾ തെണ്ടരുത്' തെരുവിൽ ചോരയൊലിപ്പിച്ചു കിടന്ന് കുടുംബത്തെ രക്ഷിക്കാനായി യാചിക്കേണ്ടി വരുന്ന ഒരു മുൻ മാന്യൻ്റെ ദാരുണമായ ജീവിതസാഹചര്യമാണ് വരച്ചുകാട്ടുന്നത്.

കോഴിക്കോട് ജില്ലയിലെ പറയഞ്ചേരി സെൻഗുപ്ത പബ്ലിക് ലൈബ്രറിയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്.

1933-ൽ പ്രസിദ്ധീകരിച്ച, കെ.ആർ. ഭാസ്കരൻ എഴുതിയ രാജകേസരി എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

രചയിതാവിൻ്റെ ഹൈസ്കൂൾ വിദ്യാഭ്യാസകാലത്ത് എഴുതിയിട്ടുള്ള ചരിത്രകഥാപുസ്തകമാണിത്. മലയാള ദേശാഭിമാനി, കഥാമാലിക എന്നീ ആനുകാലികങ്ങളിൽ ഈ പുസ്തകത്തിൻ്റെ ഏതാനും ഭാഗങ്ങൾ പ്രസിദ്ധീകരിച്ചിട്ടുണ്ട്.

കോഴിക്കോട് ജില്ലയിലെ പറയഞ്ചേരി സെൻഗുപ്ത പബ്ലിക് ലൈബ്രറിയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്.

1932-ൽ പ്രസിദ്ധീകരിച്ച, എൻ. ഗോപാലപിള്ള എഴുതിയ ശ്രീബുദ്ധദേവൻ എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

ഏഷ്യയുടെ പ്രകാശം (Light of Asia) എന്നറിയപ്പെടുന്ന ശ്രീബുദ്ധന്റെ മഹത്തായ ജീവിതവും ദർശനങ്ങളുമാണ് ഈ പുസ്തകത്തിന്റെ പ്രമേയം. സിദ്ധാർത്ഥൻ എന്ന രാജകുമാരൻ എങ്ങനെയാണ് ബുദ്ധനായി മാറിയത് എന്ന വികാരനിർഭരമായ യാത്രയാണ് ഇതിൽ വിവരിക്കുന്നത്. കൊട്ടാരത്തിന് പുറത്തെ ലോകം കാണാനിറങ്ങിയ സിദ്ധാർത്ഥൻ വഴിയിൽ വെച്ച് കണ്ടുമുട്ടുന്ന നാല് കാഴ്ചകൾ അദ്ദേഹത്തിന്റെ ചിന്തകളെ മാറ്റിമറിക്കുന്നു. ഒരു രോഗി, വൃദ്ധൻ, ശവം, പിന്നെ ശാന്തനായ ഒരു സന്യാസി. മനുഷ്യജീവിതം ദുഃഖപൂർണ്ണമാണെന്ന തിരിച്ചറിവ് അദ്ദേഹത്തിന്  ഉണ്ടാകുന്നത്  ഇവിടെ വെച്ചാണ്. ആശയാണ് എല്ലാ ദുഃഖങ്ങൾക്കും കാരണം' എന്ന് പ്രഖ്യാപിച്ചുകൊണ്ട്, അഹിംസയിലും കരുണയിലും ഊന്നിയ ബുദ്ധ ദർശനങ്ങൾ അദ്ദേഹം ലോകത്തിന് പകർന്നു നൽകുന്നു. അശാന്തി നിറഞ്ഞ ഇന്നത്തെ ലോകത്ത് ശ്രീബുദ്ധന്റെ സന്ദേശങ്ങൾക്ക് ഏറെ പ്രസക്തിയുണ്ട്. ലളിതമായ മലയാളത്തിൽ ബുദ്ധന്റെ ജീവിതത്തെയും ദർശനങ്ങളെയും സാധാരണക്കാരിലേക്ക് എത്തിക്കാൻ എൻ. ഗോപാലപിള്ളയുടെ ഈ കൃതിക്ക് സാധിച്ചിട്ടുണ്ട്.

കോഴിക്കോട് ജില്ലയിലെ പറയഞ്ചേരി സെൻഗുപ്ത പബ്ലിക് ലൈബ്രറിയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്.

1931-ൽ പ്രസിദ്ധീകരിച്ച, ചേലന്നാട്ട് അച്യുതമേനോൻ എഴുതിയ മണിമാല - രണ്ടാം ഭാഗം എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

പ്രശസ്ത സാഹിത്യകാരനും അധ്യാപകനുമായിരുന്ന ചേലനാട്ട് അച്യുതമേനോൻ രചിച്ച മനോഹരമായ ചെറുകഥാ സമാഹാരമാണ് 'മണിമാല (രണ്ടാം ഭാഗം)'. ഈ പുസ്തകത്തിൽ ആകെ അഞ്ച് കഥകളാണ് ഉള്ളത്. മനുഷ്യബന്ധങ്ങളിലെ കൊതിയും ഭ്രമങ്ങളും പ്രമേയമാക്കുന്ന 'ഇന്ദ്രജാലം', വിധി മനുഷ്യജീവിതത്തിൽ വരുത്തുന്ന മാറ്റങ്ങളെക്കുറിച്ച് സംസാരിക്കുന്ന 'വിധിയും കൊതിയും', തെറ്റുകളും അതിനുള്ള കുറ്റബോധവും വരച്ചുകാട്ടുന്ന 'പ്രായശ്ചിത്തം', പെൻഷനായ ശേഷം തറവാട്ടിലെത്തുന്ന കുഞ്ഞുണ്ണിമേനോൻ്റെ അനുഭവങ്ങളിലൂടെ വികസിക്കുന്ന 'കാട്ടുരാജാവ്', കൂടാതെ കുടുംബത്തിലെ സ്വത്തുതർക്കങ്ങളും തറവാട്ടു കാര്യങ്ങളും പ്രമേയമാക്കിയ 'മേനോൻ്റെ അവസാനക്കയ്യ്' എന്നിവയാണ് ഈ സമാഹാരത്തിലെ കഥകൾ. പഴയകാല കേരളീയ സാമൂഹിക അന്തരീക്ഷവും തറവാട്ടു അനുഭവങ്ങളും ലളിതമായ ഭാഷയിൽ വായനക്കാരിലേക്ക് എത്തിക്കുന്ന ഈ പുസ്തകം, ചെറുകഥാ സാഹിത്യത്തെ ഇഷ്ടപ്പെടുന്ന ഏവർക്കും വായിച്ചു ആസ്വദിക്കാൻ പറ്റിയ നല്ലൊരു രചനയാണിത്.

കോഴിക്കോട് ജില്ലയിലെ പറയഞ്ചേരി സെൻഗുപ്ത പബ്ലിക് ലൈബ്രറിയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്.

1930-ൽ പ്രസിദ്ധീകരിച്ച, പി.ആർ. ദൊരസ്വാമി ശർമ്മ വിവർത്തനം തയ്യാറാക്കിയായ ദശകുമാരചരിതം എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

ആറാം നൂറ്റാണ്ടിൽ ജീവിച്ചിരുന്ന പ്രശസ്ത സംസ്കൃത കവിയായ ദണ്ഡി രചിച്ച ഗദ്യകാവ്യത്തെ അടിസ്ഥാനമാക്കി, സംസ്കൃത അധ്യാപകനായിരുന്ന പി.ആർ. ദൊരസ്വാമി ശർമ്മ മലയാളത്തിലേക്ക് പരിഭാഷപ്പെടുത്തിയ പുസ്തകമാണ് 'ദശകുമാരചരിതം'. മഗധ രാജാവായ രാജഹംസൻ മാളവ രാജാവായ മാനസാരനോട് യുദ്ധത്തിൽ പരാജയപ്പെട്ട് വിന്ധ്യവനത്തിൽ അഭയം പ്രാപിക്കുന്നതും, അവിടെ ജനിച്ച രാജവാഹനൻ എന്ന പുത്രനും മറ്റ് ഒമ്പത് കുമാരന്മാരും ഒന്നിച്ചു വളർന്ന് വിദ്യകൾ അഭ്യസിക്കുന്നതുമാണ് ഇതിലെ കഥാപശ്ചാത്തലം.

കോഴിക്കോട് ജില്ലയിലെ പറയഞ്ചേരി സെൻഗുപ്ത പബ്ലിക് ലൈബ്രറിയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്.

1951-ൽ പ്രസിദ്ധീകരിച്ച, എന്യൂമറേഷൻ മാനുവൽ (പരിശിഷ്ടം) എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

1951-ലെ തിരുവിതാംകൂർ-കൊച്ചി സംസ്ഥാനത്തിലെ ഇന്ത്യൻ സെൻസസ്സ് എന്യൂമറേഷൻ മാനുവലിൻ്റെ അനുബന്ധ ഭാഗമാണിത്. സെൻസസ്സ് പ്രവർത്തനങ്ങളിൽ പരിശീലന ഏകീകരണം ഉറപ്പുവരുത്തുന്നതിനായി ചോദ്യം 1, 4, 9, 10, 11, 18 എന്നിവയെ സംബന്ധിച്ചുള്ള കൂടുതൽ വ്യക്തതകളും വിശദീകരണങ്ങളുമാണ് ഇതിൽ  നൽകിയിരിക്കുന്നത്. പ്രധാനമായും ഓരോ പൗരൻ്റെയും പേരിനൊപ്പം അവരുടെ പിതാവിൻ്റെയോ ഭർത്താവിൻ്റെയോ പേര് ചേർക്കുന്നതിനെക്കുറിച്ചും, ഗൃഹനാഥനുമായുള്ള ബന്ധം വ്യക്തമാക്കുന്നതിനെക്കുറിച്ചും, പ്രായം കൃത്യമായി രേഖപ്പെടുത്തുന്നതിനുള്ള മാർഗ്ഗനിർദ്ദേശങ്ങളുമാണ് ഇതിൽ പ്രതിപാദിക്കുന്നത്.

തിരുവനന്തപുരം ജില്ലയിലെ സി.വി. സ്മാരക ഗ്രന്ഥശാലയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്