2019 - ചതുരങ്കപട്ടണം അരുണാചലമുതലിയാരുടെ വിദ്യാവിലാസം അച്ചുകൂടം

Item

51 Reads 1 Downloads
Title
ml 2019 - ചതുരങ്കപട്ടണം അരുണാചലമുതലിയാരുടെ വിദ്യാവിലാസം അച്ചുകൂടം
en 2019-Vidyavilasam Achukoodam Vibhakthapadasamgraham
Date published
2019
Number of pages
28
Language
Date digitized
Item location
Digitzed at

Abstract
ചതുരങ്കപട്ടണം അരുണാചലമുതലിയാരുടെ വിദ്യാവിലാസം അച്ചുകൂടം എന്ന ഈ ഗവേഷണലേഖനത്തിൽ (ഷിജു അലക്സ്, സിബു സി.ജെ., സുനിൽ വി.എസ്.; മലയാളം റിസർച്ച് ജേണൽ, വാല്യം 12, ലക്കം 2, 2019) മലബാറിലെ ആദ്യകാല അച്ചടിചരിത്രത്തിൽ പ്രധാനപ്പെട്ട സ്ഥാനമുണ്ടായിരുന്ന വിദ്യാവിലാസം അച്ചുകൂടത്തിന്റെ ചരിത്രം പുനഃപരിശോധിക്കുന്നു. വിദ്യാവിലാസം സ്ഥാപിച്ചത് കോഴിക്കോട് മുൻസിഫായിരുന്ന കാളഹസ്തിയപ്പ മുതലിയാരാണെന്ന മുൻകാല ചരിത്രകാരന്മാരുടെ വാദം തെറ്റാണെന്നും, യഥാർഥ സ്ഥാപകൻ അദ്ദേഹത്തിന്റെ പിതാവായ അരുണാചല മുതലിയാരാണെന്നും ലേഖനം തെളിവുകൾ നിരത്തി സ്ഥാപിക്കുന്നു. 1859-ൽ വിദ്യാവിലാസം അച്ചുകൂടത്തിൽനിന്ന് പുറത്തിറങ്ങിയ അമരസിംഹം, സുറിയാനി ക്രിസ്ത്യാനികളുടെ നമസ്കാരക്രമങ്ങൾ തുടങ്ങിയ പുസ്തകങ്ങൾ, 1862-ലെ മഹാഭാരതം പാട്ട്, ബാസൽ മിഷൻ പഞ്ചാംഗങ്ങൾ, ഈസ്റ്റ് ഇന്ത്യാ കമ്പനിയുടെ രേഖകൾ എന്നിവയാണ് ഈ വാദത്തിന് അടിസ്ഥാനമാക്കുന്നത്. അരുണാചല മുതലിയാർ കോഴിക്കോട് കോടതിയിൽ സർക്കാർ ഉദ്യോഗസ്ഥനായിരുന്നു എന്നതിനും രേഖകളിലൂടെ തെളിവുകൾ കണ്ടെത്തിയിട്ടുണ്ട്.

ലേഖനം വിദ്യാവിലാസത്തിന്റെ പ്രവർത്തനവികാസവും വിശദീകരിക്കുന്നു. തുടക്കത്തിൽ കല്ലച്ചടി (Lithograph) അച്ചുകൂടമായിരുന്ന സ്ഥാപനം 1860–61 കാലത്ത് മഞ്ചേരിയിൽ ലെറ്റർപ്രസ് അച്ചടി ആരംഭിക്കുകയും 1864-ൽ കോഴിക്കോട് പ്രവർത്തനം കേന്ദ്രീകരിക്കുകയും ചെയ്തു. 1866-നുശേഷം അരുണാചല മുതലിയാരുടെ മകനായ കാളഹസ്തിയപ്പ മുതലിയാർ അച്ചുകൂടത്തിന്റെ ഉടമസ്ഥാവകാശം ഏറ്റെടുത്തു. 1895-ൽ എൽ.എ.ആർ. സുബ്രഹ്മണ്യ അയ്യർ പങ്കാളിയായി; പിന്നീട് എൽ.എസ്. രാമയ്യരുടെ ഉടമസ്ഥതയിലേക്കും സ്ഥാപനം മാറി. തലശ്ശേരിയിൽ 1907-ഓടെ ശാഖ ആരംഭിക്കുകയും കോഴിക്കോട് ശാഖ 1945 വരെയും തലശ്ശേരിയിലെ അച്ചുകൂടം 1977 വരെയും പ്രവർത്തിച്ചിരുന്നതായും രേഖകൾ സൂചിപ്പിക്കുന്നു. ലഭ്യമായ പഴയ പുസ്തകങ്ങൾ, പത്രങ്ങൾ, സർക്കാർ രേഖകൾ, ഗ്രന്ഥസൂചികൾ എന്നിവയെ താരതമ്യപ്പെടുത്തി മുൻകാല അച്ചടിചരിത്രരചനയിലെ പിഴവുകൾ തിരുത്തുന്ന ഈ പഠനം, വിദ്യാവിലാസത്തിന്റെ ഉടമസ്ഥാവകാശമാറ്റം, പ്രവർത്തനകേന്ദ്രങ്ങൾ, അടച്ചുപൂട്ടിയ കാലം തുടങ്ങിയ കാര്യങ്ങളിൽ ഇനിയും ഗവേഷണം ആവശ്യമാണെന്നും ചൂണ്ടിക്കാട്ടുന്നു. പ്രത്യേകിച്ച് മലബാറിലെ ആദ്യകാല അച്ചടിസംരംഭങ്ങളുടെ ചരിത്രം രേഖകളുടെ അടിസ്ഥാനത്തിൽ പുനർനിർമിക്കാനുള്ള ഒരു ശ്രമമാണ് ഈ ലേഖനം.