കെരളൊല്പത്തി
Kēraḷōlpatti
- Year
- 1843
- Pages
- 61
- Language
- Malayalam
- Views
- 67
- Downloads
- 5
The reader could not be loaded. Please use the download links above.
About this document
ഹെർമൻ ഗുണ്ടർട്ട് 1843-ൽ ക്രോഡീകരിച്ച് പ്രസിദ്ധീകരിച്ച കേരളത്തിൻ്റെ പ്രാചീനചരിത്രവും ഐതിഹ്യങ്ങളും ഉൾക്കൊള്ളുന്ന പ്രധാനപ്പെട്ട ഒരു കൃതിയാണ് കേരളോൽപ്പത്തി. കേരളത്തിൻ്റെ പ്രാചീനചരിത്രമെന്നോണം ധാരാളം ഐതിഹ്യങ്ങളും കേട്ടുകേൾവികളും ഉൾച്ചേർത്താണ് ഈ കൃതി രചിക്കപ്പെട്ടിരിക്കുന്നത്.
പരശുരാമൻ സമുദ്രത്തിൽ നിന്ന് കേരളഭൂമി വീണ്ടെടുത്തതിനെക്കുറിച്ചുള്ള ഐതിഹ്യത്തോടെയാണ് കൃതി ആരംഭിക്കുന്നത്. തുടർന്ന് തുളുനാടും കേരളവും ഉൾപ്പെടുന്ന പ്രദേശങ്ങളിൽ ബ്രാഹ്മണഗ്രാമങ്ങൾ സ്ഥാപിച്ചതും, ഭരണസൗകര്യത്തിനായി വിവിധ ഗ്രാമാധിപന്മാരെയും പെരുമാക്കന്മാരെയും തിരഞ്ഞെടുത്ത് നടത്തിയ ഭരണസംവിധാനങ്ങളും ഇതിൽ വിവരിക്കുന്നു. ജനങ്ങളുടെ സംരക്ഷണം, ക്ഷേത്രങ്ങളുടെയും കാവുകളുടെയും നിർമ്മാണം, വിവിധ സമുദായങ്ങളുടെ കടമകളും അവകാശങ്ങളും, പ്രാദേശികാചാരങ്ങൾ എന്നിവയും കൃതിയിൽ പ്രതിപാദിക്കുന്നുണ്ട്. വൈദേശിക വ്യാപാരബന്ധങ്ങളും പ്രാദേശിക രാജവംശങ്ങളുടെ ഉത്ഭവവും ചേരമാൻ പെരുമാളിൻ്റെ ഭരണകാലവും ഇതിൽ വിവരിക്കപ്പെടുന്നു. അതിനാൽ കേരളത്തിൻ്റെ പ്രാചീന സാമൂഹിക-സാംസ്കാരിക ഘടനയിലേക്ക് വെളിച്ചം വീശുന്ന ഒരു പ്രധാന ചരിത്രരേഖയായും കേരളോൽപ്പത്തിയെ കണക്കാക്കാം.
വിവിധ പാഠഭേദങ്ങൾ പരിശോധിച്ച് ഹെർമൻ ഗുണ്ടർട്ട് 1843-ൽ ഈ കൃതിയുടെ ആദ്യപതിപ്പ് ക്രോഡീകരിച്ച് പ്രസിദ്ധീകരിച്ചതോടെയാണ് കേരളോൽപ്പത്തിക്ക് സവിശേഷമായ ശ്രദ്ധ ലഭിച്ചത്. അതുവരെ മിഷനറിമാർ—പ്രത്യേകിച്ച് സി.എം.എസ്., ബാസൽ മിഷൻ തുടങ്ങിയ സ്ഥാപനങ്ങൾ—പ്രസിദ്ധീകരിച്ചിരുന്ന ക്രൈസ്തവ മതഗ്രന്ഥങ്ങളാണ് പ്രധാനമായും അച്ചടി രൂപത്തിൽ ലഭ്യമായിരുന്നത്. അതിനിടയിൽ ഒരു പൊതുവിഷയത്തെ ആസ്പദമാക്കിയ ഇത്തരമൊരു കൃതി അച്ചടിച്ചുപ്രസിദ്ധീകരിച്ചത് കേരളോൽപ്പത്തിയുടെയും ഗുണ്ടർട്ടിൻ്റെയും പ്രശസ്തി വർധിപ്പിക്കുന്നതിന് കാരണമായി.
ആദ്യപതിപ്പ് അച്ചടിച്ച സമയത്ത് തലശ്ശേരിയിൽ ലിത്തോഗ്രഫി പ്രസ്സ് സ്ഥാപിതമായിരുന്നില്ല. അതിനാൽ ഈ പതിപ്പിൻ്റെ അച്ചടിരീതിയും രൂപകല്പനയും പിന്നീടുള്ള പതിപ്പുകളിൽ നിന്ന് വ്യത്യസ്തമാണ്. ഒന്നാം പതിപ്പിന് പ്രത്യേകമായ കവർപേജ് ഉണ്ടായിരുന്നില്ല; ഏറ്റവും അവസാനത്തെ പേജിലാണ് പ്രസ്സുമായി ബന്ധപ്പെട്ട വിവരങ്ങൾ നൽകിയിരിക്കുന്നത്. ഉള്ളടക്കം വളരെ തിങ്ങിക്കൂട്ടിയാണ് പേജുകളിൽ ക്രമീകരിച്ചിരിക്കുന്നത്. കൂടാതെ, ഒന്നാം പതിപ്പിൻ്റെ പേജുകളുടെ വലുപ്പവും ശ്രദ്ധേയമായി കൂടുതലാണ്.
ഈ ആദ്യപതിപ്പിൻ്റെ മറ്റൊരു പ്രധാന സവിശേഷത മലയാളലിപിയുടെ അക്കാലത്തെ രൂപമാണ്. 'കേരളോൽപ്പത്തി' എന്ന ഇന്നത്തെ രൂപത്തിന് പകരം പുസ്തകത്തിൻ്റെ പേര് തന്നെ 'കെരളൊല്പത്തി' എന്നാണ് അച്ചടിച്ചിരിക്കുന്നത്. ആദ്യപതിപ്പിൽ ഏ-കാരം, ഓ-കാരം എന്നിവ ഇന്നത്തെ രീതിയിൽ ഉപയോഗിച്ചിട്ടില്ല. ചന്ദ്രക്കലയുടെ ഉപയോഗവും ഇന്നത്തെ രീതിയിലുള്ള വാക്കുകൾക്കിടയിലെ ഇടവിടലും വിരാമചിഹ്നങ്ങളുടെ പ്രയോഗവും കാണുന്നില്ല. ഒന്നാം പതിപ്പിൽ നിന്ന് രണ്ടാം പതിപ്പിലേക്കും മൂന്നാം പതിപ്പിലേക്കും എത്തുമ്പോൾ മലയാളലിപിയിൽ സംഭവിച്ച ദ്രുതഗതിയിലുള്ള പരിണാമം വ്യക്തമായി കാണാൻ കഴിയും. പിൽക്കാല പതിപ്പുകളിൽ ചന്ദ്രക്കല, വാക്കുകൾക്കിടയിലെ സ്പേസ്, വിവിധ വിരാമചിഹ്നങ്ങൾ തുടങ്ങിയവ കൂടുതൽ ക്രമബദ്ധമായി ഉപയോഗിച്ചിരിക്കുന്നതും ശ്രദ്ധേയമാണ്.
മറ്റൊരു എടുത്തുപറയേണ്ട സവിശേഷത, എല്ലാ പതിപ്പുകളിലും പാഠഭേദങ്ങൾ ബ്രാക്കറ്റ്, സ്ക്വയർ ബ്രാക്കറ്റ് തുടങ്ങിയ ചിഹ്നങ്ങൾ ഉപയോഗിച്ച് പ്രത്യേകം അടയാളപ്പെടുത്തിയിട്ടുണ്ടെന്നതാണ്. വിവിധ പാഠരൂപങ്ങൾ താരതമ്യം ചെയ്ത് കൃതി ക്രോഡീകരിച്ച ഗുണ്ടർട്ടിൻ്റെ സമീപനവും അക്കാലത്തെ മലയാള അച്ചടിയുടെ വളർച്ചയും പഠിക്കുന്നതിന് ഈ പതിപ്പുകൾ ഏറെ പ്രാധാന്യമുള്ളവയാണ്.
പിന്നീടുള്ള രണ്ട് പതിപ്പുകൾ ബാസൽ മിഷൻ്റെ ലെറ്റർപ്രസ്സിലാണ് അച്ചടിച്ചത്. ബാസൽ മിഷൻ മംഗലാപുരത്ത് ലെറ്റർപ്രസ് സ്ഥാപിച്ചത് 1865-ലാണ്. അതിനാൽ ഒന്നാം പതിപ്പിനെയും തുടർന്നുള്ള പതിപ്പുകളെയും താരതമ്യം ചെയ്യുമ്പോൾ അച്ചടിസാങ്കേതികവിദ്യയിലും മലയാളലിപിയിലും പുസ്തകത്തിൻ്റെ രൂപകല്പനയിലും ഉണ്ടായ മാറ്റങ്ങൾ വ്യക്തമായി നിരീക്ഷിക്കാനാകും.
കേരളത്തിൻ്റെ പ്രാചീനചരിത്രം, ഐതിഹ്യങ്ങൾ, സാമൂഹിക-സാംസ്കാരിക ഘടന, ഭരണസംവിധാനം, പ്രാദേശികാചാരങ്ങൾ എന്നിവയെക്കുറിച്ചുള്ള വിവരങ്ങൾ ഉൾക്കൊള്ളുന്നതോടൊപ്പം, പത്തൊൻപതാം നൂറ്റാണ്ടിലെ മലയാള അച്ചടിയുടെയും ലിപിവികാസത്തിൻ്റെയും ചരിത്രം മനസ്സിലാക്കുന്നതിനും കേരളോൽപ്പത്തിയുടെ ആദ്യപതിപ്പ് ഏറെ വിലപ്പെട്ട ഒരു ചരിത്രരേഖയാണ്.
Subjects
Cite this document
കെരളൊല്പത്തി. 1843. Granthappura. Accessed November 22, 2026. https://gpura.org/items/1843-keralolpathi-glp/.
കെരളൊല്പത്തി. 1843, Granthappura, gpura.org/items/1843-keralolpathi-glp/. Accessed 22 Nov. 2026.
കെരളൊല്പത്തി. (1843). Granthappura. https://gpura.org/items/1843-keralolpathi-glp/
കെരളൊല്പത്തി (1843). Granthappura. Available at: https://gpura.org/items/1843-keralolpathi-glp/ (Accessed: 22 November 2026).
BibTeX
@misc{gpura10962,
title = {{കെരളൊല്പത്തി}},
year = {1843},
howpublished = {Granthappura},
url = {https://gpura.org/items/1843-keralolpathi-glp/},
urldate = {2026-11-22}
}
Download RIS (Zotero, Mendeley, EndNote)