Release notes

2,924 release notes

1947 – ൽ പ്രസിദ്ധീകരിച്ച, എസ്.കെ. ബാലകൃഷ്ണൻ രചിച്ച ലോകോപകാരികൾ എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

ലോകത്തെ ഇരുട്ടിൽ നിന്ന് വെളിച്ചത്തിലേക്ക് നയിച്ച ശാസ്ത്രജ്ഞരുടെയും കണ്ടുപിടുത്തക്കാരുടെയും ജീവിതം എപ്പോഴും പുതിയ തലമുറയ്ക്ക് ഒരു വലിയ വഴികാട്ടിയാണ്. അത്തരത്തിൽ മനുഷ്യകുലത്തിന് വലിയ സംഭാവനകൾ നൽകിയ വിജ്ഞാനപ്രദരായ ശാസ്ത്രപ്രതിഭകളെക്കുറിച്ച് പ്രതിപാദിക്കുന്ന ഒരു വിശിഷ്ട ജീവചരിത്ര സമാഹാരമാണ് 'ലോകോപകാരികൾ' (മൂന്നാം ഭാഗം). എസ്. കെ. ബാലകൃഷ്ണൻ രചിച്ച ഈ പുസ്തകം. 1947-ൽ കോഴിക്കോട്ടെ കെ.ആർ. ബ്രദേഴ്സ് ആണ് പ്രസിദ്ധീകരിച്ചത്. അക്കാലത്ത് സ്കൂൾ പഠനത്തിനായി മദ്രാസ് ടെക്സ്റ്റ് ബുക്ക് കമ്മിറ്റിയുടെ പ്രശസ്തമായ അംഗീകാരം നേടിയ ഒരു മികച്ച ഗ്രന്ഥം കൂടിയാണിത്.

ഈ പുസ്തകത്തിൽ ലോകത്തെ മാറ്റിമറിച്ച ആറ് മഹത് വ്യക്തികളുടെ ജീവചരിത്രങ്ങൾ വിശദമായി ഉൾപ്പെടുത്തിയിരിക്കുന്നു. ആധുനിക അച്ചടിയന്ത്രത്തിൻ്റെ കണ്ടുപിടുത്തത്തിലൂടെ അറിവും പുസ്തകങ്ങളും സാർവത്രികമാക്കിയ ജോൺ ഗട്ടൻബർഗ്ഗ്, വാതകദീപം വികസിപ്പിച്ച് ഇരുളടഞ്ഞ തെരുവുകളെയും വീടുകളെയും വെളിച്ചത്തിലാക്കിയ വില്യം മർഡോക്ക്, മൈക്രോബയോളജി രംഗത്തെ ഗവേഷണങ്ങളിലൂടെ രോഗാണുക്കളെ കണ്ടെത്തി മനുഷ്യജീവൻ രക്ഷിക്കാൻ പോരാടിയ ലൂയി പാസ്റ്റർ എന്നിവരുടെ ജീവചരിത്രങ്ങൾ വായനക്കാർക്ക് വലിയ അറിവും പ്രചോദനവും പകരന്നു.

കൂടാതെ, ടെലിഫോൺ കണ്ടുപിടിച്ച് ദൂരശ്രവണത്തിൻ്റെയും ആശയവിനിമയത്തിൻ്റെയും രംഗത്ത് വലിയ വിപ്ലവം സൃഷ്ടിച്ച അലക്സാണ്ടർ ഗ്രഹാംബെൽ, റേഡിയം കണ്ടുപിടിക്കുകയും രണ്ടുതവണ നോബൽ സമ്മാനം നേടി ചരിത്രം കുറിക്കുകയും ചെയ്ത മഹതിയായ മദാം ക്യൂറി, ഭാരതീയ രസതന്ത്രത്തിൻ്റെ പിതാവും വ്യവസായ രംഗത്ത് വലിയ മാറ്റങ്ങൾ കൊണ്ടുവരുകയും ചെയ്ത സർ. സി.പി. റോയി (പ്രഫുല്ല ചന്ദ്ര റോയി) എന്നിവരുടെ ജീവിതയാത്രയും ഈ കൃതിയിൽ പ്രതിപാദിക്കുന്നുണ്ട്.

വളരെ ലളിതമായ ഭാഷാശൈലിയും വായിച്ചു മനസ്സിലാക്കാൻ എളുപ്പമുള്ള അവതരണവുമാണ് ഈ പുസ്തകത്തിൻ്റെ പ്രധാന ആകർഷണം. പ്രതികൂല സാഹചര്യങ്ങളോട് പൊരുതി വിജയം വരിച്ച ഈ മഹത്വ്യക്തികളുടെ ജീവിതം വായനക്കാരിൽ നിശ്ചയദാർഢ്യവും അധ്വാനശീലവും ആത്മവിശ്വാസവും വളർത്താൻ വളരെയധികം സഹായിക്കും.

കോഴിക്കോട് ജില്ലയിലെ പറയഞ്ചേരി സെൻഗുപ്ത പബ്ലിക് ലൈബ്രറിയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്.

1868 – ൽ പ്രസിദ്ധീകരിച്ച, സെറാഫ അമ്മ ൟശൊടെത്രെസ്യ എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

1868-ൽ മാന്നാനം അച്ചുക്കൂടത്തിൽ നിന്ന് പ്രസിദ്ധീകരിച്ച ‘സെറാഫ അമ്മൟശൊടെത്രെസ്യ’ (സെറാഫ അമ്മ ഈശോയുടെ ത്രേസ്യ,ആവിലായിലെ വിശുദ്ധ തെരേസയുടെ ജീവചരിത്രം) എന്ന പുസ്തകം, ഇറ്റാലിയൻ രേഖകളിൽ നിന്ന് പരിഭാഷപ്പെടുത്തി വിശുദ്ധ കുര്യാക്കോസ് ഏലിയാസ് ചാവറയ്ക്ക് സമർപ്പിച്ച ആത്മീയ ഗ്രന്ഥമാണ്. 1515 മാർച്ച് 28-ന് സ്പെയിനിലെ ആവിലായിൽ ദൈവഭയമുള്ള അലോൻസോ സാഞ്ചസ്, ദോന്ന ബിയാത്രിസ് ദമ്പതികളുടെ മകളായി ജനിച്ച തെരേസ, തനിക്കുള്ള വലിയ തറവാട്ടുമഹിമയും സമ്പത്തും വെടിഞ്ഞ് എളിമയോടെ ക്രിസ്തുവിനെ അനുഗമിച്ചതും, ഏഴാം വയസ്സിൽ തന്നെ രക്തസാക്ഷിത്വത്തിലൂടെ സ്വർഗ്ഗം പ്രാപിക്കാൻ ആഗ്രഹിച്ച് ആഴമുള്ള പ്രാർത്ഥനാജീവിതം നയിച്ചതും ഇതിൽ പ്രതിപാദിക്കുന്നു. യൂറോപ്പിൽ സഭ വെല്ലുവിളികൾ നേരിട്ട കാലത്ത് നവീകരണത്തിൻ്റെ പ്രകാശമായി മാറിയ വിശുദ്ധ തെരേസയുടെ ജീവിതമാതൃക, കേരളത്തിലെ കത്തോലിക്കാ സഭയിലെയും മൂന്നാം സഭയിലെയും വിശ്വാസികളിലേക്ക് പകർന്നുനൽകുക എന്നതായിരുന്നു ഈ ആദ്യകാല മലയാള അച്ചടിഗ്രന്ഥത്തിൻ്റെ പ്രധാന ലക്ഷ്യം.

മുതിർന്ന മലയാളപത്രപ്രവർത്തകനും സാഹിത്യ ചരിത്രകാരനുമായ പോൾ മണലിൽ ആണ് ആണ് ഈ പുസ്തകം ഡിജിറ്റൈസേഷനു വേണ്ടി നൽകിയത്.

1927 – ൽ പ്രസിദ്ധീകരിച്ച ശ്രീ ഹോരാശാസ്ത്രം - ഒന്നാം ഭാഗം എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

​ജ്യോതിശാസ്ത്രത്തിലെ പ്രധാനപ്പെട്ട ഒരു സ്കന്ധമാണ് ‘ഹോര’. ജനനസമയത്തെ ഗ്രഹസ്ഥിതി പ്രമാണമാക്കി മനുഷ്യജീവിതത്തിലെ ഫലങ്ങളെ നിരൂപിക്കുകയാണ് ഇതിൻ്റെ പ്രതിപാദ്യവിഷയം. ഭാരതീയ ജ്യോതിഷത്തിലെ ഫലഭാഗ ജ്യോതിഷത്തെക്കുറിച്ചുള്ള (Predictive Astrology) ഏറ്റവും സമഗ്രവും പ്രാമാണികവുമായ പ്രമാണ ഗ്രന്ഥമാണ് ക്രിസ്തുവർഷം ആറാം നൂറ്റാണ്ടിൽ വരാഹമിഹിരൻ സംസ്കൃതത്തിൽ രചിച്ച ബൃഹത് ജാതകം (ഹോരാശാസ്ത്രം). ഒരു വ്യക്തിയുടെ ജനന സമയത്തെ ഗ്രഹനില ആസ്പദമാക്കി അയാളുടെ സ്വഭാവം, ആയുർദായം, വിവിധ യോഗങ്ങൾ, തൊഴിൽ, ദശാഫലങ്ങൾ എന്നിവ പ്രവചിക്കുന്നതിനുള്ള ജാതകശാസ്ത്ര നിയമങ്ങളാണ് ഈ ഗ്രന്ഥത്തിൻ്റെ പ്രധാന ഉള്ളടക്കം. കഠിനമായ സംസ്കൃത ശ്ലോകങ്ങളിലുള്ള ഈ കൃതിയെ സാധാരണക്കാർക്കും ജ്യോതിഷ പഠിതാക്കൾക്കും സുഗമമായി മനസ്സിലാക്കാവുന്ന രീതിയിൽ പത്തൊൻപതാം നൂറ്റാണ്ടിലെ പ്രമുഖ പണ്ഡിതനായ വിദ്വാൻ കൈക്കുളങ്ങര രാമവാര്യർ മലയാളത്തിലേക്ക് മാറ്റിയെഴുതി. 'ഹൃദ്യപഥാ' (ഹൃദ്യപദം) എന്ന പേരിൽ അദ്ദേഹം തയ്യാറാക്കിയ ഈ ലളിതവും ആധികാരികവുമായ ഭാഷാവ്യാഖ്യാനം, കേരളത്തിലെ ജ്യോതിഷ പ്രവചന രംഗത്തും പഠന ശാഖയിലും ഇന്നും ഏറ്റവും മികച്ച റഫറൻസ് ഗ്രന്ഥമായി നിലകൊള്ളുന്നു.

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

1965 - ൽ പ്രസിദ്ധീകരിച്ച, സി.വി. കുഞ്ഞുരാമൻ രചിച്ച ആശാൻ സ്മരണകൾ എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

സി. വി. കുഞ്ഞുരാമൻ രചിച്ച 'ആശാൻസ്മരണകൾ' എന്ന അമൂല്യ ഗ്രന്ഥം മഹാകവി കുമാരനാശാൻ്റെ കാവ്യപ്രപഞ്ചത്തെയും വ്യക്തിജീവിതത്തെയും അടുത്തറിയാൻ ആഗ്രഹിക്കുന്ന ഏതൊരു സാഹിത്യസ്നേഹിയും തീർച്ചയായും വായിച്ചിരിക്കേണ്ട ഒന്നാണ്. മഹാകവിയുമായുള്ള ദീർഘകാലത്തെ വ്യക്തിബന്ധം മുൻനിർത്തി ഗ്രന്ഥകാരൻ തയ്യാറാക്കിയ ഓർമ്മക്കുറിപ്പുകളും, 'ദുരവസ്ഥ', 'നളിനി', 'കുചേലവൃത്തം' തുടങ്ങിയ പ്രശസ്ത ആശാൻ കൃതികളുടെ ആഴത്തിലുള്ള സാഹിത്യനിരൂപണങ്ങളുമാണ് ഈ ലേഖനസമാഹാരത്തിൻ്റെ പ്രധാന ആകർഷണം. കേവലം ഒരു സ്മരണാവലി എന്നതിലുപരി, അരനൂറ്റാണ്ട് മുമ്പുള്ള കേരളീയ സാമൂഹികാവസ്ഥകൾ, അന്നത്തെ പത്രപ്രവർത്തനം, നവോത്ഥാന പ്രസ്ഥാനങ്ങൾ, അക്കാലത്ത് സാഹിത്യലോകത്ത് അലയടിച്ച ചൂടുപിടിച്ച വാദപ്രതിവാദങ്ങൾ എന്നിവയെല്ലാം സി. വി. കുഞ്ഞുരാമൻ്റെ മൂർച്ചയേറിയ ഗദ്യശൈലിയിൽ ഇതിൽ തെളിഞ്ഞുനിൽക്കുന്നു. അതോടൊപ്പം തന്നെ, ആശാൻ്റെ പല്ലനയിലെ ദാരുണമായ ബോട്ടപകട മരണത്തെക്കുറിച്ചും ആ അകാല വിയോഗം സൃഷ്ടിച്ച അപരിഹാര്യമായ ശൂന്യതയെക്കുറിച്ചുമുള്ള ഹൃദയസ്പർശിയായ കുറിപ്പുകൾ വായനക്കാരെ ഏറെ ആഴത്തിൽ സ്പർശിക്കുന്നവയാണ്. ചുരുക്കത്തിൽ, ആശാൻ്റെ കാവ്യമേന്മയെയും വ്യക്തിത്വത്തെയും ചരിത്രപശ്ചാത്തലത്തിൽ വച്ച് വിലയിരുത്തുന്ന ഈ കൃതി മലയാള സാഹിത്യത്തിലെ എക്കാലത്തെയും മികച്ച ഒരു സ്മരണാഗ്രന്ഥമാണ്.

കോഴിക്കോട് ജില്ലയിലെ പറയഞ്ചേരി സെൻഗുപ്ത പബ്ലിക് ലൈബ്രറിയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്.

1955 – ൽ പ്രസിദ്ധീകരിച്ച, ജെ. ഹില്ലാരിയോൻ രചിച്ച കേരളത്തിലെ കർമ്മെലാരാമം എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

കേരള കർമ്മലീത്താ സുറിയാനി സഭയുടെ കാനോനിക സ്ഥാപനത്തിൻ്റെ ശതാബ്ദിപൂർത്തി സ്മാരകമായി ജൂബിലി ആഘോഷക്കമ്മിറ്റി പ്രസിദ്ധീകരിച്ചതാണ് കേരളത്തിലെ കർമ്മെലാരാമം അഥവാ കേരള സുറിയാനി കർമ്മെലീത്താ സഭയുടെ സേവനചരിത്ര സംഗ്രഹം എന്ന ഈ പുസ്തകം. കേരളത്തിൽ കർമ്മെലീത്താ പാരമ്പര്യം രൂപപ്പെട്ടതിന്റെ പശ്ചാത്തലവും അതിൻ്റെ വളർച്ചയും വിവിധ കേന്ദ്രങ്ങളിലേക്കുള്ള വ്യാപനവും ഗ്രന്ഥം പ്രതിപാദിക്കുന്നു. വൈദികരും സന്യാസികളും നടത്തിയ ആത്മീയ ശുശ്രൂഷ, വിദ്യാഭ്യാസ പ്രവർത്തനം, മിഷൻ പ്രവർത്തനം, സ്ഥാപനങ്ങളുടെ രൂപീകരണം തുടങ്ങിയവയും ഇതിൽ ഉൾപ്പെടുന്നു. കേരളത്തിലെ ക്രൈസ്തവ സമൂഹത്തിൻ്റെ ചരിത്രപരമായ വികാസത്തിൽ കർമ്മെലീത്താ സമൂഹം വഹിച്ച പങ്കാണ് ഗ്രന്ഥത്തിൻ്റെ പ്രധാന പ്രമേയം. ആമുഖം, മാന്നാനാം കുന്ന്, തിരുസ്സഭയിലെ മലർവാടികൾ,സഭയുടെ ഭരണക്രമം, സഭാംഗത്വം, സഭാംഗത്വം, കേരളത്തിലെ മരിയാരാമം എന്നീ അധ്യായങ്ങൾക്ക് പുറമെ സഭയുടേ വിനീതസേവനങ്ങളായ ധ്യാനപ്രസംഗപ്രസ്ഥാനം, ഇടവക ഭരണം, ആരാധനക്രമപരിഷ്കരണം, സന്യാസിനീ സമൂഹ സ്ഥാപനം, മതപ്രചരണപ്രസ്ഥാനം, മിഷ്യൻ പ്രവർത്തനം, വൈദികസെമ്മിനാരികൾ,വിദ്യാഭ്യാസരംഗം, സാമൂഹ്യപ്രവർത്തനങ്ങൾ, സാഹിത്യ സേവനങ്ങൾ എന്നീ വിഷയങ്ങളും ഉൾക്കൊള്ളിച്ചിരിക്കുന്നു.

കോട്ടയം പബ്ലിക്ക് ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

1927 – ൽ പ്രസിദ്ധീകരിച്ച ഈ.വി. കൃഷ്ണപിള്ള രചിച്ച കേളീസൗധം - മൂന്നാം ഭാഗം എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

മലയാള സാഹിത്യത്തിലെ പ്രമുഖ സാഹിത്യകാരനായിരുന്ന ഇ.വി. കൃഷ്ണപിള്ള രചിച്ച അൻപതോളമുള്ള കഥകൾ ഉൾക്കൊള്ളുന്ന സുപ്രധാനമായ ഒരു ആദ്യകാല ചെറുകഥാ സമാഹാരമാണ് 'കേളീസൗധം'. നാലു ഭാഗങ്ങളായി ക്രോഡീകരിച്ച് പ്രസിദ്ധീകരിച്ച ഈ കൃതി, മലയാള ചെറുകഥയുടെ വളർച്ചാഘട്ടത്തെ അടയാളപ്പെടുത്തുന്ന ഒന്നാണ്. തൻ്റെ പതിനാലാമത്തെ വയസ്സു മുതൽ ഇ.വി. കൃഷ്ണപിള്ള വിവിധ പത്രങ്ങളിലും മാസികകളിലും എഴുതിയിരുന്ന കഥകളാണ് ഈ സമാഹാരത്തിന് അടിത്തറ പാകിയത്. അദ്ദേഹത്തിൻ്റെ ഭാര്യയുടെ പ്രസാധിപത്യത്തിൽ കുന്നംകുളത്തുനിന്നും പുറപ്പെട്ടിരുന്ന 'കഥാകൗമുദി' എന്ന മാസികയിൽ അച്ചടിച്ചുവന്ന കഥകളാണ് ഇതിൽ ഭൂരിഭാഗവും. അദ്ദേഹം രചിച്ച ചില ആദ്യകാല കഥകൾ കണ്ടെത്താൻ കഴിയാത്തതിനാലും, മറ്റു ചിലത് അദ്ദേഹത്തിൻ്റെ ശൈലിയോട് യോജിക്കാത്തതിനാലും ലഭ്യമായ മികച്ച കഥകൾ മാത്രമാണ് ഇതിൽ ഉൾപ്പെടുത്തിയിട്ടുള്ളത്. സമുദായം, ചരിത്രം, കുറ്റാന്വേഷണം, ഉപഹാസം തുടങ്ങി വൈവിധ്യമാർന്ന വിഷയങ്ങളാണ് ഈ കഥകൾക്ക് പ്രമേയമായി സ്വീകരിച്ചിട്ടുള്ളത്.

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

ചെറുവത്തേരി കെഴക്കേടത്ത് നീലകണ്ഠൻ നമ്പൂതിരി രചിച്ച  ഭദ്രകാളിചരിതം പാനപ്പാട്ട് എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

ചെറുവത്തേരി കെഴക്കേടത്ത് നീലകണ്ഠൻ നമ്പൂതിരി രചിച്ച ഭദ്രകാളി ചരിതം പാനപ്പാട്ട് എന്ന കൃതി ഭദ്രകാളിയുടെ ഉത്പത്തിയും ദാരുകാസുര വധവും പ്രകീർത്തിക്കുന്ന ഒരു പദ്യസമാഹാരമാണ്. നാരദമുനിയിലൂടെ ദാരുകാസുരൻ്റെ അക്രമങ്ങളെക്കുറിച്ചറിഞ്ഞ പരമശിവൻ്റെ  തൃക്കണ്ണിലെ കോപാഗ്നിയിൽ നിന്ന് ഭയങ്കരരൂപിണിയായി ഭദ്രകാളി ജനിക്കുന്നതും, പാർവ്വതീദേവിയുടെ ഉപദേശപ്രകാരം കാരുണ്യമുള്ള ശാന്തരൂപം കൈക്കൊള്ളുന്നതും ഇതിൽ വർണ്ണിക്കുന്നു.

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

എം. കേശവൻ ഇളയത് രചിച്ച വീരപൂജ എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

എം. കേശവൻ ഇളയത് രചിച്ച വീരപൂജ എന്ന ഗ്രന്ഥം സ്വാതന്ത്ര്യസമര കാലഘട്ടത്തിലാണ് പ്രസിദ്ധീകരിച്ചത്. പുതിയ തലമുറയിൽ ദേശസ്നേഹവും ധീരതയും വളർത്താൻ ലക്ഷ്യമിടുന്ന ഈ കൃതിയിൽ, മാതൃഭൂമിക്കായി ജീവൻ തൃണവൽഗണിച്ച രജപുത്രരുടെ അചഞ്ചലമായ ത്യാഗവും ശൂര്യവും വിവരിക്കുന്നു. യുദ്ധത്തിൽ പരാജയം ഉറപ്പാകുമ്പോൾ ശത്രുക്കളുടെ കയ്യിൽപ്പെടാതെ രജപുത്ര വനിതകൾ അഗ്നിയിൽ ജീവത്യാഗം ചെയ്യുകയും, തുടർന്ന് പുരുഷന്മാർ ശത്രുനിരയിലേക്ക് ഇറങ്ങി പോരാടി വീരസ്വർഗ്ഗം പ്രാപിക്കുകയും ചെയ്തിരുന്നു. താർ മരുഭൂമിയും ആരവല്ലി പർവ്വതനിരകളും അടങ്ങുന്ന രാജസ്ഥാനിൽ, ഭൂപ്രകൃതിയുടെ പ്രത്യേകതകൾ കൊണ്ട് വിദേശ ആക്രമണങ്ങളെ ദീർഘകാലം പ്രതിരോധിച്ച് സ്വാതന്ത്ര്യം നിലനിർത്തിയത് മീവാർ (ഉദയപൂർ) ആയിരുന്നു. മീവാറിൻ്റെ ചരിത്രപരമായ പ്രാധാന്യത്തെയും അതിശ്രേഷ്ഠമായ പാരമ്പര്യത്തെയും വിളിച്ചോതുന്ന ചരിത്രസ്മാരകങ്ങളായ ചിറ്റോർ കോട്ട, കീർത്തിസ്തംഭം, ജയസ്തംഭം എന്നിവയെക്കുറിച്ചും ഈ ഗ്രന്ഥത്തിൻ്റെ പ്രാരംഭ ഭാഗത്ത് വിശദമായി പ്രതിപാദിക്കുന്നുണ്ട്.

തിരുവനന്തപുരം ജില്ലയിലെ മലയിൻകീഴ്  ശ്രീകൃഷ്ണ വിലാസം ലൈബ്രറിയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്

J.S. Shenoi പ്രസിദ്ധീകരിച്ച സാഹിത്യവും പുരുഷാർത്ഥവും എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

സാഹിത്യത്തെ മനുഷ്യജീവിതത്തിൻ്റെ ലക്ഷ്യങ്ങളായ ധർമ്മം, അർത്ഥം, കാമം, മോക്ഷം എന്നീ ചതുർപുരുഷാർത്ഥങ്ങളുടെ പശ്ചാത്തലത്തിൽ വിലയിരുത്തുന്ന ഒരു ചിന്താപരമായ കൃതിയാണ്. ഭാരതീയ ജീവിതദർശനത്തിൽ സാഹിത്യത്തിനുള്ള സ്ഥാനവും മനുഷ്യൻ്റെ ധാർമ്മികവും സാമൂഹികവും ആത്മീയവുമായ വളർച്ചയിൽ സാഹിത്യത്തിനുള്ള പങ്കും ഇതിൽ ചർച്ച ചെയ്യുന്നു.

പുരാതനചാര്യന്മാർ ജീവിതത്തിനു പല അർഥങ്ങളേയും അവയെ പ്രാപിക്കുന്നതിനു വിവിധമാർഗ്ഗങ്ങളേയും കല്പിച്ചിട്ടുണ്ട്. അവ ശ്രുതിനിർദ്ദിഷ്ടങ്ങളാകുന്നു. ആ പുരുഷാത്ഥങ്ങളിൽ പരമമായ മോക്ഷത്തിനാണു പരമസ്ഥാനം, ആ മാർഗ്ഗങ്ങളിൽ ധമ്മം, ഭക്തി, ജ്ഞാനം എന്നിവയ്ക്കും മാഹാത്മ്യംകൂടും. ലോകത്തിലെ എല്ലാ സമുദായങ്ങൾക്കും ഔന്നത്യം ലഭിക്കണമെങ്കിൽ ഈ മൂന്നുഗുണങ്ങൾ ഉണ്ടായിരിക്കണം. ഇവയിൽ ഏതെങ്കിലും ഒരു ഉപായം സ്വാധീനമായാൽ അതുകൊണ്ടു് പരമപദത്തെ പ്രാപിക്കാം. സമുദായത്തോടു് ഈ ഗുണങ്ങളെ ബന്ധിക്കുന്നതിനു സാഹിത്യം കൊണ്ടേ സാധിക്കയുള്ളു. ധമ്മം, ഭക്തി, ജ്ഞാനം എന്നിവയുടെ മാഹാത്മ്യത്തെ പ്രകാശിപ്പിക്കുന്നയായി ഗംഭീരങ്ങളായ പല ശാസ്ത്രങ്ങളും ഉണ്ടു്. അവ അതികർക്കശങ്ങളാകയാൽ സാധാരണക്കാർക്ക് രുചികരമല്ല. എന്നാൽ സാഹിത്യമാർഗ്ഗം നിസർഗ്ഗരമണീയതകൊണ്ട് ആരേയും ആകർഷിക്കുന്നതാണ് എന്നും പുസ്തകം സൂചിപ്പിക്കുന്നു.

തിരുവനന്തപുരം ജില്ലയിലെ മലയിൻകീഴ്  ശ്രീകൃഷ്ണ വിലാസം ലൈബ്രറിയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്

1913 – ൽ പ്രസിദ്ധീകരിച്ച  ശ്രീശങ്കരാചാര്യസ്വാമികളുടെ മുകുന്ദമാല മൂലവും തർജ്ജമയും എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

മലയാള സാഹിത്യ ചരിത്രത്തിൽ വേറിട്ടുനിൽക്കുന്ന ഒരു അപൂർവ്വ വിവർത്തന ഗ്രന്ഥമാണ് 'ഭാഷാ മുകുന്ദമാല'. അദ്വൈതവേദാന്ത ദർശനങ്ങളുടെ വക്താവായ ശ്രീ ശങ്കരാചാര്യ സ്വാമികൾ സംസ്കൃതത്തിൽ രചിച്ച പ്രശസ്തമായ 'മുകുന്ദമാല' എന്ന ഭക്തിസ്തോത്രത്തിന്റെ അതിലളിതമായ മലയാള പരിഭാഷയാണിത്. ടൈറ്റിൽ പേജിൽ "ശ്രീശങ്കരാചാര്യ സ്വാമികളുടെ മുകുന്ദമാല മൂലവും തർജ്ജമയും" എന്ന് നൽകിയിരിക്കുന്നു. ഉൾപേജിലും മുഖവുരയിലും ഈ കൃതിയെ 'ഭാഷാ മുകുന്ദമാല' എന്നാണ് വിശേഷിപ്പിച്ചത്. ശ്രീ ശങ്കരാചാര്യരുടെ നിഷ്കാമ ഭക്തിയും ഈശ്വര പ്രകീർത്തനങ്ങളും അടങ്ങിയ സുന്ദരമായ ശ്ലോകങ്ങളാണ് മുകുന്ദമാലയിലുള്ളത്. ഈ ഗ്രന്ഥത്തിൽ സംസ്കൃതത്തിലെ മൂലശ്ലോകങ്ങളും അവയുടെ മലയാള പരിഭാഷയും ഒന്നിച്ച് ഉൾപ്പെടുത്തിയിരിക്കുന്നു. സാധാരണക്കാരായ ഭക്തജനങ്ങൾക്ക് ദിനവും നിത്യപാരായണം ചെയ്യുന്നതിനായി, മൂലകൃതിയുടെ ജീവനും ഭക്തിരസവും ചോർന്നുപോകാതെ ലളിതമായ രീതിയിലാണ് എൻ. കൃഷ്ണപിള്ള ഇത് മലയാളത്തിലേക്ക് ഭാഷാന്തരം ചെയ്തിരിക്കുന്നത്. മലയാള വിവർത്തന ശാഖയുടെ പഴമയും ചരിത്രപരമായ വളർച്ചയും വ്യക്തമാക്കുന്ന മനോഹരമായ ഒരു സാഹിത്യ സ്മാരകമാണ് ഈ ഗ്രന്ഥം. വലിയ കോയിത്തമ്പുരാൻ, എ. ആർ. രാജരാജവർമ്മ തുടങ്ങിയ പ്രഗത്ഭരുടെ അംഗീകാരം നേടിയ ഈ വിവർത്തനം, സംസ്കൃത ഭക്തിസാഹിത്യത്തെ സാധാരണ മലയാളികളിലേക്ക് എത്തിക്കുന്നതിൽ വലിയ പങ്കുവഹിച്ച ഒന്നാണ്.

മദ്രാസ്  യൂണിവേഴ്സിറ്റി ലൈബ്രറി ഡിജിറ്റൈസേഷൻ പദ്ധതിയിൽ നിന്നുള്ള സ്കാൻ ആണിത്.

കെ. പത്മനാഭ അയ്യർ എഴുതിയ മഹച്ചരിതമഞ്ജരി എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്. പരമ്പരയിലെ മൂന്നാമത്തെതായി പ്രസിദ്ധീകരിച്ച ഈ പുസ്തകത്തിൽ അലക്സാണ്ടർ ചക്രവർത്തിയുടെ ജീവിതത്തെക്കുറിച്ചും കാലഘട്ടത്തെയും കുറിച്ചാണ് രേഖപ്പെടുത്തിയിട്ടുള്ളത്

ചെറുപ്പകാലത്തുതന്നെ അലക്സാണ്ടർ പ്രശസ്തിയും കീർത്തിയും ആഗ്രഹിച്ചിരുന്നു. തൻ്റെ പിതാവ് അനേകം രാജ്യങ്ങൾ പിടിച്ചടക്കുന്നതു കണ്ടുകൊണ്ട് താൻ വളർന്നുവരുമ്പോൾ സ്വാധീനപ്പെടുത്താൻ രാജ്യങ്ങളൊന്നും ഉണ്ടാവുകയില്ലെന്ന് അദ്ദേഹം കരുതി. കായികാഭ്യാസങ്ങളോടൊപ്പം നിരന്തരം വ്യായാമം ചെയ്യുന്നതിലൂടെ തൻ്റെ ശരീരത്തിൻ്റെ ഉറപ്പും വഴക്കവും നിലനിർത്താൻ ശ്രദ്ധിച്ചു. സാധാരണ ഗുരുക്കന്മാരുടെ നിയന്ത്രനത്തിന് അധീനമാകുന്ന സ്വഭാവമല്ല പുത്രൻ്റെതെന്നു കണ്ട് ഫിലിപ്പ് രാജാവ് പ്രശസ്ത തത്ത്വചിന്തകനായ അരിസ്റ്റോട്ടിലിൻ്റെ കീഴിലുള്ള ശിക്ഷണവും വിദ്യാഭ്യാസവും അലക്സാണ്ടർക്കു നൽകാൻ നിശ്ചയിച്ചു. ഇരുപതാമത്തെ വയസ്സിൽ തൻ്റെ പിതാവ് വധിക്കപ്പെട്ടതിനു ശേഷം അദ്ദേഹം മാസിഡോണിയയുടെ അധികാരമേറ്റെടുത്തു

ത്രേസ്, ഗ്രീസ്, ഏഷ്യാമൈനർ, സിറിയ, ഈജിപ്ത്, പേർഷ്യ, മദ്ധ്യഏഷ്യ എന്നിവിടങ്ങളിലൂടെ അലക്സാണ്ടർ നടത്തിയ പ്രശസ്തമായ പടയോട്ടങ്ങളെ പുസ്തകത്തിൽ വിവരിക്കുന്നു. ബി.സി 327-മാണ്ടിൽ ലക്ഷത്തിൽല്പരം പടയാളികൾക്കൊപ്പം ഇന്ത്യയിലെത്തിയ അലക്സാണ്ടർ സിന്ധു നദിക്കു ചുറ്റുമുള്ള രാജാക്കന്മാരോട് തനിക്കു കീഴടങ്ങുന്നതാണു നല്ലതെന്ന് അറിയിച്ചു. പഞ്ചാബ് പ്രദേശത്തെ സൈനിക നീക്കങ്ങൾ, അതിനുശേഷമുള്ള സൂസയിലേക്കുള്ള മടക്കയാത്ര, അലക്സാണ്ടറുടെ ജീവിതത്തിലെ ഒടുവിലത്തെ വർഷങ്ങൾ, അലക്സാണ്ടറുടെ സ്വഭാവവിശേഷങ്ങൾ, വ്യക്തിപ്രഭാവം, ചരിത്രത്തിൽ അദ്ദേഹത്തിനുള്ള സ്ഥാനം, അദ്ദേഹത്തിൻ്റെ സാമ്രാജ്യത്വ സംഭാവനകൾ, അദ്ദേഹത്തെക്കുറിച്ച് പ്രചരിച്ചിരുന്ന ഐതിഹ്യങ്ങൾ എന്നിവയാണ് പുസ്തകത്തിൻ്റെ അവസാന ഭാഗത്തുള്ളത്. പുസ്തകം പ്രസിദ്ധീകരിച്ച വർഷം രേഖപ്പെടുത്തിയതായി കാണുന്നില്ല

തിരുവനന്തപുരം ജില്ലയിലെ മലയിൻകീഴ്  ശ്രീകൃഷ്ണ വിലാസം ലൈബ്രറിയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്

1951-ൽ പ്രസിദ്ധീകരിച്ച, ശ്രീ മഹാഭാരതം കിളിപ്പാട്ട് എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്

മലയാള ഭാഷയുടെ പിതാവായി കരുതപ്പെടുന്ന തുഞ്ചത്ത് എഴുത്തച്ഛൻ കിളിപ്പാട്ട് ശൈലിയിൽ എഴുതിയ മഹാഭാരതകഥയാണ് മഹാഭാരതം കിളിപ്പാട്ട്. പൗലോമപർവ്വം മുതൽ സ്വർഗ്ഗാരോഹണപർവ്വം വരെയുള്ള ഇരുപത്തിയൊന്നു പർവ്വങ്ങളാണ് ഇതിലുള്ളത്. താളിയോലകൾ ഒത്തു നോക്കി പിഴ തിരുത്തിയ ഈ പുസ്തകത്തിൻ്റെ പരിശോധകൻ ചേപ്പാട്ട് കെ. അച്യുതവാര്യർ ആണ്. പാട്ടിൻ്റെ വരികൾ മുറിയ്ക്കാതെ നക്ഷത്രചിഹ്നമിട്ടാണ് തിരിച്ചിരിക്കുന്നത്.

തിരുവനന്തപുരം ജില്ലയിലെ മലയിൻകീഴ്  ശ്രീകൃഷ്ണ വിലാസം ലൈബ്രറിയിൽ നിന്നാണ് ഈ പുസ്തകം ഡിജിറ്റൈസേഷനായി ലഭ്യമായത്