All release notes

Release note

1934 -ൽ പ്രസിദ്ധീകരിച്ച, സി.വി. കുഞ്ഞുരാമൻ രചിച്ച സോമനാഥൻ - ഒരു ചരിത്രകഥ എന്ന പുസ്തകത്തിൻ്റെ ഡിജിറ്റൽ സ്കാൻ ആണ് ഈ പോസ്റ്റിലൂടെ പങ്കു വെക്കുന്നത്.

ഗസ്നിയിലെ സുൽത്താൻ മഹ്മൂദ് ചരിത്രപ്രസിദ്ധമായ സോമനാഥ ക്ഷേത്രം ആക്രമിക്കുന്ന പശ്ചാത്തലത്തിൽ, ഭാരതത്തിൽ നിലനിന്നിരുന്ന ജാതിവ്യവസ്ഥ, അന്ധവിശ്വാസങ്ങൾ, പുരോഹിതന്മാരുടെ ധാർമ്മിക ജീർണ്ണത, 'സതി' എന്ന ക്രൂരമായ ദുരാചാരം എന്നിവയ്‌ക്കെതിരെ ശക്തമായി വിരൽചൂണ്ടുന്ന ഒരു സാമൂഹിക പരിഷ്കരണ നോവലാണിത്. മതത്തിൻ്റെ പേരിൽ പുരോഹിതവർഗ്ഗം സാധാരണക്കാരെ എങ്ങനെ ചൂഷണം ചെയ്തുവെന്നും, 'സതി' അനുഷ്ഠിക്കുന്ന സ്ത്രീകളെ ചിതയ്ക്കടിയിലെ രഹസ്യ തുരങ്കങ്ങളിലൂടെ കടത്തിക്കൊണ്ടുപോയി ലൈംഗികമായി ചൂഷണം ചെയ്യുന്ന അന്തർനാടകങ്ങളെയും നോവലിൽ രചയിതാവ് പച്ചയായി തുറന്നുകാട്ടുന്നു. തൻ്റെ കുഞ്ഞിനെ രക്ഷിച്ച അന്യമതസ്ഥനായ സുൽത്താനോട് നന്ദികാണിക്കുന്നതിന് പകരം, 'നീചസ്പർശമേറ്റു' എന്ന് പറഞ്ഞ് സ്വന്തം രക്തത്തെപ്പോലും ശപിക്കുന്ന ഭർത്താവിൻ്റെ ജാതിഭ്രാന്താണ് നോവലിൻ്റെ ആദ്യ ഭാഗത്ത്. ഭർത്താവിൻ്റെ മരണത്തോടെ 'സതി' അനുഷ്ഠിക്കേണ്ടി വരുന്ന നായികയുടെ നിസ്സഹായാവസ്ഥയെ കാമപൂർത്തിക്കായി ചൂഷണം ചെയ്യാൻ നോക്കുന്ന പ്രധാന പുരോഹിതൻ്റെ കപടമുഖം ക്ഷേത്രത്തിൻ്റെ ഉള്ളറകളിലെ രഹസ്യങ്ങളിലൂടെ നോവലിൽ അനാവൃതമാകുന്നുണ്ട്. ചിതയിൽ ചാടി സ്വർഗ്ഗ പൂകി എന്ന് നാട്ടുകാരെ വിശ്വസിപ്പിച്ച്, വിഗ്രഹത്തിൻ്റെ അടിയിലെ രഹസ്യ തുരങ്കങ്ങളിലൂടെ സ്ത്രീകളെ തടവിലാക്കുന്ന പുരോഹിതന്മാരുടെ ഇന്ദ്രജാലക്കളി സുൽത്താൻ്റെ വിഗ്രഹഭഞ്ജനത്തോടെ തകർന്നടിയുന്നു. ചരിത്രത്തിലെ പരമ്പരാഗത സങ്കൽപ്പങ്ങളെ തിരുത്തിക്കുറിച്ചുകൊണ്ട്, അന്ധമായ മതനിയമങ്ങളെക്കാളും ജാതിചിന്തകളെക്കാളും വലുത് മാനവികതയും നീതിയുമാണെന്ന ഉദാത്തമായ സന്ദേശമാണ് ഈ നോവൽ മുന്നോട്ട് വെക്കുന്നത്.

കൊല്ലം അയത്തിൽ സാഹിത്യവിലാസിനി ഗ്രന്ഥശാലയാണ് ഈ പുസ്തകം ഡിജിറ്റൈസേഷനായി നൽകിയിട്ടുള്ളത്.